ມອບ-ຮັບໜ້າທີ່ເລຂາທິການ ສະຫະພັນບານເຕະແຫ່ງຊາດລາວ
ສະຫະພັນບານເຕະແຫ່ງຊາດລາວ (ສຕລ) ໄດ້ມີພິທີເຊັນບົດບັນທຶກມອບ-ຮັບວຽກງານ ລະຫວ່າງທ່ານ ໄຊບັນດິດ ຣາຊະພົນ ອະດີດເລຂາທິການສະຫະພັນບານເຕະແຫ່ງຊາດລາວ ທີ່ລາອອກຈາກຕຳແໜ່ງ ແລະ ທ່ານນາງ ຍອດແກ້ວ ພາວະດີ ຮອງເລຂາທິການສະຫະພັນບານເຕະແຫ່ງຊາດລາວ ທີ່ເຂົ້າມາຮັບໜ້າທີ່ຮັກສາການແທນ.
ພິທີດັ່ງກ່າວຈັດຂຶ້ນທີ່ຫ້ອງປະຊຸມ ສຕລ ໃນວັນທີ 15 ມັງກອນນີ້ ໂດຍການເປັນສັກຂີພິຍານຂອງທ່ານ ວີເພັດ ສີຫາຈັກ ປະທານສະຫະພັນບານເຕະແຫ່ງຊາດລາວ ພ້ອມດ້ວຍຄະນະບໍລິຫານງານ ແລະ ບັນດາຫົວໜ້າພະແນກຕ່າງໆພາຍໃນຫ້ອງການສະຫະພັນບານເຕະແຫ່ງຊາດລາວ.
ກ່ອນໜ້ານີ້, ທ່ານ ໄຊບັນດິດ ຣາຊະພົນ ໄດ້ແຈ້ງເຈດຈຳນົງໃນການລາອອກຈາກຕຳແໜ່ງຂອງຕົນເຖິງເລຂາທິການຂອງ FIFA, AFC ແລະ AFF ພາຍຫລັງປະຕິບັດໜ້າທີ່ນີ້ມາເປັນເວລາ 6 ປີ. ສ່ວນສາເຫດໃນການລາອອກຄັ້ງນີ້ ທ່ານໄດ້ເປີດເຜີຍວ່າ: ເພື່ອເປັນການເປີດໂອກາດໃຫ້ຄົນເກັ່ງໄດ້ເຂົ້າມາບໍລິຫານ. ທາງຄະນະບໍລິຫານງານ ສຕລ ມີເປົ້າໝາຍ ແລະ ຈຸດປະສົງທີ່ຈະພັດທະນາບານເຕະລາວດ້ວຍທີມງານໃໝ່ ເພື່ອບັນລຸເປົ້າໝາຍທີ່ວາງໄວ້, ສ່ວນຂ້າພະເຈົ້າກໍຈະໄດ້ຂໍເວລາໄປສຸມໃສ່ທຸລະກິດຂອງຕົນເອງຢ່າງຈິງຈັງ.
ຫລ້າສຸດໄດ້ມີການມອບ-ຮັບໜ້າທີ່ດັ່ງກ່າວແລ້ວ ໂດຍຈຸດປະສົງດັ່ງກ່າວຈັດຂຶ້ນເພື່ອປະຕິບັດຕາມການຕົກລົງເຫັນດີຂອງຄະນະບໍລິຫານງານສະຫະພັນບານເຕະແຫ່ງຊາດລາວ ແລະ ອີງຕາມຈຸດປະສົງຂໍລາອອກຈາກຕຳແໜ່ງຂອງທ່ານ ໄຊບັນດິດ ຣາຊະພົນ ເຊິ່ງທາງຄະນະບໍລິຫານງານສະຫະພັນບານເຕະແຫ່ງຊາດ ໄດ້ຕົກລົງເຫັນດີເປັນເອກະພາບມອບໃຫ້ທ່ານນາງ ຍອດແກ້ວ ພາວະດີ ຮອງເລຂາທິການ ຂຶ້ນເປັນຮັກສາການເລຂາທິການສະຫະພັນບານເຕະແຫ່ງຊາດລາວ ເຊິ່ງມີຜົນສັກສິດນັບແຕ່ວັນທີ 8 ມັງກອນ 2018 ເພື່ອຮັບປະກັນໃຫ້ວຽກງານຂອງ ສຕລ ໄດ້ສືບຕໍ່ດຳເນີນໄປຢ່າງຕໍ່ເນື່ອງ, ພ້ອມທັງຮັບປະກັນການພົວພັນລະຫວ່າງສະຫະພັນບານເຕະແຫ່ງຊາດລາວກັບ FIFA, AFC, AFF ແລະ ສະຫະພັນບານເຕະອ້ອມຂ້າງ.
