ໄດ້ແລ້ວຜູ້ໂຊກດີຈາກລາວຟອດປະຈໍາປີ 2017

ພິທີຈັບສະຫລາກຄືນກໍາໄລໃຫ້ລູກຄ້າປະຈໍາປີ 2017 ຂອງບໍລິສັດລາວຟອດຊີຕີ, ໄດ້ຈັດຂຶ້ນໃນວັນທີ 29 ມັງກອນນີ້ທີ່ສູນບໍລິການຈໍາໜ່າຍລົດດັ່ງກ່າວຢູ່ບ້ານຂຸນຕາ, ເມືອງສີໂຄດຕະບອງ, ນະຄອນຫລວງວຽງຈັນ, ໂດຍມີຜູ້ບໍລິຫານ, ພະນັກງານ ແລະ ລູກຄ້າເຂົ້າຮ່ວມຈໍານວນຫລາຍ. ໂຄງການມອບໂຊກນີ້ໄດ້ເລີ່ມປະຕິບັດມາແຕ່ເດືອນກໍລະກົດຫາເດືອນທັນວາ 2017 ໂດຍລູກຄ້າຜູ້ທີ່ຊື້ລົດຟອດທຸກລຸ້ນຈະໄດ້ຮັບບັດຊິງໂຊກ 1 ໃບຕໍ່ 1 ຄັນ ແລະ ໃນໄລຍະດັ່ງກ່າວໄດ້ມີຜູ້ມາຊື້ລົດຟອດຢູ່ສາຂາຈໍາໜ່າຍໃນທົ່ວປະເທດຫລາຍກວ່າ 500 ຄັນ ແລະ ຜ່ານການຈັບລາງວັນຄັ້ງນີ້ເຫັນວ່າ: ລູກຄ້າຜູ້ໂຊກດີໄດ້ຮັບລາງວັນທີ 1 ລົດກະບະຟອດເຣນເຈີ ລຸ້ນ XL ແມ່ນທ່ານ ເຢີມ ແດນວົງອອນ ຢູ່ແຂວງຫລວງນໍ້າທາ ແລະ ຜູ້ໂຊກດີໄດ້ຮັບລາງວັນທີ 2 ລົດເກງຟອດເຟສຕາ ແມ່ນທ່ານນາງ ດາວ ສີວຽງຄໍາ ຢູ່ບ້ານສີໄຄເມືອງສີໂຄດຕະບອງນະຄອນຫລວງວຽງຈັນ. ສ່ວນລາງວັນທີ 3 ແມ່ນໂທລະພາບສີ 40 ນິ້ວມີ 2 ລາງວັນ, ລາງວັນທີ 4 ແມ່ນຕູ້ເຢັນນ້ອຍມີ 3 ລາງວັນ ແລະ ລາງວັນທີ 5 ເປັນກ້ອງບັນທຶກຕິດລົດມີທັງໝົດ 10 ລາງວັນ. ນອກນີ້, ຍັງໄດ້ຈັບລາງວັນພິເສດເປັນບັດເຕີມນໍ້າມັນມູນຄ່າ 5 ແສນກີບຈໍານວນ 5 ລາງວັນໃຫ້ແກ່ລູກຄ້າ ແລະ ແຂກທີ່ເຂົ້າຮ່ວມງານຄັ້ງນີ້ອີກດ້ວຍ.