10 ເຫດການດ້ານເສດຖະກິດພົ້ນເດັ່ນໃນປີ 2017
ປີ 2017 ເປັນປີທີ່ສອງຂອງການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ VIII (2016-2020) ແລະ ເປັນຊ່ວງໄລຍະທີ່ສະພາບການເງິນ-ງົບປະມານຂອງປະເທດເຮົາມີຄວາມຫຍຸ້ງຍາກ ແລະ ທ້າທາຍສົມຄວນ, ເຊິ່ງລັດຖະບານໄດ້ພະຍາຍາມນໍາໃຊ້ຫລາຍມາດຕະການ, ວິທີການລວມທັງການຮ່ວມມືກັບບັນດາປະເທດເພື່ອນມິດ, ອົງການຈັດຕັ້ງສາກົນຕ່າງໆ ໃນການຄຸ້ມຄອງລະບົບເສດຖະກິດມະຫາພາກເພື່ອແກ້ໄຂຄວາມສ່ຽງຕ່າງໆໃຫ້ຫລຸດຜ່ອນລົງ ແລະ ມື້ນີ້ໜັງສືພີມລາວພັດທະນາໄດ້ຄັດຈ້ອນເອົາ 10 ເຫດການເດັ່ນດ້ານເສດຖະກິດທີ່ເກີດຂຶ້ນໃນປີ 2017 ມານໍາສະເໜີຄື: ກອງປະຊຸມພົບປະທຸລະກິດລາວ-ໄທ ເມື່ອວັນທີ 16 ມັງກອນ, ກອງປະຊຸມໄດ້ຫາລືຫລາຍບັນຫາສໍາຄັນຄື: ການຂົນສົ່ງ, ການຄ້າຊາຍແດນ, ການທ່ອງທ່ຽວ-ບໍລິການ, ການຜະລິດກະສິກໍາ, ພະລັງງານ, ການຂຸດຄົ້ນຊັບພະຍາກອນທໍາມະຊາດ, ການເງິນ, ຕະຫລາດຫລັກຊັບ ແລະ ການພັດທະນາຕົວເມືອງ ແລະ ອະສັງຫາລິມະຊັບ, ພ້ອມທັງແຈ້ງໃຫ້ຊາບວ່າ: ປັດຈຸບັນການນໍາເຂົ້າສີນຄ້າຈາກໄທມາລາວມີມູນຄ່າຫລາຍກວ່າ 4,2 ຕື້ໂດລາສະຫະລັດ ແລະ ການສົ່ງອອກຂອງລາວໄປໄທບັນລຸຫລາຍກວ່າ 1,2 ຕື້ໂດລາສະຫະລັດ. (2) ພິທີເປີດນໍາໃຊ້ເຂື່ອນໄຟຟ້າເຊເສັດ 3 ທີ່ແຂວງສາລະວັນ, ໃນວັນທີ 6 ມັງກອນ, ເຂື່ອນດັ່ງກ່າວມີມູນຄ່າກໍ່ສ້າງທັງໝົດ 50 ລ້ານໂດລາສະຫະລັດ, ມີກໍາລັງຕິດຕັ້ງ 23 ເມກາວັດ, ອັນໄດ້ປະກອບສ່ວນຊຸກຍູ້ການພັດທະນາເສດຖະກິດຂອງທ້ອງຖິ່ນ ແລະ ສະໜອງພະລັງງານສະອາດເພື່ອການພັດທະນາເສດຖະກິດ-ສັງຄົມຂອງລາວ. (3) ງານວາງສະແດງສີນຄ້າໜຶ່ງເມືອງໜຶ່ງຜະລິດຕະພັນ (ODOP) ທົ່ວປະເທດຄັ້ງທີ 1 ໃນວັນທີ 22-26 ກຸມພາທີ່ສູນການຄ້າລາວ-ໄອເຕັກນະຄອນຫລວງວຽງຈັນ, ງານດັ່ງກ່າວມີຜູ້ປະກອບການຜະລິດສີນຄ້າໂອດອບ ແລະ ສີນຄ້າບໍລິໂພກ-ອຸປະໂພກເຂົ້າຮ່ວມຫລາຍກວ່າ 200 ຮ້ານ, ໂດຍສີນຄ້າໂອດອບແມ່ນຜະລິດຕະພັນທີ່ນໍາໃຊ້ສີມືແຮງງານ, ພູມປັນຍາ, ຫົວຄິດປະດິດສ້າງ ແລະ ວັດຖຸດິບທ້ອງຖິ່ນເຂົ້າໃນການຜະລິດທີ່ເປັນເອກະລັກຂອງເມືອງ ແລະ ບ້ານ, ມາຮອດປັດຈຸບັນທົ່ວປະເທດມີຜະລິດຕະພັນດັ່ງກ່າວຫລາຍກວ່າ 130 ຫົວໜ່ວຍ. (4) ການປະມູນຂາຍລົດການນໍາຂັ້ນສູງເມື່ອວັນທີ 28 ກຸມພາທີ່ສູນປະຊຸມແຫ່ງຊາດ, ເຊິ່ງມີລົດຍີຫໍ້ບີເອັມດັບເບີນຢູ (BMW) ຈໍານວນ 7 ຄັນ ແລະ ເມີຊີເດດສເບນ (BENZ) 7 ຄັນ ແລະ ລັດໄດ້ເງິນຈາກການປະມູນລົດຄັ້ງນີ້ຫລາຍກວ່າ 11 ຕື້ກີບ, ເພື່ອນໍາໃຊ້ເຂົ້າໃນວຽກງານສ້າງສາພັດທະນາປະເທດ. (5) ອົງການການເງິນສາກົນ (IFC) ສະໜອງເງິນ 10 ລ້ານໂດລາສະຫະລັດ ເພື່ອປ່ອຍກູ້ໃຫ້ວິສາຫະກິດຂະໜາດນ້ອຍ ແລະ ກາງ (SME) ຢູ່ລາວໂດຍຜ່ານທະນາຄານລາວ-ຝລັ່ງ, ພາຍຫລັງເຫັນວ່າ SME ກວມເອົາການຈ້າງງານຫລາຍກວ່າ 70% ຂອງຕະຫລາດແຮງງານໃນລາວ, ແຕ່ວິສາຫະກິດເຫລົ່ານີ້ໄດ້ປະກອບສ່ວນໃຫ້ແກ່ລວມຍອດຜະລິດຕະພັນພາຍໃນ (GDP) ມີພຽງ 16% ເທົ່ານັ້ນ, ຍ້ອນມີຄວາມຫຍຸ້ງຍາກໃນການເຂົ້າເຖິງແຫລ່ງທຶນເພື່ອຂະຫຍາຍທຸລະກິດ. (6) ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ 8 ເມື່ອກາງເດືອນພຶດສະພາ, ໄດ້ຮັບຮອງຮ່າງມະຕິວ່າດ້ວຍການຄຸ້ມຄອງລາຄາສິນຄ້າ, ຄ່າບໍລິການ ແລະ ມາດຕະການແກ້ໄຂ ເພື່ອຫລຸດຜ່ອນຜົນກະທົບຕໍ່ການຜະລິດ ແລະ ການດໍາລົງຊີວິດຂອງປະຊາຊົນຜູ້ມີລາຍໄດ້ໜ້ອຍ, ເຊິ່ງມະຕິດັ່ງກ່າວຈະສາມາດຄວບຄຸມລາຄາສີນຄ້າອຸປະໂພກ-ບໍລິໂພກພາຍໃນປະເທດມີຄວາມສະຫງົບໂດຍພື້ນຖານ. (7) ກອງປະຊຸມແລກປ່ຽນບົດຮຽນການຄຸ້ມຄອງເສດຖະກິດມະຫາພາກລະຫວ່າງລາວ-ໄທໃນວັນທີ 17 ພຶດສະພາ, ທີ່ນະຄອນຫລວງວຽງຈັນ, ໂດຍການເຂົ້າຮ່ວມ ຂອງທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ພ້ອມດ້ວຍຂະແໜງການກ່ຽວຂ້ອງສອງຝ່າຍເຂົ້າຮ່ວມ, ເພື່ອຮັບຟັງການບັນຍາຍຂອງທ່ານ ວິຣະພົງ ຣາມາກຸນ ອະດີດຮອງນາຍົກລັດຖະມົນຕີແຫ່ງຣາຊະອານາຈັກໄທ ກ່ຽວກັບບົດຮຽນ ແລະ ປະສົບການຕົວຈິງໃນການຄຸ້ມຄອງເສດຖະກິດມະຫາພາກຈາກປະເທດໄທ, ໂດຍສະເພາະໃນຊ່ວງໄລຍະພາກພື້ນໄດ້ປະເຊີນກັບວິກິດເສດຖະກິດ ແລະ ການເງິນ, ການຄຸ້ມຄອງເງິນຕາໃຫ້ມີສະຖຽນລະພາບ, ການສົ່ງເສີມການຄ້າ ແລະ ການລົງທຶນ, ການປັບປຸງລັດວິສາຫະກິດ ແລະ ອື່ນໆ. (8) ລາວ-ສ.