ນະຄອນຫລວງວຽງຈັນກຽມຈັດແຂ່ງຂັນ ສະນຸກເກີ 16 ແດງ ຊີງຂັນຮອງເຈົ້າຄອງ
ພະແນກສຶກສາທິການ ແລະ ກິລາ ນະຄອນຫລວງວຽງຈັນ (ນວ) ຮ່ວມກັບສະໂມສອນ ສະນຸກເກີ ສະຕາຣ ບ້ານຫ້ວຍຫົງ ຈະຈັດການແຂ່ງຂັນກິລາສະນຸກເກີ 16 ແດງ ທົ່ວນະຄອນຫລວງວຽງຈັນ ຊີງຂັນທ່ານຮອງເຈົ້າຄອງນະຄອນຫລວງວຽງຈັນ ເພື່ອເລືອກເຟັ້ນຫານັກກິລາຜູ້ທີ່ພອນສະຫວັນດີເດັ່ນກຽມຕາງໜ້ານະຄອນຫລວງວຽງຈັນເຂົ້າຮ່ວມງານມະຫະກຳກິລາແຫ່ງຊາດ ຄັ້ງທີ 11 ຫລື ຊຽງຂວາງເກມ ທີ່ແຂວງຊຽງຂວາງ ຮັບກຽດເປັນເຈົ້າພາບໃນທ້າຍປີນີ້.
ທ່ານ ກອງແກ້ວ ແຫ່ງດາວົງໄຊ ຫົວໜ້າຂະແໜງກິລາລະດັບສູງ ພະແນກສຶກສາທິການ ແລະ ກິລາ ນະຄອນຫລວງວຽງຈັນ ໃຫ້ຮູ້ວ່າ: ການແຂ່ງຂັນກິລາສະນຸກເກີ 16 ແດງ ທົ່ວນະຄອນຫລວງວຽງຈັນ ຊີງຂັນທ່ານຮອງເຈົ້າຄອງນະຄອນຫລວງວຽງຈັນ ຈະຈັດຂຶ້ນໃນວັນທີ 10 ກຸມພານີ້ ເພື່ອເລືອກເຟັ້ນຫານັກກິລາຜູ້ທີ່ພອນສະຫວັນດີເດັ່ນ ກຽມຕາງໜ້ານະຄອນຫລວງວຽງຈັນເຂົ້າຮ່ວມງານມະຫະກຳກິລາແຫ່ງຊາດ ຄັ້ງທີ 11 ຫລື ຊຽງຂວາງເກມ ທີ່ແຂວງຊຽງຂວາງ ຮັບກຽດເປັນເຈົ້າພາບໃນທ້າຍປີ 2018. ພ້ອມກັນນັ້ນ ກໍຍັງເປັນການສ້າງຂະບວນການຊົມເຊີຍວັນສ້າງຕັ້ງກອງທັບ ປະຊາຊົນລາວ ຄົບຮອບ 69 ປີ. ສຳລັບການແຂ່ງຂັນແມ່ນມີການກຳນົດເງື່ອນໄຂນັກກິລາທີມຊາດຊຸດປັດຈຸບັນເຂົ້າຮ່ວມແຂ່ງຂັນ ແລະ ຈະມີການເປີດຮັບສະໝັກນັບແຕ່ດຽວນີ້ເປັນຕົ້ນໄປ ແລະ ສາມາດຕິດຕໍ່ພົວພັນໄດ້ທີ່ສະໂມສອນ ສະນຸກເກີ ສະຕາຣ ບ້ານຫ້ວຍຫົງ ເມືອງຈັນທະບູລີ ຫລື ສູນກິລາບຶງຂະຫຍອງ ເຊິ່ງໃນວັນທີ 5 ກຸມພາ ຈະມີການເຕົ້າໂຮມນັກກິລາທີ່ສະໂມສອນ ສະນຸກເກີ ສະຕາຣ ເພື່ອຈັບສະຫລາກຈັບຄູ່ແຂ່ງຂັນ ແລະ ວັນທີ 10 ກຸມພາ ຈະມີການແຂ່ງຂັນຢ່າງເປັນທາງການ.
ສຳລັບລາງວັນນັກກິລາຜູ້ທີ່ໄດ້ຮັບຊະນະເລີດ ຈະໄດ້ຮັບຂັນເງິນໜັກ 500 ກຣາມ, ພ້ອມເງິນສົດ 2 ລ້ານກີບ, ທີ 2 ຈະໄດ້ຮັບຂັນເງິນ 300 ກຣາມ ພ້ອມເງິນສົດ 1 ລ້ານກີບ ແລະ ທີ 3 ຮ່ວມ ຈະໄດ້ຮັບລາງວັນເງິນສົດ 5 ແສນກີບ.
