ເດືອນມີນາອຸປະຕິເຫດຫລຸດລົງແຕ່ຜູ້ເສຍຊີວິດເພີ່ມຂຶ້ນ

ເຈົ້າໜ້າທີ່ພະແນກຈະລາຈອນນະຄອນຫລວງວຽງຈັນ ລາຍງານໃຫ້ຮູ້ວ່າ: ເດືອນມີນາຜ່ານມາມີອຸປະຕິເຫດເກີດຂຶ້ນທັງໝົດ 138 ກໍລະນີ ແລະ ມີຜູ້ເສຍຊີວິດ 26 ຄົນ, ທຽບໃສ່ເດືອນຜ່ານມາຫລຸດລົງ 4 ກໍລະນີ, ແຕ່ຕົວເລກຜູ້ເສຍຊີວິດໄດ້ເພີ່ມຂຶ້ນ 7 ຄົນ ແລະ ໃນນັ້ນເມືອງໄຊທານີເປັນເມືອງມີອຸປະຕິເຫດເກີດຂຶ້ນຫລາຍກວ່າໝູ່, ໂດຍສະເພາະຢູ່ເສັ້ນທາງ 450 ປີ, ເສັ້ນທາງເລກ 13 ໃຕ້, ເສັ້ນທາງທ່າງ່ອນ. ສາເຫດຕົ້ນຕໍຂອງການເກີດອຸປະຕິເຫດແມ່ນມາຈາກການຂັບຂີ່ລົດໄວເກີນກໍານົດ, ເມົາແລ້ວຂັບຂີ່, ບໍ່ເຄົາລົບລະບຽບຈະລາຈອນ, ສະພາບເຕັກນິກລົດບໍ່ຮັບປະກັນ, ເສັ້ນທາງບໍ່ໄດ້ມາດຕະຖານ ແລະ ອື່ນໆ. ສະນັ້ນເພື່ອຮັບປະກັນໃຫ້ການໃຊ້ລົດໃຊ້ຖະໜົນມີຄວາມເປັນລະບຽບຮຽບຮ້ອຍ ແລະ ປອດໄພ, ໂດຍສະເພາະໃນໄລຍະສະຫລອງປີໃໝ່ນີ້ຂໍໃຫ້ນັກຂັບຂີ່ທຸກຄົນຈົ່ງປະຕິບັດກົດລະບຽບຈະລາຈອນໃຫ້ເຂັ້ມງວດ, ໂດຍສະເພາະບໍ່ຂັບຂີ່ລົດໄວ, ໝັ່ນກວດກາສະພາບເຕັກນິກລົດໃຫ້ມີສະພາບດີ ແລະ ອັນສໍາຄັນເມື່ອດື່ມສິ່ງມື່ນເມົາແມ່ນບໍ່ຄວນຂັບຂີ່ໂດຍເດັດຂາດ ເພື່ອຫລີກລ່ຽງສິ່ງບໍ່ເພິ່ງປາດຖະໜາຕາມມາ.