ນັກກິລາຍິງປືນທີມຊາດລາວກຽມເຂົ້າຮ່ວມ ລາຍການໃນປີ 2018 ຫວັງສ້າງຜົນງານໃຫ້ຊາດ
ນັກກິລາຍິງປືນທີມຊາດລາວ ກຽມເຂົ້າຮ່ວມລາຍການໃນປີ 2018 ແນໃສ່ສົ່ງເສີມສ້າງປະສົບການໃຫ້ມີບາດກ້າວທີ່ພົ້ນເດັ່ນກວ່າເກົ່າ ດ້ວຍການເຂົ້າຮ່ວມແຂ່ງຂັນຊີງແຊ້ມລາຍການລະດັບນາໆຊາດໃນລະດັບພາກພື້ນ ແລະ ສາກົນ ເພື່ອຫວັງຈະສ້າງຜົນງານ ແລະ ຊື່ສຽງໃຫ້ແກ່ປະເທດຊາດ ໂດຍສະເພາະງານມະຫະກຳກິລາຊີເກມ ຄັ້ງທີ 30 ທີ່ປະເທດຟີລິບປິນເປັນເຈົ້າພາບ ໃນປີ 2019.
ທ່ານ ອາໂນໄທ ເມືອງມະນີ ນັກກິລາຍິງປືນທີມຊາດ ໃຫ້ສໍາພາດວ່າ: ຜ່ານມາທາງສະຫະພັນຍິງປືນແຫ່ງຊາດລາວ ໄດ້ສົ່ງນັກກິລາເຂົ້າຮ່ວມການແຂ່ງຂັນຊີງແຊ້ມລະດັບນາໆຊາດຫລາຍລາຍການ ໂດຍສະເພາະການແຂ່ງຂັນຊີງແຊ້ມໂລກທີ່ປະເທດຝຣັ່ງ ແລະ ລາຍການຊີງແຊ້ມອາຊີ-ປາຊີຟິກ ເອັກຕິມ ໂອເພັນ ເວີ ເອັກຕິມ ຄັບ 2017 ລະຫວ່າງວັນທີ 7-9 ທັນວາ 2017 ທີ່ແຂວງພັດທະຍາ ປະເທດໄທ ເປັນເຈົ້າພາບ ເຖິງວ່າໃນສອງລາຍການດັ່ງກ່າວຈະບໍ່ສາມາດຍາດໄດ້ຜົນງານອັນພົ້ນເດັ່ນໃຫ້ປະເທດຊາດກໍຕາມ ແຕ່ສ້າງໃຫ້ຕົນເອງມີປະສົບການ ແລະ ບົດຮຽນສູງຂຶ້ນ ເຊິ່ງປີນີ້ຈະນຳເອົາບົດຮຽນດັ່ງກ່າວມາປັບປຸງ ແລະ ແກ້ໄຂເພື່ອເຝິກຝົນຫລໍ່ຫລອມພັດທະນາຕົນເອງໃຫ້ດີຂຶ້ນກວ່າເກົ່າ ເພື່ອຮັບປະກັນໃນການກະກຽມຄວາມພ້ອມເຂົ້າຮ່ວມເຄື່ອນໄຫວແຂ່ງຂັນລາຍການຕ່າງໆ ໂດຍສະເພາະງານມະຫະກຳກິລາຊີເກມ ຄັ້ງທີ 30 ທີ່ປະເທດຟີລິບປິນ ຮັບກຽດເປັນເຈົ້າພາບ ໃນປີ 2019 ກິລາຍິງປືນໄອພີເອັສຊີ ເຊິ່ງເປັນອີກຄວາມຫວັງໜຶ່ງຂອງປະເທດເຈົ້າພາບ ຈະມີການບັນຈຸກິລາດັ່ງກ່າວເຂົ້າຮ່ວມແຂ່ງຂັນ. ສະນັ້ນ ຈຶ່ງມີແນວຄິດຢາກພັດທະນາກິລາຍິງປືນ ໄອພີເອັສຊີ ໃຫ້ຕົນເອງຢູ່ໃນລະດັບສູງຂຶ້ນອີກ ໂດຍຂຶ້ນແຜນຈະພະຍາຍາມເກັບກ່ຽວເອົາປະສົບການໃນການເຂົ້າຮ່ວມແຂ່ງຂັນລາຍການຊີງແຊ້ມລະດັບນາໆຊາດໃຫ້ໄດ້ຢ່າງຕໍ່າ 15 ລາຍການ ໃນປີ 2018.
