ວາງສີລາລຶກກໍ່ສ້າງໂຮງຮຽນທິດສະດີການເມືອງກອງທັບປະຊາຊົນລາວ

ພິທີວາງສີລາລຶກໂຄງການກໍ່ສ້າງໂຮງຮຽນທິດສະດີການເມືອງ-ການປົກຄອງກອງທັບປະຊາຊົນລາວໄດ້ຈັດຂຶ້ນໃນທ້າຍອາທິດຜ່ານມານີ້ທີ່ບ້ານນາຄວາຍເມືອງໄຊເສດຖານະຄອນຫລວງວຽງຈັນ, ໂດຍການເຂົ້າຮ່ວມຂອງທ່ານພົນໂທ ຈັນສະໝອນ ຈັນຍາລາດ ລັດຖະມົນຕີກະຊວງປ້ອງກັນປະເທດ, ມີທ່ານ ຫງວຽນບາຮຸ່ງ ເອກອັກຄະລັດຖະທູດຫວຽດນາມປະຈໍາລາວ, ພ້ອມດ້ວຍການນໍາກະຊວງປ້ອງກັນປະເທດ ແລະ ພາກສ່ວນກ່ຽວຂ້ອງເຂົ້າຮ່ວມເປັນຈໍານວນຫລາຍ.

ທ່ານພົນໂທ ວິໄລ ຫລ້າຄໍາຟອງ ຮອງລັດຖະມົນຕີກະຊວງປ້ອງກັນປະເທດ, ຫົວໜ້າກົມໃຫຍ່ການເມືອງກອງທັບ ໃຫ້ຮູ້ວ່າ: ການກໍ່ສ້າງໂຮງຮຽນທິດສະດີການເມືອງ-ການປົກຄອງຂອງກອງທັບປະຊາຊົນລາວໃນຄັ້ງນີ້, ແມ່ນອິງໃສ່ຄວາມຮຽກຮ້ອງຕ້ອງການຈໍາເປັນພາວະວິໄສສໍາລັບກອງທັບ, ເປັນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ X ຂອງພັກ ແລະ ທິດນໍາຂອງພັກໃນການປັບປຸງກໍ່ສ້າງກອງທັບໃຫ້ການເປັນກອງທັບປະຕິວັດ, ມີຄວາມໜັກແໜ້ນທາງດ້ານການເມືອງແນວຄິດ, ມີແບບແຜນທັນສະໄໝ, ຮັບປະກັນກຽມພ້ອມສູ້ຮົບໃນສະໜາມຮົບແນວຄິດ ແລະ ທິດສະດີຂອງພັກໃນກອງທັບໃຫ້ມີຄຸນນະພາບໃໝ່.

ໂຄງການດັ່ງກ່າວ, ໄດ້ຮັບທຶນຊ່ວຍເຫລືອລ້າຈາກກະຊວງປ້ອງກັນປະເທດຫວຽດນາມ, ເຊິ່ງມອບໃຫ້ກຸ່ມບໍລິສັດ 36 ສາຂາປະຈໍາລາວ ແລະ ບໍລິສັດນາວີນາໂກຈາກປະເທດຫວຽດນາມເປັນຜູ້ຮັບເໝົາກໍ່ສ້າງ, ປະກອບອາຄານ 10 ກວ່າຫລັງ, ພ້ອມດ້ວຍເຄື່ອງອໍານວຍຄວາມສະດວກດ້ານຕ່າງໆຄົບຊຸດ, ລວມມີມູນຄ່າກໍ່ສ້າງທັງຫມົດ 274 ຕື້ດົ້ງ (ສະກຸນເງິນຫງຽດນາມ) ແລະ ຄາດວ່າຈະໃຫ້ສໍາເລັດໃນທ້າຍປີ 2019.