ສະມັດຊາໃຫຍ່ UN ຈະລົງມະຕິ ບໍ່ຍອມຮັບການຮັບຮອງເຢລູຊາເລມ
ສະມັດຊາໃຫຍ່ສະຫະປະຊາຊາດ (UN) ຈະເປີດກອງປະຊຸມສຸກເສີນໃນວັນທີ 21 ທັນວານີ້ ເພື່ອລົງມະຕິຍັດຕິບໍ່ຍອມຮັບການຮັບຮອງເຢລູຊາເລມເປັນເມືອງຫລວງຂອງອິດສະລາແອນ, ຫລັງຈາກອາເມລິກາໃຊ້ສິດຢັບຢັ້ງຍັດຕິແບບດຽວກັນໃນສະພາຄວາມໝັ້ນຄົງແຫ່ງສະຫະປະຊາຊາດ (UNSC) ໄປແລ້ວ.
.@USUN Ambassador Nikki Haley: Given the chance to vote again on Resolution 2234, I can say with complete confidence that the United States would vote no; we would exercise our veto power. pic.twitter.com/HZQ2YcjdVs
— Department of State (@StateDept) December 18, 2017
ທ່ານນາງ ນິກກີ ຮາລີ ເອກອັກຄະລັດຖະທູດອາເມລິກາປະຈຳ UN ຢັບຢັ້ງວ່າ: ສະມາຊິກ UN ມັກຂໍໃຫ້ອາເມລິກາກະທຳຫລາຍຂຶ້ນ. ດັ່ງນັ້ນ ເມື່ອອາເມລິກາຕັດສິນໃຈເລື່ອງທີ່ຕັ້ງຂອງສະຖານທູດອາເມລິກາຕາມເຈດຕະນາຂອງປະຊາຊົນອາເມລິກາ, ອາເມລິກາຈຶ່ງບໍ່ຄິດວ່າປະເທດເຫລົ່ານັ້ນຈະຫັນກັບມາຕອບໂຕ້, ແຕ່ນີ້ຈະມີການລົງມະຕິວິພາກວິຈານທາງເລືອກຂອງອາເມລິກາ ແລະ ຈະມີການຈົດຊື່ອາເມລິການຳອີກ.
ທ່ານນາງ ຮາລີ ໝາຍເຖິງເລື່ອງທີ່ຕວກກີ ແລະ ເຢເມນເປັນຕົວແທນກຸ່ມປະເທດອາຣັບ ແລະ ອົງການການຮ່ວມມືອິດສະລາມ (OIC) ຂໍໃຫ້ເປີດກອງປະຊຸມສຸກເສີນ 193 ປະເທດສະມັດຊາໃຫຍ່ UN ໂດຍໄດ້ວຽນຍັດຕິໃນວັນທີ 19 ທັນວາ ເນື້ອໃນຄ້າຍຄືຍັດຕິທີ່ເອຢິບສະເໜີຕໍ່ UNSC ໃນວັນທີ 18 ທັນວາ ແລະ ໄດ້ຮັບຄວາມເຫັນພ້ອມຈາກສະມາຊິກ 14 ປະເທດ ແຕ່ຖືກອາເມລິກາຢັບຢັ້ງ. ຍັດຕິທັງສອງສະບັບບໍ່ໄດ້ລະບຸວ່າ: ປະທານາທິບໍດີ ໂດນັນ ທຣຳ ຮັບຮອງເຢລູຊາເລມເປັນເມືອງຫລວງອິດສະລາແອນ, ແຕ່ສະແດງຄວາມເສຍໃຈຢ່າງຍິ່ງທີ່ມີການຕັດສິນໃຈກ່ຽວກັບສະຖານະພາບຂອງເຢລູຊາເລມ ແລະ ເຫັນວ່າບັນຫາເຢລູຊາເລມຈະຕ້ອງແກ້ໄຂດ້ວຍການຫາລືລະຫວ່າງອິດສະລາແອນກັບປາແລັດສະຕິນ.
ທ່ານ ຣິຍາດ ມັນຊູ ເອກອັກຄະລັດຖະທູດປາແລັດສະຕິນປະຈຳ UN ສະແດງຄວາມຫວັງວ່າ: ສະມັດຊາໃຫຍ່ UN ຈະໃຫ້ການສະໜັບສະໜູນຍັດຕິນີ້ຢ່າງຫລວງຫລາຍ ໂດຍບໍ່ຕ້ອງຢ້ານເລື່ອງຢັບຢັ້ງເພື່ອປະກາດວ່າ: ປະຊາຄົມໂລກບໍ່ຍອມຮັບຈຸດຢືນຕາມລຳພັງໃຈຂອງອາເມລິກາ.
