ປີ 2017 ລາວເຮັດສໍາເລັດ 11 ໂຄງການສໍາຄັນ

ກະຊວງແຜນການ ແລະ ການລົງທຶນ ເປີດເຜີຍໃຫ້ຮູ້ວ່າ: ໃນປີ 2017 ລາວເຮົາສາມາດປະຕິບັດໂຄງການພັດທະນາພື້ນຖານໂຄງລ່າງສໍາຄັນຈໍານວນ 11 ໂຄງການຄື: ໂຄງການກໍ່ສ້າງຂົວຂ້າມນໍ້າຂອງໂຄກເຂົ້າດໍ-ປາກລາຍ, ໂຄງການກໍ່ສ້າງຂົວ 7 ແຫ່ງຢູ່ບົນເສັ້ນທາງເລກ 6A ສົບເບົາ-ບ້ານດ່ານແຂວງຫົວພັນ, ໂຄງການນໍ້າປະປາ ແລະ ສຸຂາພິບານຕົວເມືອງນ້ອຍໃນ 10 ຕົວເມືອງ, ໂຄງການກໍ່ສ້າງທາງເລກ 1A ບຸນເໜືອ-ລານຕຸຍແຂວງຜົ້ງສາລີ, ໂຄງການກໍ່ສ້າງນໍ້າປະປາ 5 ແຫ່ງຢູ່ເມືອງແບງ, ເມືອງຄອບ, ເມືອງຫ້ວຍຊາຍ, ເມືອງໄຊບູລີ ແລະ ເມືອງໂຂງ ທີ່ໄດ້ຮັບການສະໜັບສະໜູນທຶນຈາກ NEDA, ໂຄງການກໍ່ສ້າງທາງເລກ 13 ເໜືອຕອນທາງເມືອງໄຊ-ປາກມອງ, ໂຄງການກໍ່ສ້າງທາງບ້ານຮວກ-ເມືອງຄອບ, ຄອນຕື້, ໂຄງການກໍ່ສ້າງເສັ້ນທາງເມືອງຊຽງຮອນ-ເມືອງຄອບ, ໂຄງການປັບປຸງສະໜາມບິນປາກເຊ, ຂົວຂ້າມນໍ້າເຊໂດນຈຸດບ້ານດອນແຊເມືອງຊະນະສົມບູນແຂວງຈໍາປາສັກ ແລະ ໂຄງການຟື້ນຟູເສັ້ນທາງແຕ່ບ້ານລາດຄ້າຍທາງເລກ 5 ຫາສົບສຽມທາງເລກ 1D ແລະ ເສັ້ນທາງຜາເໜືອຫາປຸ່ງມາຍແຂຂວງເຊກອງ. ນອກຈາກນີ້, ລັດຖະບານຍັງໄດ້ເອົາໃຈໃສ່ບັນດາໂຄງການຍຸດທະສາດທີ່ມີຄວາມຄືບໜ້າ ເຊັ່ນ: ການຂະຫຍາຍອາຄານສະໜາມບິນສາກົນວຽງຈັນປະຕິບັດໄດ້ 30,74%, ການກໍ່ສ້າງທາງຫົງສາ-ຊຽງແມນປະຕິບັດໄດ້ 56,77%, ການກໍ່ສ້າງທາງປູຢາງ 2 ຊັ້ນເສັ້ນທາງເລກ 6A+6B ຫາງລ້ອງ-ສົບເບົາ-ປ່າຮ່າງ ສະເພາະ 6B ແມ່ນສໍາເລັດແລ້ວ 100%, ທາງ 6A ປະຕິບັດໄດ້ 74,35% ແລະ ໄລຍະທາງແຕ່ວຽງໄຊ-ນໍ້າໂຊ້ຍ ແມ່ນໄດ້ສໍາເລັດການກະກຽມສະໜາມ, ໂຄງການກໍ່ສ້າງຂົວເຊກອງປະຕິບັດໄດ້ 88,68%, ການກໍ່ສ້າງຂົວໃໝ່ປ່ຽນແທນຂົວເກົ່າ 2 ແຫ່ງຕາມທາງເລກ 9 ແຂວງສະຫວັນນະເຂດປະຕິບັດໄດ້ 16,2%, ໂຄງການກໍ່ສ້າງທາງສາມແຍກນາຊາງຫາທົ່ງທູ ແລະ ເທສະບານເມືອງຊໍາໃຕ້ປະຕິບັດໄດ້ 62,47%, ໂຄງການທາງທ່າເຫລົ້າ-ຊໍາໃຕ້ ປະຕິບັດໄດ້ 75,73%, ໂຄງການທາງຊົນນະບົດປະຕິບັດໄດ້ 70,47% ແລະ ໂຄງການອື່ນໆ ກໍມີຄວາມຄືບໜ້າໃນການຈັດຕັ້ງປະຕິບັດເປັນຢ່າງດີ.