2017 ລັດສັ່ງຍຸບໂຮງງານປຸງແຕ່ງໄມ້ບໍ່ຖືກກົດໝາຍ 140 ແຫ່ງ
ແຫລ່ງຂ່າວ ຂປລ ລາຍງານວ່າ: ໃນປີ 2017 ຜ່ານມາ, ລັດຖະບານໄດ້ເອົາໃຈໃສ່ປັບປຸງ ແລະ ດັດສົມໂຮງງານປູງແຕ່ງໄມ້ທົ່ວປະເທດ ທີ່ເປີດກິດຈະການ ກ່ອນຄຳສັ່ງເລກທີ 15/ນຍ ຈໍານວນ 1.595 ແຫ່ງ. ໃນນັ້ນ, ມີໂຮງງານທີ່ບໍ່ໄດ້ມາດຕະຖານ ແລະ ເຄື່ອນໄຫວຜິດກົດໝາຍຖືກສັ່ງຍຸບຈຳນວນ 140 ແຫ່ງຄື: ຢູ່ແຂວງໄຊຍະບູລີ ຍົກເລີກ 83 ແຫ່ງ, ນະຄອນຫລວງ 8 ແຫ່ງ, ບໍລິຄຳໄຊ 13 ແຫ່ງ, ສະຫວັນນະເຂດ 13 ແຫ່ງ, ສາລະວັນ 4 ແຫ່ງ ແລະ ແຂວງເຊກອງ 19 ແຫ່ງ.
ການຈັດຕັ້ງຜັນຂະຫຍາຍຄຳສັ່ງເລກທີ 15/ນຍ ວ່າດ້ວຍການສະກັດກັ້ນການຕັດໄມ້ ແລະ ເຄື່ອນຍ້າຍໄມ້ຂອງທ່ານນາຍົກລັດຖະມົນຕີເຫັນວ່າມີຜົນສຳເລັດສູງຢູ່ໃນຂອບເຂດທົ່ວປະເທດ, ເຊິ່ງສາມາດສະກັດກັ້ນບັນຫາການລັກລອບຂຸດຄົ້ນໄມ້ ແລະ ສົ່ງອອກໄມ້ແບບບໍ່ຖືກຕ້ອງຕາມກົດໝາຍຫລຸດໜ້ອຍຖອຍລົງ, ສາມາດຫລຸດຜ່ອນການຕັດໄມ້ທຳລາຍປ່າໄມ້ແບບຊະຊາຍ ແລະ ສາມາດປະກອບສ່ວນເຮັດໃຫ້ການປົກຫຸ້ມປ່າໄມ້ຂອງປະເທດເຮົາບັນລຸຕາມແຜນການ 70% ໃນປີ 2020.
ສຳລັບການສົ່ງເສີມ ແລະ ພັດທະນາສິນຄ້າທີ່ເປັນທ່າແຮງສາມາດອອກໃບອະນຸຍາດນຳໃຊ້ກາໝາຍສິນຄ້າ ODOP ແຫ່ງຊາດໃຫ້ 17 ແຂວງ, ມີ 138 ຫົວໜ່ວຍ, ມີ 533 ຜະລິດຕະພັນຢູ່ 132 ບ້ານ 72 ເມືອງ. ໃນນັ້ນ, ຜະລິດຕະພັນຫັດຖະກຳມີ 81 ຫົວໜ່ວຍ, ອາຫານ-ເຄື່ອງດື່ມ 49 ຫົວໜ່ວຍ ແລະ ຢາພື້ນເມືອງ 8 ຫົວໜ່ວຍ.
