ຕໍາຫລວດຄາດວ່າສົບຊາຍຖືກຍິງເສຍຊີວິດໃນປ່າເຂດເມືອງໄຊທານີອາດເປັນການຍິງຕົວຕາຍ
ເຈົ້າໜ້າທີ່ສືບສວນ-ສອບສວນ ປກສ ນະຄອນຫລວງວຽງຈັນ ໃຫ້ຮູ້ວ່າ: ໃນວັນທີ 18 ມັງກອນນີ້ໄດ້ຮັບແຈ້ງຈາກປະຊາຊົນວ່າ: ພົບເຫັນສົບຄົນເສຍຊີວິດ ຢູ່ປ່າເຂດບ້ານສົມສະຫວັນເມືອງໄຊທານີນະຄອນຫລວງວຽງຈັນ, ຈຶ່ງໄດ້ຮີບຮ້ອນລົງກວດກາສະຖານທີ່ເກີດເຫດ ແລະ ພົບສົບຊາຍໄວກາງຄົນຈົມກອງເລືອດ, ສະພາບສົບແມ່ນໃສ່ຊຸດວອມ, ມີຮອຍລູກປືນຍິງທີ່ຂະໝັບຂວາ ແລະ ພົບປືນໜຶ່ງກະບອກຢູ່ຂ້າງຜູ້ຕາຍ ແລະ ພາຍຫລັງສັນນະສູດສົບຜູ້ເສຍຊີວິດທາງນິຕິເວດ ຈຶ່ງຮູ້ວ່າຜູ້ເສຍຊີວິດຊື່ທ້າວ ສູນທອນ ອາຍຸ 50 ປີຢູ່ບ້ານສົມສະຫວັນເມືອງໄຊທານີ, ເປັນພະນັກງານທະຫານຊັ້ນພັນໂທ ແລະ ບໍ່ພົບຮ່ອງຮອຍການຕໍ່ສູ້ໃດໆ, ແຕ່ພົບຮອຍມືຜູ້ຕາຍເປັນຮອຍດຽວກັນກັບຢູ່ປືນ, ເບື້ອງຕົ້ນເຈົ້າໜ້າທີ່ຄາດວ່າຜູ້ກ່ຽວອາດໃຊ້ປືນຍິງໂຕເອງຕາຍ ແລະ ຕາຍມາໄດ້ປະມານ 3 ວັນ, ແຕ່ແນວໃດກໍຕາມ, ເຈົ້າໜ້າທີ່ສືບສວນ-ສອບສວນກ່ຽວກັບຄະດີການເສຍຊີວິດລາຍນີ້ເພື່ອໃຫ້ຊັດເຈນຂຶ້ນຕື່ມ.
