ສໍາເລັດກອງປະຊຸມວຽກງານກວດກາ ປະຈໍາປີ 2017
ກອງປະຊຸມສະຫຼຸບວຽກງານກວດກາທົ່ວປະເທດ ປະຈໍາປີ 2017, ໄດ້ສໍາເລັດລົງດ້ວຍຜົນອັນຈົບງານໃນວັນທີ 12 ມັງກອນນີ້, ທີ່ຫ້ອງການຄະນະກວດກາສູນກາງພັກ ພາຍຫຼັງດໍາເນີນມາ 2 ວັນ, ໂດຍການເປັນປະທານຂອງທ່ານ ບຸນທອງ ຈິດມະນີ ຮອງນາຍົກລັດຖະມົນຕີ, ປະທານກວດກາສູກກາງພັກ, ປະທານກວດກາລັດຖະບານ, ຫົວໜ້າອົງການຕ້ານການສໍ້ລາດບັງຫຼວງ. ມີຄະນະພັກຄະນະກວດກາສູນກາງພັກ-ອົງການກວດກາລັດຖະ ບານເຂົ້າຮ່ວມ.
ໃນກອງປະຊຸມດັ່ງກ່າວ, ທ່ານສີໃນ ມຽງລາວັນ, ຮອງປະທານຄະນະກວດກາສູນກາງພັກ, ຮອງປະທານອົງການກວດກາລັດຖະ ບານ, ໄດ້ຍົກໃຫ້ເຫັນວ່າ: 1 ປີຜ່ານມາ ຄະນະກວດກາພັກ-ອົງການກວດກາລັດແຕ່ລະຂັ້ນໄດ້ສຸມໃສ່ຈັດຕັ້ງປະຕິບັດວຽກງານກວດກາຕາມພາລະບົດບາດ, ໜ້າທີ່ຂອງຕົນ ເປັນຕົ້ນແມ່ນການ ຄົ້ນຄວ້າ-ປັບປຸງ ແລະ ສ້າງນິຕິກໍາກ່ຽວກັບວຽກງານກວດກາຄື: ສໍາເລັດການປັບປຸງກົດໝາຍວ່າດ້ວຍການກວດກາລັດ, ມະຕິຂອງກົມການເມືອງສູນກາງພັກ ວ່າດ້ວຍການຈັດຕັ້ງ ແລະ ເຄື່ອນໄຫວຂອງຄະນະກວດກາສູນກາງພັກ, ດໍາລັດວ່າດ້ວຍການຈັດຕັ້ງ ແລະ ເຄື່ອນໄຫວຂອງອົງການກວດກາລັດຖະບານ, ບົດແນະນໍາວ່າດ້ວຍການແຈ້ງຊັບສິນສະບັບປັງປຸງ, ບົດແນະນໍາວ່າດ້ວຍການປັບປຸງກົງຈັກການຈັດຕັ້ງຂອງຄະນະກວດກາແຕ່ລະຂັ້ນ, ບົດແນະນໍາກ່ຽວກັບສິດຕົກລົງວິໄນ, ຂໍ້ກໍານົດວ່າດ້ວຍການຕິດຕາມ-ກວດກາການປະຕິບັດຜົນການກວດກາ, ບົດແນະນໍາວ່າດ້ວຍການດໍາເນີນຄະດີການສໍ້ລາດບັງຫຼວງ. ນອກຈາກນີ້, ອົງການກວດກາລັດຖະບານແຕ່ລະຂັ້ນໄດ້ຕິດຕາມ-ກວດກາການປະຕິບັດພາລະບົດບາດ, ໜ້າທີ່ຂອງອົງການບໍລິຫານໄດ້ທັງໝົດ 578 ເປົ້າໝາຍ ພົບເຫັນຜົນເສຍຫາຍທັງໝົດ 1.336 ຕື້ກວ່າກີບ, 6,33 ລ້ານບາດໄທ, 4,82 ລ້ານໂດລາສະຫະລັດ ແລະ 20 ລ້ານດົງຫວຽດນາມ, ເກັບກູ້ຄືນໄດ້ແລ້ວຫຼາຍກວ່າ 769 ຕື້ກີບ, 956.500 ບາດໄທ, 1,21 ລ້ານໂດລາສະຫະລັດ ແລະ 20 ລ້ານດົງ.
ໃນໂອກາດດັ່ງກ່າວ ທ່ານ ບຸນທອງ ຈິດມະນີ ໄດ້ໂອ້ລົມແນະນໍາໃຫ້ຄະນະພັກ, ຄະນະນໍາແຕ່ລະຂັ້ນເອົາໃຈໃສ່ ຕິດຕາມ-ກວດກາການເກັບລາຍຮັບເຂົ້າງົບປະມານ, ການຄຸ້ມຄອງລາຍຈ່າຍຂອງກະຊວງ-ອົງການ ແລະ ທ້ອງຖິ່ນລວມທັງການຊ່ວຍເຫຼືອບັນເທົາທຸກ ຕ່າງໆບໍ່ໃຫ້ມີສະພາບຮົ່ວໄຫຼ, ຈ່າຍໃຫ້ຖືກເປົ້າໝາຍ ແລະ ແທດເຖິງຕົວຈິງ, ຮັບປະກັນການປະຕິບັດນະໂຍບາຍປະຢັດແຫ່ງຊາດ ແລະ ເອົາໃນໃສ່ຕິດຕາມ-ກວດກາໂຄງການລົງທຶນຂອງລັດ ແລະ ການຊໍາລະໜີ້ສິນຕ່າງໆ, ປະຕິບັດມາດຕະການກວດກາເລີ່ມຕົ້ນແຕ່ຫົວທີ ຕໍ່ການປະຕິບັດໂຄງການລົງທຶນຂອງລັດ, ຕິດຕາມ-ກວດກາການໃຫ້ສໍາປະທານທີ່ດິນ, ຄຸ້ມຄອງກິດຈະການຕ່າງໆທີ່ລັດຖະບານໄດ້ອະນຸມັດໄປແລ້ວ ໃຫ້ດໍາເນີນໄປຖືກຕ້ອງຕາມລະບຽບ-ກົດໝາຍ ແລະ ເອົາໃຈໃສ່ຕິດຕາມກວດກາການຈັດຕັ້ງປະຕິບັດຄໍາສັ່ງ ເລກທີ 15/ນຍ ເປັນຕົ້ນການຄຸ້ມຄອງປ່າໄມ້ ແລະ ທຸລະກິດໄມ້ ແລະ ບັນຫາອື່ນໆທີ່ເປັນປະກົດການຫຍໍ້ທໍ້ໃຫ້ເຂັ້ມງວດຕາມຂໍ້ກໍານົດກົດໝາຍທີ່ໄດ້ວາງອອກ, ສືບຕໍ່ຕິດຕາມ-ກວດກາຜົນການກວດສອບ ທີ່ອົງການກວດສອບສະເໜີ ແລະ ຕາມການຮັບຮອງຂອງສະພາແຫ່ງຊາດ, ສ້າງກົນໄກການປະສານງານລະຫວ່າງ ອົງການກວດກາລັດຖະບານ ແລະ ອົງການກວດສອບແຫ່ງລັດ ໃຫ້ມີຜົນສໍາເລັດຫຼາຍຂຶ້ນກວ່າເກົ່າ.
