ຜົນການວິໄຈ ໂຣນັລໂດ ມີຄ່າຕົວແພງສຸດອັນດັບ 49 ສ່ວນ ເນມາ-ເມສຊີ-ເຄນ ຄອງເບີ 1-2-3
ເມື່ອຜົນວິໄຈຈາກ Football Observatory ແຫ່ງສູນນາໆຊາດ ເພື່ອການສຶກສາດ້ານກິລາ ຫລື CIES ຍົກໃຫ້ ເນມາ, ລິໂອເນລ ເມສຊີ ແລະ ແຮຣີ ເຄນ ເປັນນັກເຕະທີ່ມີຄ່າຕົວແພງທີ່ສຸດອັນດັບ 1, 2 ແລະ 3 ຕາມລຳດັບ, ສ່ວນ ຄຣິສເຕຍໂນ ໂຣນັລໂດ ກອງໜ້າຂອງ ຣີລ ມາດຣິດ ເຈົ້າຂອງລາງວັນໝາກບານຄຳຄົນຫລ້າສຸດ ຢູ່ອັນດັບ 49.
ຜົນການວິໄຈລະບຸວ່າ: ເນມາ ຢູ່ອັນດັບ 1 ມີຄ່າຕົວ 213 ລ້ານເອີໂຣ, ເມສຊີ ອັນດັບ 2 ມີຄ່າຕົວ 202,2 ລ້ານເອີໂຣ ແລະ ເຄນ ອັນດັບ 3 ມີຄ່າຕົວ 194,7 ລ້ານເອີໂຣ. ຂະນະທີ່ ໂຣນັລໂດ ທີ່ຫາກໍຄວ້າລາງວັນໝາກບານຄຳ ຫລື ບັນລັງດໍ ສະໄໝທີ 5 ພັດໄດ້ຮັບຄ່າຕົວຢູ່ອັນດັບ 49 ດ້ວຍຄ່າຕົວ 80,4 ລ້ານເອີໂຣ ເທົ່ານັ້ນ.
ສ່ວນອັນດັບ 4 ເປັນຂອງ ຄີລິຢັນ ເອັມບັບເປ ຈາກປາຣີສ ແຊັງແຊກແມງ ມີຄ່າຕົວ 192,5 ລ້ານເອີໂຣ ແລະ ອັນດັບ 5 ເປົາໂລ ດີບາລາ ຈາກຢູເວນຕຸສ ມີຄ່າຕົວ 174,6 ລ້ານເອີໂຣ.
