ອີຣານຫ້າມສອນພາສາອັງກິດ ໃນລະດັບປະຖົມສຶກສາ
ກະຊວງສຶກສາທິການຂອງອີຣານຫ້າມການຮຽນ-ການສອນພາສາອັງກິດໃນລະດັບປະຖົມສຶກສາ ເພາະເປັນຊ່ອງທາງໃຫ້ເກີດ “ການຄອບງຳ” ຂອງວັດທະນະທຳຈາກຕາເວັນຕົກ ໂດຍໃຫ້ເລີ່ມສອນນັບແຕ່ມັດທະຍົມເປັນຕົນໄປເທົ່ານັ້ນ.
ສຳນັກຂ່າວຕ່າງປະເທດລາຍງານຈາກນະຄອນຫລວງເຕຮາລານ ປະເທດອີຣານ ໃນວັນທີ 9 ມັງກອນວ່າ: ທ່ານ ເມດີ ນາວິດ-ອັດຮາມ ເລຂາທິການສະພາການສຶກສາສູງສຸດ ກ່າວກັບສຳນັກຂ່າວຟາສນິວ ເຊິ່ງເປັນສຳນັກຂ່າວເຄິ່ງທາງການຂອງລັດຖະບານເຕຮາລານ ໃນທ້າຍອາທິດຜ່ານມາວ່າ: ການຮຽນ-ການສອນ “ພາສາຕ່າງປະເທດ” ໃນໂຮງຮຽນປະຖົມສຶກສາທັງຂອງລັດ ແລະ ຂອງເອກະຊົນ “ບໍ່ໄດ້ຮັບອະນຸຍາດອີກຕໍ່ໄປ” ແລະ ຖ້າໂຮງຮຽນປະຖົມສຶກສາແຫ່ງໃດກໍຕາມຈັດການຮຽນ-ການສອນພາສາຕ່າງປະເທດ ນອກເໜືອຈາກເວລາຮຽນປົກກະຕິ “ຖືວ່າຜິດກົດໝາຍ” ເຊັ່ນກັນ ໂດຍພາສາຕ່າງປະເທດຕາມຄຳກ່າວຂອງທ່ານ ອັດຮາມ ນັ້ນ ໝາຍເຖິງ “ພາສາອັງກິດ”.
https://www.youtube.com/watch?v=fO7Ou2vwla0
ເຖິງຢ່າງໃດກໍຕາມ, ມາດຕະການຫ້າມດັ່ງກ່າວບໍ່ມີຜົນຕໍ່ຫລັກສູດໃນລະດັບມັດທະຍົມສຶກສາ ແລະ ສະຖາບັນສອນພາສາຂອງເອກະຊົນທີ່ຢູ່ນອກຫລັກສູດຂອງລັດຖະບານຢູ່ແລ້ວ. ຂະນະທີ່ກະຊວງສຶກສາທິການອອກຖະແຫລງການຊີ້ແຈງກ່ຽວກັບນະໂຍບາຍນີ້ວ່າ: ເພື່ອປ້ອງກັນ “ການຮຸກຮານ” ແລະ “ການຄອບງຳ” ຂອງວັດທະນະທຳຈາກຕາເວັນຕົກ.
