ຍິງປືນລາວ ວາງແຜນຈັດແຂ່ງຂັນ 7 ລາຍການ ເລືອກເຟັ້ນນັກຍິງປືນທີມຊາດ ຮ່ວມຊີເກມທີ່ຟີລິບປິນ

ໃນປີ 2018 ສະໂມສອນຍິງປືນ ໄອພີເອັມຊີລາວ ສະຫະພັນຍິງປືນແຫ່ງຊາດລາວ ວາງແຜນຈະຈັດການແຂ່ງຂັນຍິງປືນສັ້ນມາດຕະຖານ ແລະ ປືນໄອພີເອັສຊີ ພາຍໃນປະເທດໃຫ້ໄດ້ເຖິງ 7 ລາຍການ ເພື່ອເປັນການເລືອກເຟັ້ນຫານັກກິລາຍິງປືນດີເດັ່ນເຂົ້າຮ່ວມແຂ່ງຂັນກິລາຍິງປືນ ງານມະຫະກຳກິລາຊີເກມ ຄັ້ງທີ 30 ທີ່ປະເທດຟີລິບປິນ ຮັບກຽດເປັນເຈົ້າພາບໃນປີ 2019.

ຕາມການໃຫ້ສຳພາດຂອງທ່ານ ພຸດທະສັກ ສຸກອາລຸນ ປະທານສະໂມສອນຍິງປືນ ໄອພີເອັສຊີລາວ ໃຫ້ຮູ້ວ່າ: ຕະຫລອດໄລຍະການເຄື່ອນໄຫວຈັດການແຂ່ງຂັນກິລາຍິງປືນພາຍໃນ ແລະ ສົ່ງເຂົ້າຮ່ວມແຂ່ງຂັນຢູ່ຕ່າງປະເທດຫລາຍລາຍການ ແລະ ສາມາດສະຫລຸບຕີລາຄາບັນຫາຂໍ້ຄົງຄ້າງ ແລະ ບັນຫາທີ່ພົ້ນເດັ່ນຫລາຍດ້ານ ເປັນຕົ້ນແມ່ນ ສປປ ລາວ ໄດ້ຮັບກຽດເປັນເຈົ້າພາບຈັດການແຂ່ງຂັນກິລາຍິງປືນ ເລໂວ 3 ຊີງແຊ້ມນາໆຊາດ ໄດ້ເຖິງ 2 ຄັ້ງ, ຈັດການແຂ່ງຂັນຍິງປືນ ໄອພີເອັສຊີ ເລໂວ 2 ພາຍໃນເຖິງ 5 ຄັ້ງ, ສົ່ງນັກກິລາຍິງປືນ ໄອພີເອັສຊີ ທີມຊາດລາວ 2 ຄົນ ຄື ສິງຄຳ ສີປະເສີດ ແລະ ອາໂນໄທ ເມືອງມະນີ ຕາງໜ້າທີມຊາດລາວ ເຂົ້າຮ່ວມການແຂ່ງຂັນຍິງປືນ ໄອພີເອັສຊີ ຊີງແຊ້ມໂລກ ທີ່ປະເທດຝຣັ່ງ ແຕ່ບໍ່ສາມາດສ້າງຜົນງານໄດ້ອັນດັບທີ່ດີ ຍ້ອນລາຍການດັ່ງກ່າວມີນັກກິລາທີ່ມີປະສົບການລະດັບໂລກຮ່ວມຊີງໄຊຫລາຍຄົນ. ແຕ່ເຖິງຢ່າງໃດກໍດີ, ໃນລາຍການຊີງແຊ້ມເອເຊຍ ແປຊີຟິກ ເອັກຕິມ ໂອເພັນ ເວີລເອັກຕິມ ຄັບ ລະຫວ່າງວັນທີ 7-9 ທັນວາ 2017 ທີ່ແຂວງພັດທະຍາ ປະເທດໄທ ເປັນເຈົ້າພາບ ຜ່ານມາ ມີນັກກິລາຍິງປືນ ໄອພີເອັສຊີ ລະດັບທ໊ອບໃນທົ່ວໂລກ 600 ກວ່າຄົນ ຈາກ 36 ປະເທດເຂົ້າຮ່ວມ ໃນນີ້ສະເພາະສະໂມສອນຍິງປືນ ໂອພີເອັສຊີລາວ ໄດ້ສົ່ງນັກກິລາທີມຊາດເຂົ້າຮ່ວມ 11 ຄົນ ຍິງ 2 ຄົນ ແລະ ມີການຊີງໄຊກັນເຖິງ 6 ລາຍການ ຄືປະເພດປືນໂປດັກຊັນ, ສະແຕນດາດ, ຣີໂວເວີ, ຄລາສສິກ, ໂອເພັນ ແລະ ໂປດັກຊັນ ອ໊ອຟຕິກ ແຂ່ງຂັນທັງໝົດ 30 ສະໜາມ ແຕ່ມື້ແຂ່ງຂັນມື້ລະ 10 ສະໜາມ, ສະໜາມໜຶ່ງນັກກິລາ 1 ຄົນ ສາມາດຍິງໄດ້ 21 ນັດ ແລະ ນັກກິລາລາວເຮົາກໍສາມາດສ້າງຜົນງານໄດ້ອັນດັບທີ່ດີຈາກປະເພດປືນໂປດັກຊັນ ຊີເນ່ຍ ຮຸ່ນອາຍຸ 50 ປີ ຂອງທ່ານ ສຸນັນ ວັດສະລະບູນ, ທ້າວ ຫົງພະຈັນ ດາລາວົງ ຍາດໄດ້ອັນດັບທີ 19 ປະເພດປືນສະແຕນດາດ ຮຸ່ນທົ່ວໄປ ແລະ ນາງ ກົງຄຳ ບົວແສງພະຈັນ ເຈົ້າຂອງຫລຽນຄຳ ຍິງປືນເລໂວ 3 ທີ່ລາວເປັນເຈົ້າພາບ ຈັດຄັ້ງທີ 2 ກໍສາມາດຍາດໄດ້ອັນດັບທີ 8 ປະເພດປືນໂປດັກຊັນຍິງ ຮຸ່ນທົ່ວໄປ.

