ສຕລ ກຽມຄັດເລືອກນັກກິລາທີມຊາດລາວ ຮຸ່ນອາຍຸ 16 ປີເຂົ້າຮ່ວມແຂ່ງຂັນທີ່ຍີ່ປຸ່ນ

ສະຫະພັນບານເຕະແຫ່ງຊາດລາວ (ສຕລ) ກຽມຄັດເລືອກນັກກິລາຮຸ່ນອາຍຸ 16 ປີ ເຂົ້າຮ່ວມແຂ່ງຂັນໃນລາຍການອາຊຽນຢີ່ປຸ່ນຮຸ່ນອາຍຸ 16 ປີ (Japan-ASEAN U-16 Football Exchange Programe 2018 ) ທີ່ປະເທດຢີ່ປຸ່ນຈັດຂຶ້ນໃນຕົ້ນເດືອນມີນາ 2018 ນີ້ ໂດຍຈະຄັດເລືອກໃຫ້ໄດ້ 18 ຄົນເພື່ອເປັນຕົວແທນໃຫ້ແກ່ ສປປ ລາວ ເຂົ້າຮ່ວມແຂ່ງຂັນລາຍການດັ່ງກ່າວ.

ທ່ານ ກັນລະຍາ ສີສົມຫວັງ ຄະນະກໍາມະການຄັດເລືອກນັກກິລາທີມຊາດຮຸ່ນອາຍຸ 16 ປີ ໃຫ້ສໍາພາດວ່າ: ໂດຍອີງຕາມແຜນການເຄື່ອນໄຫວຂອງ ສະຫະພັນບານເຕະແຫ່ງຊາດລາວ ປະຈຳປີ 2018 ມີ ຈຸດປະສົງຄັດເລືອກນັກກິລາທີ່ມີພອນສະຫວັນ ແລະ ທັກສະ ເພື່ອກະກຽມນັກກິລາທີມບານເຕະຊາຍທີມຊາດລາວ ຮຸ່ນອາຍຸ 16 ປີ ເຂົ້າຮ່ວມການແຂ່ງຂັນລາຍການ Japan-ASEAN U-16 Football Exchange Programe 2018 ເຊິ່ງຈະໄດ້ຈັດຂຶ້ນໃນວັນທີ 6-15 ມີນາ 2018 ທີ່ແຂວງມີຢາຊະກິ (MIYAZAKI) ປະເທດຍີ່ປຸ່ນ. ການຄັດເລືອກຈະຈັດຂຶ້ນໃນວັນທີ 15-20 ມັງກອນ 2018 ຢູ່ທີ່ສູນຝຶກ ສຕລ ບ້ານຫ້ວຍຫົງ ເມືອງຈັນທະບູລີ ນະຄອນຫລວງວຽງຈັນ ໃນເວລາ 16:00–18:30 ໂມງ.

ການຄັດເລືອກນັກກິລາເຂົ້າຮ່ວມແຂ່ງຂັນຄັ້ງນີ້ຕ້ອງຮັບປະກັນຄວາມພ້ອມຂອງຮ່າງກາຍຕະຫລອດໄລຍະການຄັດເລືອກ ແລະ ຕ້ອງເກີິດໃນລະຫວ່າງປີ 2002–2003. ສໍາລັບນັກກິລາມາຈາກຕ່າງແຂວງ ທາງສະຫະພັນບານເຕະແຫ່ງຊາດລາວຈະອຳນວຍຄວາມສະດວກທາງດ້ານທີ່ພັກ ແແລະ ອາຫານຕະຫລອດໄລຍະການຄັດເລືອກ, ສ່ວນການເດີນທາງແມ່ນຮັບຜິດຊອບເອງ, ສ່ວນເອກະສານປະກອບມີ ປຶ້ມສຳມະໂນຄົວ ຫລື ຫນັງສືການເດີນທາງ (ຂອງແທ້) ແລະ ໃບຢັ້ງຢືນການສຶກສາ (ຂອງແທ້) ເພື່ອເປັນຫລັກຖານ.