ເກີດເຫດໄຟໄໝ້ບໍລິສັດກັ່ນນ້ຳມັນເຄື່ອງໄດ້ຮັບຄວາມເສຍຫາຍ 1 ຫລັງ
ເຈົ້າໜ້າທີ່ສະກັດກັ້ນ ແລະ ມອດໄຟນະຄອນຫລວງວຽງຈັນ ໃຫ້ຮູ້ວ່າ: ເວລາປະມານ 10 ໂມງຂອງວັນທີ 23 ມັງກອນນີ້, ໄດ້ເກີດເຫດໄຟໄໝ້ບໍລິສັດກັ່ນນ້ຳມັນເຄື່ອງຢູ່ບ້ານບໍ່ເຫລັກເມືອງໄຊທານີນະຄອນຫລວງວຽງຈັນ, ໄດ້ຮັບຄວາມເສຍຫາຍອາຄານ 1 ຫລັງມູນຄ່າ 2 ແສນກວ່າໂດລາສະຫະລັດ.
ຈາກການສືບສວນ-ສອບສວນເບື້ອງຕົ້ນ ໄດ້ຮູ້ວ່າ: ບໍລິສັດດັ່ງກ່າວແມ່ນເປັນຂອງທ້າວ ຄຳອອນ ຈັນຍາວາດ ອາຍຸ 51 ປີນັກທຸລະກິດຢູ່ບ້ານໄຊສະຫວ່າງ ເມືອງໄຊທານີນະຄອນຫລວງວຽງຈັນ, ຊຶ່ງຜູ້ກ່ຽວໄດ້ເປີດບໍລິສັດກັ່ນນ້ຳມັນເຄື່ອງຢູ່ບ້ານບໍ່ເຫລັກ (ຫລັກ36), ຊຶ່ງຈຸດເກີດເຫດແມ່ນຢູ່ອາຄານດ້ານຫລັງໂຮງງານ, ໂດຍເຄື່ອງຈັກທີ່ສະກັດກັ່ນຕອງນ້ຳມັນເຄື່ອງໄດ້ແຕກ ແລະ ເກີດກະແສໄຟລຸກຂຶ້ນ, ຈາກນັ້ນກໍໄດ້ລຸກໄໝ້ໄປທົ່ວອາຄານກ່ອນພະນັກງານຈະໄດ້ແຈ້ງ ແລະ ເຈົ້າໜ້າທີ່ໄດ້ລະດົມກຳລັງ ແລະ ລົດມອດໄຟເພື່ອເຂົ້າມາມອດໄຟ ແລະ ຄວບຄຸມບໍ່ໃຫ້ລຸກໄໝ້ຂະຫຍາຍວົງກວ້າງ, ໂດຍສາເຫດຂອງການເກີດອັກຄີໄພຍັງຢູ່ໃນຂັ້ນຕອນສືບສວນ-ສອບສວນຂອງເຈົ້າໜ້າທີ່.
ເຈົ້າໜ້າທີ່ ໃຫ້ຮູ້ວ່າ: ໃນປີຜ່ານມາ, ຢູ່ນະຄອນຫລວງວຽງຈັນມີອັກຄີໄພເກີດຂຶ້ນຫລາຍກວ່າ 50 ຄັ້ງ, ສົ່ງຜົນໃຫ້ມີຜູ້ເສຍຊີວິດຊີວິດ 1 ຄົນ ແລະ ມີຜົນເສຍຫາຍຄື: ເຮືອນປະຊາຊົນ 13 ຫລັງ, ຕະຫລາດ 2 ແຫ່ງ ແລະ ອື່ນໆ ລວມມູນຄ່າຫລາຍສິບຕື້ກີບ, ໂດຍສາເຫດສ່ວນໃຫຍ່ແມ່ນຍ້ອນໄຟຟ້າລັດວົງຈອນ, ໄຕ້ທູບທຽນບູຊາ ແລະ ການຈູດປ່າຊະຊາຍ.
