ມາຮູ້ຈັກຫົວໜ້າຄູຝຶກ U-23 ຫວຽດນາມ ພາທີມສ້າງປະຫວັດສາດ
ພາຍຫລັງທີ່ ທີມຊາດຫວຽດນາມ ກາຍເປັນທີມທຳອິດຈາກອາຊຽນທີ່ສ້າງປະຫວັດສາດຜ່ານເຂົ້າຮອບ 4 ທີມໃນບານເຕະຊີງແຊ້ມອາຊີ 2018 ຮຸ່ນອາຍຸບໍ່ເກີນ 23 ປີ ດ້ວຍການລົງສະໜາມ 4 ນັດ ຊະນະ 2 ສະເໝີ 1 ແລະ ເສຍ 1 ນັດ ຜ່ານເຂົ້າຮອບໄປພົບກັບ ທີມຊາດອີຣັກ ໃນວັນທີ 23 ມັງກອນນີ້ ເວລາ 16:00 ໂມງ. ດັ່ງນັ້ນ ມື້ນີ້ເຮົາມາຮູ້ຈັກກັບຫົວໜ້າຄູຝຶກທີມຊາດຊຸດນີ້ ຜູ້ຈຸດປະກາຍໃຫ້ກັບວົງການບານເຕະອາຊຽນກັນເລີຍ.
ພາຍຫລັງທີ່ ສະຫະພັນບານເຕະຫວຽດນາມ (VFF) ເຫັນເຖິງທິດທາງການປ່ຽນແປງ ຈຶ່ງທຸ້ມເງິນດຶງ ປາກ ຮັງ ຊໍ ຄູຝຶກຊາວ ສ.ເກົາຫລີ ປະສົບການສູງມາຮັບໜ້າທີ່ເປັນຄູຝຶກທີມຊາດຫວຽດນາມ ຮຸ່ນອາຍຸບໍ່ເກີນ 23 ປີ ໃນທ້າຍປີ 2017 ຜ່ານມາ ດ້ວຍການມາຮັບໜ້າທີ່ໃນທີມຊາດຊຸດໃຫຍ່ ແລະ ຮຸ່ນອາຍຸບໍ່ເກີນ 23 ປີ. ປາກ ຮັງ ຊໍ ເຄີຍເປັນໜຶ່ງໃນທີມງານຄະນະຄູຝຶກຊຸດທີມຊາດ ສ.ເກົາຫລີ ຄວ້າອັນດັບ 4 ໃນການແຂ່ງຂັນບານໂລກ 2002 ເຊິ່ງເປັນມືຂວາຂອງ ກຸສ ຮິດດິ້ງ.
ສຳລັບ ປາກ ຮັງ ຊໍ ເກີດເມື່ອວັນທີ 4 ມັງກອນ 1959 ປັດຈຸບັນອາຍຸ 59 ປີ ທີ່ເມືອງ Sancheong ແຂວງ Gyeongnam ສ.ເກົາຫລີ ເລີ່ມເປັນສ່ວນໜຶ່ງໃນການຄຸມທີມຂອງທີມຊາດ ສ.ເກົາຫລີ ຮຸ່ນອາຍຸບໍ່ເກີນ 23 ປີ ໃນປີ 2002 ແລະ ຄຸມທີມຊາດຫວຽດນາມທັງຊຸດໃຫຍ່ ແລະ U-23 ໃນປັດຈຸບັນ.
ສ່ວນຜົນງານໃນການຄຸມທີມກັບສະໂມສອນມີດັ່ງນີ້: ຄຸມທີມ Gyeongnam FC 2005-2007, Chunnam Dragons 2008-2010, Sangju Sangmu Phoenix 2012-2015 (ພາທີມຄວ້າແຊ້ມໄດ້ 2 ສະໄໝ ໃນປີ 2013 ກັບ 2015) ແລະ ຄຸມທີມ Changwon FC ໃນປີ 2017.
