ແຕ່ງຕັ້ງທ່ານ ສອນທະນູ ທໍາມະວົງ ເປັນ ຫົວໜ້າສະຖາບັນວິທະຍາສາດສັງຄົມແຫ່ງຊາດຜູ້ໃໝ່

ພິທີປະກາດແຕ່ງຕັ້ງທ່ານ ສອນທະນູ ທໍາມະວົງ ກໍາມະການສູນກາງພັກ ເປັນຫົວໜ້າສະຖາບັນວິທະຍາສາດສັງຄົມແຫ່ງຊາດຜູ້ໃໝ່ແທນທ່ານ ສຸກກົງແສງ ໄຊຍະເລີດ ທີ່ເຂົ້າຮັບບໍານານ, ຕາມມະຕິຕົກລົງຂອງກໍາມະການກົມການເມືອງສູນກາງພັກ, ໄດ້ຈັດຂຶ້ນໃນວັນທີ 16 ມັງກອນນີ້, ໂດຍມີທ່ານ ກິແກ້ວ ໄຂຄໍາພິທູນ ຄະນະເລຂາທິການສູນກາງພັກເຂົ້າຮ່ວມ.

ສະຖາບັນວິທະຍາສາດສັງຄົມແຫ່ງຊາດ (ສວສຊ) ເປັນອົງການໜຶ່ງທີ່ມີບົດບາດສໍາຄັນໃນການຄົ້ນຄ້ວາວິທະຍາສາດສັງຄົມ, ນັບແຕ່ປີ 2016-2018 ນັກຄົ້ນຄວ້າຢູ່ໃນສະຖາບັນດັ່ງກ່າວໄດ້ເອົາໃຈໃສ່ຊອກຫາຂໍ້ມູນ  ຕ່າງໆ ເພື່ອມາຂຽນເປັນໂຄງການຄົ້ນຄວ້າຫລາຍກວ່າ 90 ໂຄງການ, ໃນນັ້ນໂຄງການລະດັບຊາດມີ 5 ໂຄງການ, ລະດັບສະຖາບັນວິທະຍາສາດສັງຄົມແຫ່ງຊາດມີ 31 ໂຄງການ ແລະ ລະດັບສະຖາບັນຄົ້ນຄວ້າ 54 ໂຄງການ. ໃນນັ້ນ, ສໍາເລັດ 42 ໂຄງການ, ກຳລັງດຳເນີນ 39 ໂຄງການ, ຖືກປິດແລ້ວ 7 ໂຄງການ ແລະ ໂຈະ 2 ໂຄງການ.