ຕໍາຫລວດໄຊຍະບູລີບຸກມ້າງເຄືອຂ່າຍຄ້າຢາເສບຕິດອັນຕະລາຍຢູ່ບ້ານສວນ
ເຈົ້າໜ້າທີ່ ປກສ ແຂວງໄຊຍະບູລີ ໃຫ້ຮູ້ວ່າ: ເມື່ອບໍ່ດົນມານີ້, ກໍາລັງເຈົ້າໜ້າທີ່ຂອງຕົນໄດ້ບຸກເຂົ້າປິດລ້ອມເຮືອນເປົ້າໝາຍຄ້າຂາຍຢາເສບຕິດອັນຕະລາຍຢູ່ບ້ານສວນເມືອງ ແລະ ແຂວງໄຊຍະບູລີ ແລະ ສາມາດຈັບຜູ້ຕ້ອງຫາໄດ້ 2 ຄົນຄື: ທ້າວ ໂນ່ ອາຍຸ 21 ປີຢູ່ບ້ານສວນ ແລະ ທ້າວ ສົມພົງ ອາຍຸ 19 ປີຢູ່ບ້ານວັງຄຳເມືອງພຽງ, ພ້ອມຂອງກາງຢາບ້າ 182 ເມັດ, ລົດຈັກ 1 ຄັນ ແລະ ເງິນຈຳນວນໜຶ່ງ, ພາຍຫລັງເອົາຕົວມາສືບສວນ-ສອບສວນທັງສອງໄດ້ຊັດທອດຜູ້ຮ່ວມຂະບວນການອີກຈໍານວນໜຶ່ງ, ຈາກນັ້ນເຈົ້າໜ້າທີ່ກໍສາມາດນໍາຈັບຕົວມາດໍາເນີນຄະດີໄດ້ຄື: ທ້າວ ແຄະຝາມ ຈ່ຽວຕ໋ອງ ອາຍຸ 29 ປີ ແລະ ນາງ ເໝີຍຝຽມ ແຊ່ພານ ອາຍຸ 26 ປີຢູ່ບ້ານສີເມືອງເມືອງໄຊຍະບູລີ ແລະ ທ້າວ ຈຽວຕ໋ອງ ແຊພານ ອາຍຸ 32 ປີຢູ່ບ້ານໂພນມະນີເມືອງນ້ຳບາກແຂວງຫລວງພະບາງ, ພ້ອມຂອງກາງຢາບ້າ 201 ເມັດ, ເງິນ 26 ລ້ານກວ່າກີບ, 2.600 ບາດ (ສະກຸນເງິນໄທ), ຄຳຮູບປະພັນຈໍານວນໜຶ່ງ ແລະ ລົດກະບະໂຕໂຍຕາຣີໂວ້ 1 ຄັນ, ຈາກນັ້ນ, ເຈົ້າໜ້າທີ່ໄດ້ໄປກວດຄົ້ນເຮືອນຂອງທ້າວ ແຄະຝາມ ແລະ ນາງ ເໝີຍ ແຊ່ພານ ແລະ ພົບເຫັນຢາບ້າຕື່ມອີກ 39.181 ເມັດ, ໂທລະສັບ 1 ໜ່ວຍ, ສາຍແຂນຄຳ 1 ເສັ້ນ, ຕ້າງຫູຄຳ 6 ຄູ່, ສາຍແຂນເງິນ 1 ເສັ້ນ, ປຶ້ມເງິນຝາກທະນາຄານ 5 ຫົວ, ມີເງິນໃນບັນຊີ 840 ລ້ານກວ່າກີບ, ບັດ ATM 1 ບັດ, ສາຍຄໍຄືຄຳ 3 ເສັ້ນ, ເງິນ 31 ລ້ານກວ່າກີບ ແລະ 2.870 ບາດ, ຈຶ່ງຢຶດໄວ້ເປັນຫລັກຖານເພື່ອດໍາເນີນຄະດີຕາມລະບຽບກົດໝາຍ.
ຂ່າວໃຫ້ຮູ້ຕື່ມວ່າ: ເມື່ອບໍ່ດົນມານີ້, ສານປະຊາຊົນຂັ້ນຕົ້ນແຂວງຫົວພັນໄດ້ຕັດສີນລົງໂທດທ້າວ ໄມລີ ອາຍຸ 42 ປີຢູ່ບ້ານກໍໄຮເມືອງຊໍາເໜືອ ແລະ ທ້າວ ວຽງຮົມ ອາຍຸ 33 ປີຢູ່ບ້ານປ້ອງເມືອງສົບເບົາຈໍາຄຸກ 5 ປີ, ພ້ອມປັບໄໝ 10 ລ້ານກີບ ແລະ ຕັດສີນທ້າວ ສົມພູມົວ ອາຍຸ 39 ປີຢູ່ບ້ານໂພໄຊເມືອງຊຳເໜືອຈຳຄຸກ 15 ປີ, ພ້ອມປັບໄໝ 30 ລ້ານກີບໃນສະຖານຄ້າຂາຍຢາເສບຕິດ.