ທ່ານ ພຸດທະສັກ ສຸກອາລຸນ ກ່າວອີກວ່າ: ທຸກໆການເຄື່ອນໄຫວເມື່ອໄດ້ລົງທຶນໄປຫລາຍແລ້ວຈະຢຸດບໍ່ໄດ້. ສະນັ້ນ ຕ້ອງສືບຕໍ່ຈັດຕັ້ງປະຕິບັດແຜນການເຄື່ອນໄຫວຕ່າງໆໃນການຈັດຍິງປືນ ໄອພີເອັສຊີ ເລໂວ 1 ເພື່ອສ້າງໂອກາດໃຫ້ນັກກິລາຮຸ່ນໃໝ່ໄດ້ເຂົ້າຮ່ວມແຂ່ງຂັນ ເພື່ອສະສົມຄະແນນ, ເດືອນມິຖຸນາ ແຂ່ງຂັນຍິງປືນ ໄອພີເອັສຊີ ເລໂວ 2 ເລືອກເຟັ້ນນັກກິລາດີເດັ່ນ, ເດືອນສິງຫາ ສືບຕໍ່ແຂ່ງຂັນຍິງປືນ ໄອພີເອັສຊີ ເລໂວ 2 ຄັດເລືອກນັກກິລາ, ເດືອນຕຸລາ ຈະຈັດແຂ່ງຂັນຍິງປືນ ເລໂວ 3 ຊີງແຊ້ມນາໆຊາດ ກ່ອນຈະປະກາດຕົວນັກກິລາ ໄອພີເອັສຊີ ທີມຊາດລາວ ຕົວຈິງເປັນຕົວແທນຄົນລາວເຂົ້າຮ່ວມງານມະຫະກຳກິລາຍິງປືນ ໄອພີເອັສຊີ ຊີເກມ ຄັ້ງທີ 30 ທີ່ປະເທດຟີລິບປິນ ຮັບກຽດເປັນເຈົ້າພາບໃນປີ 2019.