ກອງປະຊຸມແນະນໍາການຈັດຕັ້ງປະຕິບັດແຜນງົບປະມານແຫ່ງລັດປະຈຳປີ
ໃນວັນທີ 26 ທັນວານີ້ ທີ່ຫໍປະຊຸມແຫ່ງຊາດ, ກະຊວງການເງິນ ໄດ້ຈັດກອງປະຊຸມແນະນໍາການຈັດຕັ້ງປະຕິບັດແຜນງົບປະມານແຫ່ງລັດປະຈໍາປີ, ໂດຍການເປັນປະທານຂອງທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ, ມີທ່ານຮອງເຈົ້າແຂວງ, ຮອງລັດຖະມົນຕີກະຊວງຕ່າງໆ ພ້ອມດ້ວຍຄະນະນໍາກະຊວງ, ຕ່າງໆພ້ອມດ້ວຍນໍາທ້ອງຖິ່ນ, ຂະແໜງການເງິນອອ້ມຂ້າງສູນກາງ ແລະ ທ້ອງຖິ່ນເຂົ້າຮ່ວມ.
ທ່ານ ສົມດີ ດວງດີ ໄດ້ມີຄຳເຫັນຕໍ່ກອງປະຊຸມວ່າ: ການຈັດຕັ້ງປະຕິບັດແຜນງົບປະມານແຫ່ງລັດປີ 2017 ແມ່ນເປັນຊ່ວງໄລຍະບາດລ້ຽວອັນສໍາຄັນເພາະເປັນປີທີສອງຂອງການຈັດຕັ້ງຜັນຂະຫຍາຍມະຕິກອງປະຊຸມໃຫ່ຍທີ X ຂອງພັກ, ກ້າວເຂົ້າສູ່ໄລຍະກາງຂອງການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ VIII (2016-2020), ຄຽງຄູ່ກັນນັ້ນ, ກໍແມ່ນການເລີ່ມຈັດຕັ້ງປະຕິບັດຫລາຍອັນໃໝ່ເພື່ອສ້າງພື້ນຖານໃຫ້ແກ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານໃນຕໍ່ໜ້າ. ແລະ ໃນປີ 2017 ຍັງເຫັນວ່າມີຫລາຍດ້ານຍັງຫຍຸ້ງຍາກ ແລະ ທ້າທາຍສູງ, ຍັງເປັນແຜນທີ່ສືບຕໍ່ແກ້ໄຂສະພາບຄວາມຝືດເຄືອງທາງດ້ານການເງິນ-ງົບປະມານ ທີ່ເກີດຂຶ້ນມາໃນໄລຍະຫລາຍສົກງົບປະມານທີ່ຜ່ານມາເຊິ່ງຕ້ອງໃຊ້ເວລາພໍສົມຄວນຈຶ່ງສາມາດຟື້ນໂຕ ແລະ ກັບເຂົ້າສູ່ສະພາບປົກກະຕິໄດ້.
ບົນພື້ນຖານສະພາບ ແລະ ເງື່ອນໄຂທັງພາຍນອກ ແລະ ພາຍໃນປະເທດດັ່ງທີ່ກ່າວໄປແລ້ວນັ້ນພວກເຮົາໄດ້ພ້ອມກັນສູ້ຊົນຈັດຕັ້ງປະຕິບັດແຜນງົບປະມານແຫ່ງລັດປີ 2017 ດ້ວຍຄວາມເອົາໃຈໃສ່ ແລະ ດ້ວຍຄວາມຮັບຜິດ ຊອບສູງ, ພາຍໃຕ້ການຊີ້ນໍາ-ນໍາພາຢ່າງໃກ້ຊິດຂອງພັກ ແລະ ລັດຖະບານ, ລວມທັງການຕັດສິນໃຈສູງຂອງບັນດາຂະແໜງການທັງສູນກາງ ແລະ ທ້ອງຖິ່ນໃນຂອບເຂດທົ່ວປະເທດ ສາມາດປະຕິບັດລາຍຮັບເຂົ້າງົບປະມານທັງໝົດ 84,94% ຂອງແຜນການປີ, ສະເພາະລາຍຮັບພາຍໃນໄດ້ 87,71% ສ່ວນດ້ານລາຍຈ່າຍປະຕິບັດໄດ້ 84,40% ຂອງແຜນການປີ.
