ອະດີດປະທານປະເທດຢ້ຽມຢາມສູນພັດທະນາກະສິກຳແຂວງສະຫວັນນະເຂດ

ເມື່ອທ້າຍອາທິດຜ່ານມາ, ທ່ານອະດີດປະທານປະເທດ ຈູມມາລີ ໄຊຍະສອນ ໄດ້ລົງເຄື່ອນໄຫວຢ້ຽມຢາມສູນພັດທະນາ ແລະ ບໍລິການກະສິກຳ-ປ່າໄມ້ໜອງເຕົ່າເຂດບ້ານໂພນສິມເມືອງໄກສອນພົມວິຫານແຂວງສະຫວັນນະເຂດ, ໂດຍມີທ່ານ ໂພໄຊ ໄຊຍະສອນ ຮອງເຈົ້າແຂວງດັ່ງກ່າວໃຫ້ການຕ້ອນຮັບຢ່າງອົບອຸ່ນ.

ໃນໂອກາດນີ້, ໄດ້ຮັບຟັງລາຍງານຈາກຮອງຫົວໜ້າສູນດັ່ງກ່າວວ່າ: ສູນພັດທະນາກະສິກໍາແຫ່ງນີ້ສ້າງຕັ້ງຂຶ້ນບົນພື້ນຖານການຮ່ວມມືລະຫວ່າງລາວ-ໄທ, ໂດຍມູນນິທິໄຊພັດທະນາໄດ້ດຳເນີນການກໍ່ສ້າງພື້ນຖານໂຄງລ່າງ, ພ້ອມທັງສະໜອງເຕັກນິກວິຊາການຝຶກອົບຮົມໃຫ້ພະນັກງານ ແລະ ປະຊາຊົນບ້ານໂພນສິມ ແລະ ບ້ານໃກ້ຄຽງຈໍານວນໜຶ່ງ, ເຊິ່ງເລີ່ມລົງມືແຕ່ປີ 2012 ເປັນຕົ້ນມາ, ພາຍໃນສູນປະກອບມີ: ໜ່ວຍງານລ້ຽງສັດ, ປະມົງ, ປູກຝັງ, ພັດທະນາທີ່ດິນ, ເຂົ້າດໍ, ຊົນລະປະທານ, ປ່າໄມ້, ມີພະນັກງານ 8 ຄົນ, ອາສາສະໝັກ 15 ຄົນ. ໃນໄລຍະຜ່ານມາສາມາດສ້າງລາຍຮັບຈາກການຈຳໜ່າຍຜົນຜະລິດໄດ້ຫລາຍກວ່າ 255 ລ້ານກີບ ແລະ ເປົ້າໝາຍແມ່ນຫັນເອົາບັນດາກິດຈະກຳຂອງສູນລົງໃຫ້ບໍລິການເຖິງກຸ່ມບ້ານ ແລະ ຊຸມຊົນໃຫ້ຫລາຍກວ່າເກົ່າ, ມາຮອດປັດຈຸບັນແມ່ນໄດ້ລົງຊຸກຍູ້ການຜະລິດຂອງປະຊາຊົນໃນຫລາຍບ້ານ ເພື່ອຜະລິດແນວພັນເຂົ້າດ້ວຍເຕັກນິກວິທະຍາສາດ.

ໂອກາດນີ້, ທ່ານອະດີດປະທານປະເທດ, ໄດ້ສະແດງຄວາມຊົມເຊີຍຕໍ່ສູນແຫ່ງນີ້, ເຊິ່ງເປັນບ່ອນສ້າງຄວາມເຂັ້ມແຂງດ້ານວິຊາການ, ການສາທິດ, ຝຶກອົບຮົມ ແລະ ສົ່ງເສີມຄວາມຮູ້ທາງດ້ານກະສິກຳ-ປ່າໄມ້ແບບຄົບວົງຈອນ ໃຫ້ກັບປະຊາຊົນໃນພື້ນທີ່ໃກ້ຄຽງ, ອັນໄດ້ຊ່ວຍໃຫ້ປະຊາຊົນໄດ້ເຂົ້າມາຮຽນຮູ້ວິທີການ ແລະ ເຕັກນິກກະສິກຳ ເພື່ອໄປນຳໃຊ້ໃນການພັດທະນາຄອບຄົວຢ່າງມີປະທິຜົນ, ພ້ອມທັງແນະນຳໃຫ້ພະນັກງານວິຊາການຂອງສູນແຫ່ງນີ້ຈົ່ງພະຍາຍາມລົງຊຸກຍູ້ພັດທະນາໂຄງການຕາມບ້ານຕ່າງໆເພື່ອຊ່ວຍໃຫ້ເຂົາເຈົ້າຮູ້ຈັກນຳໃຊ້ເຕັກນິກກຳສິກຳຫລາຍຂຶ້ນ, ສິ່ງສໍາຄັນແມ່ນຕ້ອງສ້າງໃຫ້ໄດ້ຄອບຄົວຕົວແບບໃນການປູກຝັງ-ລ້ຽງສັດໃຫ້ຫລາຍຂຶ້ນ ແລະ ເປັນຂະບວນກວ້າງຂວາງ.