ເກົາຫລີຫາລືການຂະຫຍາຍໂອກາດທຸລະກິດຜ່ານອິນເຕີເນັດໃນວັນທີ 5 ກໍລະກົດທີ່ນະຄອນຫລວງວຽງຈັນ, ຊຶ່ງທຸລະກິດຮູບແບບດັ່ງກ່າວແມ່ນຊ່ອງທາງໜຶ່ງທີ່ລັດຖະບານໄດ້ສົ່ງເສີມ ແລະ ມີໂອກາດທີ່ຈະຂະຫຍາຍຕົວໄວ, ເນື່ອງຈາກ 90% ຂອງວິສາຫະກິດຢູ່ລາວແມ່ນຂະ ນ້ອຍ ແລະ ກາງ ແລະ ຈະເຮັດໃຫ້ມີການຄ້າຂາຍຜ່ານລະບົບອີຄອມເມີດ E-Commerce ເກີດຂຶ້ນຫລາຍ. (9) ກອງປະຊຸມແລກປ່ຽນບົດຮຽນດ້ານການຄ້າ-ການລົງທຶນລະຫວ່າງລາວ-ຈີນ ໃນວັນທີ 25 ກັນຍາທີ່ນະຄອນຫລວງວຽງຈັນ, ເພື່ອຂະຫຍາຍໂອກາດການຮ່ວມມືດ້ານທຸລະກິດຂອງສອງຝ່າຍໃຫ້ຫລາຍຂຶ້ນ, ເຊິ່ງປັດຈຸບັນການລົງທຶນຂອງ ສປຈີນ ຢູ່ລາວແມ່ນກວມໃນຫລາຍຂະແໜງການ ເຊັ່ນ: ດ້ານພະລັງງານ, ບໍ່ແຮ່, ການເງິນ-ທະນາຄານ, ກະສິກໍາ, ບໍລິການ ແລະ ອື່ນໆ ແລະ ຢູ່ໃນອັນຕົ້ນໆຂອງການລົງທຶນຕ່າງປະເທດຢູ່ລາວ, ໃນກອງປະຊຸມຍັງໄດ້ລົງນາມບົດບັນທຶກຄວາມເຂົ້າໃຈການຮ່ວມມືດ້ານການຄ້າ-ການລົງໃນເຂດເສດຖະກິດພິເສດສະຫວັນ-ເຊໂນອີກດ້ວຍ ແລະ (10) ໃນໂອກາດຢ້ຽມຢາມທາງລັດຖະກິດ ສປປ ລາວ ຂອງສະຫາຍ ສີ ຈີ້ນຜິງ ເລຂາທິການໃຫຍ່ຄະນະກໍາມະການສູນກາງພັກກອມມູນິດຈີນ, ປະທານປະເທດແຫ່ງ ສປຈີນ ໃນວັນທີ 13-14 ພະຈິກ, ໃນໂອກາດນີ້, ສອງຝ່າຍລາວ-ຈີນ ໄດ້ຮ່ວມກັນລົງນາມເອກະສານຮ່ວມມືຈໍານວນ 17 ສະບັບ, ໃນນີ້ລວມມີການຮ່ວມມືດ້ານການເງິນເພື່ອສົ່ງເສີມວິສາຫະກິດຂະໜາດນ້ອຍ ແລະ ກາງໃນລາວ, ສັນຍາກູ້ຢືມພິເສດດອກເບ້ຍຕໍ່າໂຄງການເຂື່ອນໄຟຟ້າຫ້ວຍປາຫລາຍ, ສັນຍາເງິນກູ້ທຸລະກິດໂຄງການສາຍສົ່ງ 115 ກິໂລໂວນຊຽງຮອນ-ຫົງສາ, ສັນຍາຮ່ວມທຶນສ້າງທາງດ່ວນນະຄອນຫລວງວຽງຈັນ-ວັງວຽງ, ສັນຍາເງິນກູ້ທຸລະກິດໂຄງການສາຍສົ່ງ 500/230 ກິໂລໂວນ ອ້ອມນະຄອນຫລວງວຽງຈັນ, ພ້ອມທັງໃຫ້ການຊ່ວຍເຫລືອ ສປປ ລາວຕື່ມອີກ 4 ຕື້ຢວນໃນໄລຍະ 3 ປີຕໍ່ໜ້າ, ເພື່ອພັດທະນາເສດຖະກິດ-ສັງຄົມ ແລະ ປັບປຸງຊີວິດການເປັນຢູ່ຂອງປະຊາຊົນບັນດາເຜົ່າ.
