ບຸນປອນ ຝຶກຊ້ອມໜັກຫວັງສ້າງ ຜົນງານໃນອາຊຽນເກມ 2018
ປັດຈຸບັນທ້າວ ບຸນປອນ ລາຊະວົງສີ ເຈົ້າຂອງຫລຽນທອງກິລາມວຍສາກົນ ຮຸ່ນນໍ້າໜັກ 49 ກິໂລ ໃນງານມະຫະກຳກິລາຊີເກມ ຄັ້ງທີ 29 ທີ່ປະເທດມາເລເຊຍ ເປັນເຈົ້າພາບຈັດຂຶ້ນກາງເດືອນສິງຫາຜ່ານມານີ້ ໄດ້ຝຶກຊ້ອມໜັກເພື່ອພັດທະນາຕົນເອງຂຶ້ນເລື້ອຍໆ ແນໃສ່ສ້າງຜົນງານໃຫ້ບັນລຸເປົ້າໝາຍໃນງານມະຫະກຳກິລາອາຊຽນເກມ ຄັ້ງທີ 18 ທີ່ປະເທດອິນໂດເນເຊຍ ທີ່ຈະຈັດຂຶ້ນໃນປີ 2018 ແລະ ງານມະຫະກຳກິລາຊີເກມ ຄັ້ງທີ 30 ທີ່ປະເທດຟິລິບປິນ ໃນທ້າຍປີ 2019.
ຕາມການໃຫ້ສຳພາດຂອງທ້າວ ບຸນປອນ ລາຊະວົງສີ ໃຫ້ຮູ້ວ່າ: ຫລັງຈາກສຳເລັດການເຂົ້າຮ່ວມງານມະຫະກຳກິລາຊີເກມ ຄັ້ງທີ 29 ທີ່ປະເທດມາເລເຊຍ ກັບມາສູ່ນະຄອນຫລວງວຽງຈັນ ຕົນເອງໄດ້ສືບຕໍ່ຝຶກຊ້ອມ ໂດຍນຳເອົາບົດຮຽນທີ່ເປັນຂໍ້ຄົງຄ້າງມາແກ້ໄຂ ແລະ ປັບປຸງໃຫ້ສອດຄ່ອງກັບສະພາບຕົວຈິງຝຶກທຸກໆມື້ ຄຽງຄູ່ກັບການຖ່າຍທອດໃຫ້ນັກກິລາຮຸ່ນສືບທອດທີ່ສະໂມສອນ ບ້ານໂພນປາເປົ້າ ເມືອງສີສັດຕະນາກ ນະຄອນຫລວງວຽງຈັນ ເຊິ່ງມາຮອດປັດຈຸບັນຕົນເອງມີຄວາມພ້ອມ 100% ເພື່ອກຽມເຂົ້າຮ່ວມງານມະຫະກຳກິລາເອຊຽນເກມ ຄັ້ງທີ 18 ຈະຈັດຂຶ້ນລະຫວ່າງວັນທີ 18 ສິງຫາ – 2 ກັນຍາ 2018 ທີ່ປະເທດອິນໂດເນເຊຍ ຮັບກຽດເປັນເຈົ້າພາບ ແລະ ງານມະຫະກຳກິລາຊີເກມ ຄັ້ງທີ 30 ທີ່ປະເທດຟິລິບປິນ ໃນທ້າຍປີ 2019 ທັງ 2 ງານດັ່ງກ່າວເປັນຄວາມຫວັງ ແລະ ເປົ້າໝາຍຊີວິດທີ່ຕົນເອງໄດ້ມີຄວາມໄຝ່ຝັນຢາກເຮັດໃຫ້ປະສົບຜົນສຳເລັດ ເພື່ອເປັນບ່ອນອີງໃນການສ້າງກຽດ ແລະ ຊື່ສຽງໃຫ້ແກ່ປະເທດຊາດ.
ທ້າວ ບຸນປອນ ລາຊະວົງສີ ເປັນລູກຫລານຊາວບ້ານຫລັກ 12 ເມືອງໂພນທອງ ແຂວງຈຳປາສັກ ໄດ້ເລີ່ມເປັນນັກກິລາມວຍສາກົນມາແຕ່ປີ 2008 ຕາງໜ້າແຂວງຈຳປາສັກ ເຂົ້າຮ່ວມແຂ່ງຂັນງານມະຫະກຳກິລາແຫ່ງຊາດ ຄັ້ງທີ 8 ທີ່ແຂວງຈຳປາສັກ ເປັນເຈົ້າພາບ ໃນປີ 2008 ສາມາດແຈ້ງເກີດ ຍາດໄດ້ຫລຽນເງິນ ແລະ ໄດ້ຕາງໜ້າມວຍສາກົນທີມຊາດລາວ ເຂົ້າຮ່ວມຊີເກມ ຄັ້ງທີ 26 ທີ່ປະເທດອິນໂດເນເຊຍ ປີ 2011 ຜົນງານແມ່ນຕົກຮອບທໍາອິດ ຫລັງເສຍໃຫ້ນັກກິລາຈາກ ສສ ຫວຽດນາມ, ຮ່ວມຊີເກມ ຄັ້ງທີ 27 ທີ່ມຽນມາ ເປັນເຈົ້າພາບ ເມື່ອປີ 2013 ຊະນະນັກກິລາກຳປູເຈຍ ໃນຮອບທຳອິດ ແຕ່ໜ້າເສຍດາຍໄປເສຍໃຫ້ ນັກກິລາອິນໂດເນເຊຍໃນຮອບຊີງຫລຽນເງິນ ໄດ້ຫລຽນທອງທຳອິດ, ຮ່ວມຊີເກມ ຄັ້ງທີ 28 ທີ່ປະເທດສິງກະໂປ ໃນປີ 2015 ຊະນະນັກກິລາຕີມໍ ເລສເຕ ໃນຮອບຄັດເລືອກ ແລະ ເສຍໃຫ້ນັກກິລາຟິລິບປິນ ໃນຮອບຊີງຫລຽນເງິນ ໄດ້ພຽງຫລຽນທອງ ແລະ ຫລ້າສຸດ ຮ່ວມຊີເກມ ຄັ້ງທີ 29 ທີ່ມາເລເຊຍ 2017 ໃນຮອບຄັດເລືອກ ຊະນະ ນັກກິລາສິງກະໂປ, ມຽນມາ ແລະ ເສຍໃຫ້ ນັກກິລາເຈົ້າພາບ ມາເລເຊຍ ໃນຮອບຊີງຫລຽນເງິນ ໄດ້ຫລຽນທອງຕາມເຄີຍ, ສ່ວນຜົນງານໃນການເຂົ້າຮ່ວມງານມະຫະກຳກິລາແຫ່ງຊາດ ຄັ້ງທີ 9 ທີ່ແຂວງຫລວງພະບາງ ປີ 2011 ແລະ ກິລາແຫ່ງຊາດ ຄັ້ງທີ 10 ທີ່ແຂວງອຸດົມໄຊ ປີ 2014 ວາທີ ບຸນປອນ ກໍຄວ້າໄດ້ພຽງຫລຽນເງິນມາຄອງ.
