ສປຊ ຈັດສັນເງິນສຸກເສີນສູງສຸດ ເປັນປະຫວັດສາດຊ່ວຍເຢເມນ
ກອງທຶນສຸກເສີນຂອງສະຫະປະຊາຊາດຈັດສັນງົບປະມານສູງສຸດເປັນປະຫວັດສາດ 50 ລ້ານໂດລາສະຫະລັດ ເພື່ອຊ່ວຍເຫລືອຊາວເຢເມນ.
.@UNCERF releases largest- ever single allocation to meet rapidly growing humanitarian needs in #Yemen. $50M will bring urgent aid to millions of people caught up in one of the world’s worst catastrophes. Read more: https://t.co/LPCsmzJ5hv pic.twitter.com/UVWD9GXfbn
— CERF – The UN's emergency fund (@UNCERF) January 5, 2018
ສຳນັກຂ່າວຕ່າງປະເທດລາຍງານຈາກນະຄອນນິວຢອກ ປະເທດສະຫະລັດອາເມລິກາ ໃນວັນທີ 7 ມັງກອນວ່າ: ສຳນັກງານເພື່ອການປະສານງານດ້ານມະນຸດສະທຳແຫ່ງສະຫະປະຊາຊາດ (OCHA) ອອກຖະແຫລງການໃນວັນທີ 5 ມັງກອນ ຈັດຕັ້ງກອງທຶນຕອບສະໜອງສຸກເສີນສ່ວນກາງ ມູນຄ່າ 50 ລ້ານໂດລາສະຫະລັດ ເພື່ອຈັດສັນການຊ່ວຍເຫລືອດ້ານມະນຸດສະທຳໃຫ້ແກ່ຊາວເຢເມນ. ຖືເປັນງົບປະມານສຸກເສີນດ້ານມະນຸດສະທຳມູນຄ່າສູງສຸດເປັນປະຫວັດສາດ ທີ່ ສປຊ ຈັດສັນຈາກກອງທຶນສຸກເສີນ ເພື່ອນຳໄປຊ່ວຍເຫລືອລັດໃດລັດໜຶ່ງໃນໂລກ.
ຂະນະດຽວກັນ, ຖະແຫລງການຂອງ ສປຊ ຍັງຮຽກຮ້ອງໃຫ້ອາຣັບບີ ຊາອຸດິດ “ຍົກເລີກ” ການປິດກັ້ນຊາຍແດນທັງທາງບົກ, ທາງທະເລ ແລະ ທາງອາກາດ ໃນພື້ນທີ່ຍຶດຄອງຂອງກຸ່ມກະບົດຮູຕີ “ແບບບໍ່ມີເງື່ອນໄຂ” ໂດຍເຕືອນວ່າເຖິງວ່າລັດຖະບານຣິຍາດ ແລະ ພັນທະມິດຈະຫລຸດຜ່ອນມາດຕະການປິດກັ້ນໃນທ້າຍເດືອນພະຈິກຜ່ານມາ, ແຕ່ຫລາຍຝ່າຍຢືນຢັນວ່າ “ຍັງບໍ່ພຽງພໍ” ພ້ອມທັງເນັ້ນວ່າ: ອາຣັບບີ ຊາອຸດິດ ແລະ ພັນທະມິດ ກຳລັງຈະເຮັດໃຫ້ຊາວເຢເມນທົ່ວປະເທດທີ່ມີປະມານ 22 ລ້ານຄົນ ຕ້ອງເສຍຊີວິດຈາກສະພາບອຶດຫິວ ແລະ ພະຍາດລະບາດ ໂດຍພະຍາດອະຫິວາຂ້າຊີວິດຊາວເຢເມນແລ້ວຫລາຍກວ່າ 2.000 ຄົນໃນປີ 2017. ນອກເໜືອຈາກຈຳນວນຜູ້ເສຍຊີວິດຫລາຍກວ່າ 10.000 ຄົນ ຈາກສົງຄາມທີ່ເກີດຂຶ້ນ ເມື່ອອາຣັບບີ ຊາອຸດິດ ແລະ ພັນທະມິດ ເຂົ້າແຊກແຊງໃນເດືອນມີນາ 2015.
