ປີ 2018 ລາວຈະສູ້ຊົນໃຫ້ GDP ຂະຫຍາຍຕົວຢູ່ໃນລະດັບ 7% ຈາກ 6,8% ໃນປີ 2017
ແຜນພັດທະນາເສດຖະກິດ-ສັງຄົມລາວເຮົາໃນປີ 2018 ນີ້ ຈະສູ້ຊົນໃຫ້ລວມຍອດຜະລິດຕະພັນພາຍໃນ (GDP) ຂະຫຍາຍຕົວເພີ່ມເປັນ 7% ຈາກ 6,8% ໃນປີ 2017 ແລະ ສະເລ່ຍລາຍຮັບຕໍ່ຫົວຄົນໃຫ້ໄດ້ 2.536 ໂດລາສະຫະລັດ, ໃນນັ້ນຂະແໜງກະສິກຳໃຫ້ເພີ່ມຂຶ້ນ 2,8% ກວມເອົາປະມານ 15,73% ຂອງ GDP, ອຸດສາຫະກຳເພີ່ມຂຶ້ນ 9,1% ກວມເອົາປະມານ 30,79% ຂອງ GDP, ການບໍລິການເພີ່ມຂຶ້ນ 6,4% ກວມເອົາປະມານ 41,83% ຂອງ GDP, ພາສີ-ອາກອນ ແລະ ການນຳເຂົ້າເພີ່ມຂຶ້ນ 9% ກວມເອົາປະມານ 11,80% ຂອງ GDP ໂດຍຄາດວ່າຂະແໜງອຸດສາຫະກຳ ແລະ ການບໍລິການຈະເປັນຂະແໜງການຫລັກທີ່ຈະກະຕຸກຊຸກຍູ້ໃຫ້ເສດຖະກິດປະເທດເຮົາຂະຫຍາຍຕົວ ໂດຍສະເພາະແມ່ນພາກການກໍ່ສ້າງຈະເພີ່ມສູງຂຶ້ນປະມານ 20% ທຽບກັບປີຜ່ານມາ ຍ້ອນມີກິດຈະກຳໃຫຍ່ໆຫລາຍຢ່າງ ດັ່ງໂຄງການກໍ່ສ້າງເສັ້ນທາງລົດໄຟ ລາວ-ຈີນ, ໂຄງການໄຟຟ້ານ້ຳຂອງແຂວງໄຊຍະບູລີ, ດອນສະໂຮງ, ນ້ຳທາ 1, ນ້ຳງຽບ 1, ເຂື່ອນເຊປຽນ-ເຊນ້ຳນ້ອຍ, ເຂື່ອນນ້ຳອູ 1, 3, 4, 7 ແລະ ເຂື່ອນໄຟຟ້າຂະໜາດນ້ອຍອື່ນໆອີກ ແລະ ພ້ອມນັ້ນກໍມີເຂື່ອນໄຟຟ້າຈຳນວນ 11 ແຫ່ງທີ່ຈະເລີ່ມຕົ້ນຜະລິດກະແສໄຟຟ້າໃນປີ 2018 ນີ້, ຮອງລົງມາແມ່ນຂະແໜງບໍລິການ ເປັນຕົ້ນແມ່ນການຄ້າ, ກິດຈະການທີ່ພັກອາໄສ ແລະ ຮ້ານອາຫານຈະເພີ່ມຂຶ້ນປະມານ 8,5%, ພິເສດແມ່ນປີ 2018 ເປັນປີທ່ອງທ່ຽວລາວ ຄາດວ່າຈະມີນັກທ່ອງທ່ຽວເຂົ້າມາລາວເພີ່ມຂຶ້ນປະມານ 6%.
