ແມັກຄາທີ ຂາຫັກ 2 ບ່ອນ ປິດສາກລະດູການນີ້

ເອັຟເວີຕັນ ສະໂມສອນໃນ ພຣີເມຍລີກ ອັງກິດ ຢືນຢັນວ່າ: ເຈມສ໌ ແມັກຄາທີ ກອງກາງຕົວສຳຄັນໄດ້ຮັບບາດເຈັບຢ່າງຮຸນແຮງ ເຖິງຂັ້ນຂາຂວາຫັກເປັນ 2 ທ່ອນ ລະຫວ່າງການແຂ່ງຂັນໃນລີກນັດຫລ້າສຸດ ທີ່ສະເໝີກັບ ເວສບຣອມວິຊ ອັລບຽນ 1-1 ໃນວັນທີ 20 ມັງກອນນີ້.

ແມັກຄາທີ ຖືກຫາມອອກຈາກສະໜາມໃນໄລຍະເຄິ່ງຫລັງ, ຫລັງຂາຫັກຈາກຈັງຫວະທີ່ພະຍາຍາມເຂົ້າໄປສະກັດລູກຍິງຂອງ ຊາໂລມອນ ຣອນດອນ ກອງໜ້າຂອງ ເວສບຣອມ ເຊິ່ງຈາກເຫດການດັ່ງກ່າວເຮັດໃຫ້ ຣອນດອນ ເຖິງກັບຮ້ອງໄຫ້.

ຫລ້າສຸດ ເອັຟເວີຕັນ ລະບຸຜ່ານທະວິດເຕີວ່າ: ໃຈຂອງພວກເຮົາທັງໝົດຕອນນີ້ໄປຢູ່ທີ່ ເຈມສ໌ ແມັກຄາທີ ຫລັງຈາກທີ່ໄດ້ຮັບການຢືນຢັນແລ້ວວ່າ ຂາຂອງລາວຫັກເປັນ 2 ບ່ອນ ເຮັດໃຫ້ລາວຈຳຕ້ອງຢຸດການແຂ່ງຂັນທັງລະດູການນີ້ເລີຍ.