EPSON ນໍາສະເໜີຫລາຍຜະລິດຕະພັນສູ່ຕະຫລາດລາວ
ໃນວັນທີ 24 ມັງກອນນີ້, ທີ່ໂຮງແຮມແລນມາກນະຄອນຫລວງວຽງຈັນ ບໍລິສັດ ເອບສັນ (EPSON) ປະເທດໄທ, ໄດ້ນໍາສະເໜີຜະລິດຕະພັນໃໝ່ຂອງຕົນຫລາຍປະເພດຄື: ເຄື່ອງປລີ້ນເອກະສານຮຸ້ນໃໝ່ ອິງແຕງອິງເຈດ (inktank inkjet), ເຄື່ອງສາຍໂປຼແຈັກເຕີລຸ້ນສະມາດ-ຊີຣີ (smart-series) ແລະ ເຄື່ອງສະແກນເນີລຸ້ນໃໝ່ຈໍານວນໜຶ່ງ ເພື່ອຮອງຮັບຄວາມຕ້ອງການຂອງຜູ້ຊົມໃຊ້ໄດ້ສະດວກສະບາຍໃນເງື່ອນໄຂແຫ່ງການພັດທະນາເສດຖະກິດ-ສັງຄົມຂອງປະເທດລາວພວມມີການເຕີບໃຫຍ່ຫຍາຍຕົວດີ.
ຜູ້ຈັດການທົ່ວໄປຂອງບໍລິສັດດັ່ງກ່າວ ໃຫ້ຮູ້ວ່າ: ບໍລິສັດພວກເຮົາປະສົບຜົນສໍາເລັດເປັນຢ່າງດີໃນການຜະລິດ ແລະ ສະໜອງອຸປະກອນໄອທີສັງຄົມ ໂດຍສະເພາະຜະລິດຕະພັນ ເຄື່ອງປຣິນເຕີ້, ເຄື່ອງສາຍໂປຼແຈກເຕີ, ເຄື່ອງສະແກນເນີ ແລະ ສິນຄ້າອື່ນໆ. ມາຮອດປັດຈຸບັນມີຍອດຂາຍຫລາຍກວ່າ 20 ລ້ານໜ່ວຍໃນ 150 ປະເທດ ກວມເອົາປະມານ 70% ຂອງສ່ວນແບ່ງຕະຫລາດໃນທົ່ວໂລກ ແລະ ເປັນຜູ້ຜະລິດໂປຼແຈກເຕີອັນດັບໜຶ່ງຂອງໂລກຕະຫລອດ 16 ປີຕິດຕໍ່ກັນ ແລະ ກວມ 37,3% ຂອງສ່ວນແບ່ງຕະຫລາດໃນພາກພື້ນອາຊີຕາເວັນອອກສຽງໃຕ້. ສໍາລັບປະເທດລາວທີ່ມີລະດັບການຂະຫຍາຍຕົວທາງເສດຖະກິດດີຕະຫລອດມາໃນລະດັບ 7-8% ຍ້ອນໄດ້ມີປັດໄຈສໍາຄັນຂອງການລົງທຶນຈາກຕ່າງປະເທດ ແລະ ພາຍໃນເພື່ອພັດທະນາພື້ນຖານໂຄງລ່າງຂອງຊາດ, ການສົ່ງອອກຜະລິດຕະພັນກະສິກໍາ, ບວກກັບປັດໄຈໃນການຊຸກຍູ້ສົ່ງເສີມການທ່ອງທ່ຽວ, ການບໍລິການ ທີ່ສາມາດດຶງດູດນັກທ່ອງທ່ຽວຈາກທົ່ວໂລກໄດ້ຫລາຍຂຶ້ນ, ໄປພ້ອມໆກັບການຂະຫຍາຍຕົວທາງດ້ານເຕັກໂນໂລຊີຂໍ້ມູນຂ່າວສານ ແລະ ການສື່ສານທີ່ສາມາດດຶງດູດນັກລົງທຶນຈາກຕ່າງປະເທດໄດ້ເປັນຢ່າງດີ. ສະນັ້ນ ການຂະຫຍາຍຕົວຢ່າງວ່ອງໄວຂອງທຸລະກິດຫລາຍພາກສ່ວນໄດ້ນໍາໄປສູ່ຄວາມຕ້ອງການອຸປະກອນໄອທີທີ່ຈໍາເປັນສໍາລັບການດໍາເນີນງານໃນທຸກອົງກອນ ແລະ ສິນຄ້າໃໝ່ທີ່ນໍາມາສະເໜີຄັ້ງນີ້ມີທັງໝົດ 6 ລຸ້ນຄື: ເຄື່ອງພີມອະເນກປະສົງ 4 ສີໄວຟາຍ (Wi-Fi) ແລະ ລຸ້ນ L4150, L4160, L6160, L6170 ແລະ L6190 ທີ່ພັດທະນານໍ້າມຶກສີດໍາສາມາດກັນນໍ້າຢ່າງມີປະສິດທິຜົນ, ພ້ອມມີຫົວພີມພິເສດທີ່ເຮັດວຽກວ່ອງໄວ, ປະຢັດເວລາ ແລະ ຕົ້ນທຶນອີກດ້ວຍ.
ທ່ານຜູ້ຈັດການທົ່ວໄປຂອງບໍລິສັດ ໃຫ້ຮູ້ວ່າ: Epson ເຫັນໂອກາດດີທີ່ຂະຫຍາຍຕະ ຫລາດໃນລາວ, ເນື່ອງຈາກໄດ້ມີທຸລະກິດໃໝ່ເກີດຂຶ້ນຫລາຍທັງໃນປະເທດ ແລະ ຈາກຕ່າງປະເທດຂະໜາດໃຫຍ່. ພວກເຮົາໝັ້ນໃຈວ່າຫົວໜ່ວຍທຸລະກິດ, ພາກລັດ ແລະ ສະຖາບັນການສຶກສາຕ່າງໆຈະໃຫ້ການຕອບຮັບໃນຜະລິດຕະພັນຂອງພວກເຮົາເປັນຢ່າງດີ.
