ທຳມະສັກ ຊະນະເລີດກ໊ອຟຊີງຂັນກຽດຕິຍົດ ລັດຖະມົນຕີກະຊວງສຶກສາທິການ ແລະ ກິລາ
ທ່ານ ທຳມະສັກ ບົວຫອມ ສ້າງຜົນງານໄດ້ຢ່າງໂດດເດັ່ນ ດ້ວຍການຄວ້າຂັນຊະນະເລີດ ລາຍການສະໂຕຣກເພລ ແຊັມປ້ຽນຊິບ ດິວິຊັນ ມາຄອງໄດ້ສຳເລັດ ໃນການແຂ່ງຂັນກິລາກ໊ອຟ ແດນສະຫວັນ ອາເມເຈີ ໂອເພັນ 2018 ຊີງຂັນກຽດຕິຍົດຂອງທ່ານລັດຖະມົນຕີກະຊວງສຶກສາທິການ ແລະ ກິລາ ເພື່ອສ້າງຂະບວນການຂໍ່ານັບຮັບຕ້ອນວັນສຳຄັນຂອງຊາດ ໂດຍການແຂ່ງຂັນໄດ້ຈັດຂຶ້ນໃນລະຫວ່າງວັນທີ 13-14 ມັງກອນນີ້ ທີ່ສະໜາມກ໊ອຟ ແດນສະຫວັນ ພູເຂົາຄວາຍ ແຂວງວຽງຈັນ ໂດຍມີທ່ານ ບົວລານ ສິລິປັນຍາ ຮອງລັດຖະມົນຕີກະຊວງສຶກສາທິການ ແລະ ກິລາ, ທ່ານ ດາວເຮືອງ ນັນທະວົງ ຮອງເຈົ້າແຂວງວຽງຈັນ, ທ່ານ ວັງ ຊຸນ ເຈຍ ປະທານໂຮງແຮມ ແດນສະຫວັນ ນ້ຳງື່ມຣີສອດ ເຂົ້າຮ່ວມເປັນຈຳນວນຫລາຍ.
ການແຂ່ງຂັນກ໊ອຟຄັ້ງນີ້ ເພື່ອເປັນການສົ່ງເສີມປີທ່ອງທ່ຽວລາວ 2018 ແລະ ສ້າງຂະບວນການຂໍ່ານັບຮັບຕ້ອນວັນສ້າງຕັ້ງກອງທັບປະຊາຊົນລາວ ຄົບຮອບ 69 ປີ (20 ມັງກອນ 1949 ຫາ 20 ມັງກອນ 2018) ທັງເປັນການພັດທະນາວົງການກິລາກ໊ອຟສະໝັກຫລິ້ນຂອງລາວ ແລະ ສ້າງຂະບວນການແຂ່ງຂັນກ໊ອຟອຸ່ນເຄື່ອງໃຫ້ນັກກິລາກ໊ອຟລາວ ເພື່ອກະກຽມຄວາມພ້ອມເຂົ້າຮ່ວມແຂ່ງຂັນກ໊ອຟ ໃນງານມະຫະກຳກິລາແຫ່ງຊາດ ຄັ້ງທີ 11 ທີ່ແຂວງຊຽງຂວາງ ເປັນເຈົ້າພາບໃນທ້າຍປີ 2018 ນີ້.
ການແຂ່ງຂັນແມ່ນປະກອບມີແຂ່ງຂັນແບບ Stroke Play, Net Flight A, B, C ກໍຄືຮູບແບບແຮນດີແຄັບ Net Score Division (ສາຍ ກ, ສາຍ ຂ ແລະ ສາຍ ຄ) ແລະ ສະໂຕຣກເພລ ແຊັມປ້ຽນຊິບ ດິວິຊັນ (ຊະນະເລີດ) ແມ່ນເອົາຄະແນນຂອງທັງສອງຮອບລວມກັນມາເປັນຄະແນນຂອງນັກກິລາ ເພື່ອຄິດໄລ່ຕັດສິນໃຫ້ຂັນລາງວັນ. ຜ່ານການແຂ່ງຂັນເປັນເວລາ 2 ວັນ ຜົນປາກົດວ່າ: ອັນດັບ 1 ສະໂຕຣກເພລ ແຊັມປ້ຽນຊິບ ດິວິຊັນ ໄດ້ແກ່ທ່ານ ທຳມະສັກ ບົວຫອມ, ສ່ວນ ສາຍ ກ ອັນດັບ 1 ທ່ານ ຊອຍ ແມຮົວ, ອັນດັບ 2 ທ່ານ ຊອງຮາເທັກ ແລະ ອັນດັບ 3 ທ່ານ ເຊັກໄກ້ ພົມມະສານ; ສາຍ ຂ ອັນດັບ 1 ທ່ານ ສິນນຳຄູນ, ອັນດັບ 2 ທ່ານ ນິປິນ ແລະ ອັນດັບ 3 ທ່ານ ຊອຍ ຢຸງຊູນ; ສາຍ ຄ ອັນດັບ 1 ທ່ານ ສຸດທິພົນ ໄຊຍະວົງສອນ, ອັນດັບ 2 ທ່ານ ຣັດຊະຕະ ສິຣິມູນ ແລະ ອັນດັບ 3 ທ່ານ ຢູຈຽວ ມິງ.
