ສູ້ເຕັມທີ່ແລ້ວ ! ນັກເຕັນນິດເຍົາວະຊົນລາວ ຕົກຮອບ 16 ຄົນສຸດທ້າຍ ແຕ່ປະເພດຄູ່ສາມາດເຂົ້າເຖິງຮອບ 8 ຄູ່ສຸດທ້າຍ

ການແຂ່ງຂັນເຕັນນິດຊິງແຊ້ມເຍົາວະຊົນນາໆຊາດ U14 ປີ ທີ່ໂຮ່ຈີມິ​ງ ສສ ຫວຽດນາມ ໃນວັນທີ10 ມັງກອນ 2018 ນາງ ມະໄລລັກ ປະທຸມມາກູໂຣເນນ ແລະ ທ້າວ ລັດຕະນະສິນ ລັດຕະນະວົງ 2 ນັກເຕັນນິດເຍົາວະຊົນຈາກລາວ ໄດ້ສືບຕໍ່ລົງແຂ່ງຂັນປະເພດຍິງດ່ຽວ ແລະ ຊາຍດ່ຽວ ໃນຮອບ 16 ຄົນສຸດທ້າຍ ໂດຍປະເພດຍິງດ່ຽວ ຮອບ 16 ຄົນສຸດທ້າຍ: ມະໄລລັກ ປະທຸມມາກູໂຣເນນ ພົບກັບ M. Safi ມື 2 ຂອງລາຍການຈາກອີຣານ (Iran) ຊຶ່ງ ມະໄລລັກ ຕ້ານຄວາມແຂງແກ່ນຂອງ M. Safi ບໍ່ໄຫວ ເສຍ 0-2 ເຊັດ: 2-6 ແລະ 5-7. ຂະນະທີ່ ປະເພດຊາຍດ່ຽວ ຮອບ 16 ຄົນສຸດທ້າຍ ລັດຕະນະສິນ ລັດຕະນະວົງ ມືວາງວັນອັນດັບ 9 ຂອງລາຍການ ເສຍໃຫ້ M. Ayombekov ຈາກທາຈີກິສະຖານ (Tajikistan) ມືວາງອັນດັບ 7 ຂອງລາຍການ 1-2 ເຊັດ 6-3, 1-6 ແລະ 0-6. ແຕ່ປະເພດຄູ່ຍິງ ແລະ ຄູ່ຊາຍຂອງລາວ ສາມາດເຂົ້າເຖິງຮອບ 8 ຄູ່ສຸດທ້າຍ, ປະເພດຄູ່ຍິງ ຮອບ 16 ຄູ່ສຸດທ້າຍ ມະໄລລັກ ປະທຸມມາກູໂຣເນນ ຈາກ ສປປ ລາວ ຈັບຄູ່ກັບ Nomin Khurelbaatar ຈາກມົງໂກລີ (Mongolia) ເອົາຊະນະ M. Chogsomjav ແລະ Yesugen Ganbaatar ສອງນັກກິລາຈາກມົງໂກລີ (Mongolia) 2-1 ເຊັດ 6-3, 4-6 ແລະ 10-7 ເຂົ້າຮອບ 8 ຄູ່ສຸດທ້າຍ ພົບກັບ Adeya Isabekova ຈາກກຽກກີສະຖານ (Kyrgyzstan) ທີ່ຈັບຄູ່ກັບ Maha Said ຈາກປາກິດສຖານ (Pakistan) ແຂ່ງຂັນວັນ​ທີ 11 ມັງກອນ 2018 ເວລາ 13:00. ສ່ວນປະເພດຄູ່ຊາຍ ຮອບ 16 ຄູ່ສຸດທ້າຍ ລັດຕະນະສິນ ລັດຕະນະວົງ ຄູ່ກັບ ເພັດນາສອນ ໄຊຍະເດດ ຈາກ ສປປ ລາວ ຊະນະ Tandin Penjor ຈາກບູຖານ (Bhutan) ທີ່ຈັບຄູ່ກັບ Z. Zaw Lin Htun ຈາກມຽນມາ 2-0 ເຊັດ: 6-1, 7-6 (7/5) ເຂົ້າຮອບ 8 ຄູ່ສຸດທ້າຍ ພົບກັບ ຄູ່ມື 1 ຂອງລາຍການຈາກຫວຽດນາມ.