ເຖິງແນວໃດກໍ່ຕາມຜ່ານການຄົ້ນຄວ້າຄວາມອາດສາມາດໃນການຈັດເກັບລາຍຮັບ ແລະ ປະຕິບັດລາຍຈ່າຍງົບປະມານປີ 2017 ເຫັນວ່າຍັງທ້າທາຍສູງເນື່ອງຈາກລາຍຮັບງົບປະມານທັງໝົດຄາດຄະເນຈະສູ້ຊົນປະຕິບັດ ໃຫ້ໄດ້ຢ່າງຕໍ່າບໍ່ຫລຸດ 95% ຂອງແຜນການປີ, ສ່ວນດ້ານລາຍຈ່າຍງົບປະມານທັງໝົດຄາດຄະເນປະຕິບັດໄດ້ 95,2% ສັງລວມແລ້ວບວກກັບຄວາມຈໍາເປັນຊໍາລະຕົ້ນທຶນເງິນກູ້ຢືມພາຍໃນ ແລະ ຕ່າງປະເທດ ແຫລ່ງທຶນທີ່ສາມາດລະດົມໄດ້ໃນປີ ແມ່ນຍັງບໍ່ທັນພຽງພໍ ຜ່ານການໄລ່ລຽງເບື້ອງຕົ້ນຮ່ວມກັບບັນດາແຂວງ ເຫັນວ່າລາຍຮັບຂອງ 9 ແຂວງຈະບໍ່ສາມາດຈັດເກັບໄດ້ຕາມແຜນ ປະມານ 370 ຕື້ກີບເຊິ່ງຈະສ້າງຄວາມກົດດັນໃຫ້ແກ່ລັດຖະບານກໍ່ຄືຂັ້ນສູນກາງທີ່ຈະຕ້ອງໄດ້ຊອກແຫລ່ງທຶນ ເພື່ອໄປດຸນດ່ຽງເພີ່ມໃຫ້ບັນດາແຂວງ ດັ່ງກ່າວ ໂດຍສະເພາະແມ່ນເພື່ອໃຫ້ສາມາດປະຕິບັດ ບັນດາລາຍຈ່າຍທີ່ເປັນບູລິມະສິດເປັນຕົ້ນ: ລາຍຈ່ານເງິນເດືອນ, ເງິນນະໂຍບາຍຕ່າງໆ ໃຫ້ທັນກໍານົດເວລາຕາມທີ່ລັດຖະບານກໍານົດໄວ້.
ທ່ານ ຮອງນາຍົກລັດຖະມົນຕີ ລັດຖະມົນຕີເນັ້ນຕື່ມວ່າ: ສະເພາະແຜນງົບປະມານແຫ່ງລັດໃນປີ 2018 ແມ່ນຍັງສືບຕໍ່ສູ້ຊົນແກ້ໄຂບັນຫາຄວາມຫຍຸ້ງຍາກທາງດ້ານງົບປະມານ ແລະ ຫັນປ່ຽນໃໝ່ ໂດຍການກ້າວເຂົ້າສູ້ການປະຕິຮູບການຄຸ້ມຄອງການເງິນພາກລັດຢ່າງຕັ້ງໜ້າ, ຫັນເປັນທັນສະໄໝຢ່າງທັນການ ແລະ ກວ້າງຂວາງ ເຮັດໃຫ້ການເກັບລາຍຮັບ ແລະ ປະຕິບັດລາຍຈ່າຍງົບປະມານມີປະສິດທິຜົນ ແລະ ເຂັ້ມງວດຂຶ້ນກວ່າເກົ່າ, ແນໃສ່ເຮັດໃຫ້ເສດຖະກິດແຫ່ງຊາດເຕີບໂຕຕາມຄາດໝາຍທີ່ວາງໄວ້ຢ່າງໜ້ອຍ 7% ເຊິ່ງຄາດໝາຍທີ່ສະພາໄດ້ຮັບຮອງປະກອບມີ: ຄາດໝາຍລາຍຮັບທັງໝົດຕ້ອງສູ້ຊົນໃຫ້ໄດ້ 25.452 ຕື້ກີບ ທຽບເທົ່າປະມານ 17,02% ຂອງ GDP. ໃນນັ້ນ, ລາຍຮັບພາຍໃນມີຈໍານວນ 22.700 ຕື້ກີບ ເທົ່າກັບ 15,18% ຂອງ GDP, ສ່ວນຄາດໝາຍລາຍຈ່າຍງົບປະມານທັງໝົດບໍ່ເກີນ 32.809 ຕື້ກີບ, ເທົ່າກັບ 21.95% ຂອງ GDP, ເຊິ່ງຖືວ່າຍັງເປັນການຂາດດຸນທີ່ຢູ່່ໃນລະດັບສູງພໍສົມຄວນ ແລະ ຍັງມີຄວາມຈໍາເປັນຕ້ອງໄດ້ລະດົມແຫລ່ງດຸນດ່ຽງ ຈາກພາຍໃນ ແລະ ຕ່າງປະເທດ ໃຫ້ພຽງພໍກັບຄວາມຈໍາເປັນຂອງລາຍຈ່າຍຕ່າງໆຕາມແຜນການກໍານົດໄວ້.
