ພິຈິກາ ບຸນກວ້າງ ຜູ້ຍິງຄົນທຳອິດ ເປັນປະທານສະໂມສອນນະຄອນຫລວງ
ກາຍເປັນກະແສຮືຮາສຳລັບເລື່ອງທີ່ນາງ ພິຈິກາ ບຸນກວ້າງ ຖືກແຕ່ງຕັ້ງໃຫ້ເປັນປະທານສະໂມສອນ ນະຄອນຫລວງ ໃນວັນທີ 17 ມັງກອນນີ້ ເຮັດໃຫ້ລາວກາຍເປັນຜູ້ຍິງຄົນທຳອິດທີ່ກ້າວຂຶ້ນມາເປັນປະທານສະໂມສອນບານເຕະໃນ ສປປ ລາວ.
ອີງຕາມຂໍ້ຕົກລົງຂອງສະຫະພັນບານເຕະນະຄອນຫລວງ ເລກທີ 002/ສຕ.ນວ, ລົງວັນທີ 17 ມັງກອນ 2018 ແຕ່ງຕັ້ງນາງ ພິຈິກາ ບຸນກວ້າງ ເປັນປະທານສະໂມສອນນະຄອນຫລວງ, ທ່ານ ພຸດດາມອນ ຈັນທະລາສີ ເປັນຮອງປະທານ, ທ່ານ ນະຄອນເງິນ ສຸວັນນະລາດ ເປັນບໍລິຫານ.
ສຳລັບ ພິຈິກາ ບຸນກວ້າງ ມີສ່ວນສຳຄັນນຳພາສະໂມສອນຈາກລາວລົງແຂ່ງຂັນ ແລະ ອຸ່ນເຄື່ອງຢູ່ຕ່າງປະເທດຫລາຍລາຍການເຊັ່ນ: ນຳພາສະໂມສອນ ດີເຄ ເອັຟຊີ ເຂົ້າຮ່ວມແຂ່ງຂັນທີ່ ສປ ຈີນ, ພາ U-14 ອຸ່ນເຄື່ອງພົບກັບ ເມືອງທອງຢູໄນເຕັດ, ນະຄອນລາດສະສີມາ ເອັຟຊີ ແລະ ຍັງມີສ່ວນສຳຄັນໃນການຈັດງານ ອໍສະຕາ ເພື່ອບໍລິຈາກຊ່ວຍເຫລືອຜູ້ປະສົບໄພນ້ຳຖ້ວມ.
ໂດຍກ່ອນໜ້ານີ້ມີຂ່າວວ່າ ທ່ານ ວຽງສະຫວັນ ແສງຈັນ ປະທານສະຫະພັນບານເຕະນະຄອນຫລວງວຽງຈັນ ໄວ້ວາງໃຈໃຫ້ ພິຈິກາ ຄົນນີ້ເຂົ້າມາຮັບຕຳແໜ່ງຜູ້ຈັດການທີມຂອງສະໂມສອນ ເພື່ອກຽມລຸຍໃນເສິກ ລາວພຣີເມຍລີກ 2018, ແຕ່ຫລ້າສຸດຍົກໃຫ້ເປັນປະທານສະໂມສອນດັ່ງກ່າວຢ່າງໜ້າປະທັບໃຈ.
ເຖິງຢ່າງໃດກໍຕາມ, ນະຄອນຫລວງ ຢູໄນເຕັດ ມີລາຍງານວ່າຖອນຕົວອອກຈາກ ລາວພຣີເມຍລີກ 2017, ແຕ່ສະຫະພັນບານເຕະແຫ່ງຊາດລາວ ຍັງບໍ່ທັນອອກມາຖະແຫລງການຢ່າງເປັນທາງການວ່າ ລາວພຣີເມຍລີກ 2018 ຈະມີຈັກທີມເຂົ້າຮ່ວມແທ້ ເຊິ່ງບາງເທື່ອອາດມີໂອກາດມີແຟນບານຈະໄດ້ເຫັນປະທານຍິງຄົນນີ້ລົງສ້າງສີສັນໃນ ລາວພຣີເມຍລີກ 2018 ອາດເປັນໄດ້.
