ກະຊວງ ຖວທ ຫວນຄືນມູນເຊື້ອຊາວໜຸ່ມ ປະຊາຊົນປະຕິວັດລາວຄົບຮອບ 62 ປີ
ຄະນະບໍລິຫານງານຊາວໜຸ່ມກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ຈັດພິທີປາຖະກະຖາຫວນຄືນມູນເຊື້ອຊາວໜຸ່ມປະຊາຊົນປະຕິວັດລາວ (ຊປປ ລາວ) ຄົບຮອບ 62 ປີ (14 ເມສາ 1955-14 ເມສາ 2017), ໂດຍການປາຖະກາຖາຂອງສະຫາຍ ອາລຸນໄຊ ສູນນະລາດ ກຳມະການສຳຮອງສູນກາງພັກ, ຮອງເລຂາຄະນະບໍລິຫານງານສູນກາງ ຊປປ ລາວ.
ໃນໂອກາດດັ່ງກ່າວ, ສະຫາຍ ບົວໄລ ພານຸວົງ ເລຂາຄະນະບໍລິຫານງານຊາວໜຸ່ມກະຊວງ ຖວທ ໄດ້ລາຍງານວ່າ: ໃນໄລຍະໜຶ່ງປີຜ່ານມາໄດ້ສຶກສາອົບຮົມການເມືອງແນວຄິດໃຫ້ແກ່ຊາວໜຸ່ມ-ໄວໜຸ່ມພາຍໃນກະຊວງ ເພື່ອເຮັດໃຫ້ມີຄວາມຮູ້, ຄວາມສາມາດ, ມີແບບແຜນດຳລົງຊີວິດທີ່ປອດໃສຂາວສະອາດ, ມີຄວາມຮັກຊາດ ແລະ ການພັດທະນາ, ຢຶດໝັ້ນອຸດົມການຂອງພັກ, ເປັນຊາວໜຸ່ມທີ່ດີ, ເກັ່ງ ແລະ ທັນສະໄໝ, ເຊິ່ງຂະບວນການສຶກສາອົບຮົມດັ່ງກ່າວໄດ້ສະແດງອອກຈາກການເຄື່ອນໄຫວຕົວຈິງຄື: ຮັບຟັງການລາຍງານສະພາບການທີ່ເກີດຂຶ້ນທັງພາຍໃນ ແລະ ສາກົນ, ຮັບຟັງການເຜີຍແຜ່ມະຕິ, ຄຳສັ່ງ, ກົດໝາຍ ແລະ ລະບຽບການຕ່າງໆຂອງພັກ-ລັດ, ຂອງຊາວໜຸ່ມ, ຮັບຟັງປາຖະກະຖາມູນເຊື້ອຂອງພັກ, ຂອງຊາດ, ຂອງວິລະບູລຸດ ແລະ ໄປທັດສະນະສຶກສາ, ຢ້ຽມຊົມຫໍມູນເຊື້ອປະຫວັດສາດຕ່າງໆ, ພ້ອມດຽວກັນນັ້ນກໍໄດ້ສ້າງຕັ້ງຮາກຖານຊາວໜຸ່ມຂຶ້ນໃໝ່ 2 ຮາກຖານຊາວໜຸ່ມ, ສ້າງໜ່ວຍຊາວໜຸ່ມຂຶ້ນໃໝ່ ທີ່ຂຶ້ນກັບສອງໜ່ວຍຮາກຖານ 9 ໜ່ວຍ, ທົ່ວກະຊວງລວມເປັນ 41 ໜ່ວຍ, ມີສະມາຊິກທັງໝົດ 1.549 ສະຫາຍ, ຍິງ 506 ສະຫາຍ.
ໃນຕອນທ້າຍ, ສະຫາຍ ອາລຸນໄຊ ສູນນະລາດ ໄດ້ເລົ່າຄືນມູນເຊື້ອການເຕີບໃຫຍ່ຂະຫຍາຍຕົວຂອງຊາວໜຸ່ມປະຊາຊົນປະຕິລັດລາວຕະຫລອດໄລຍະ 62 ປີ, ເຊິ່ງໄດ້ຍົກໃຫ້ເຫັນມູນເຊື້ອຂອງຊາວໜຸ່ມໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ພ້ອມທັງຮຽກຮ້ອງໃຫ້ບັນດາສະຫາຍ ຊາວໜຸ່ມໃນຮຸ່ນປັດຈຸບັນຈົ່ງເອົາໃຈໃສ່ສຶກສາຮໍ່າຮຽນ, ຮັກສາໄດ້ວັດທະນະທຳຮີດຄອງປະເພນີອັນດີງາມຂອງຊາດລາວ, ພ້ອມທັງອອກແຮງແຂ່ງຂັນສ້າງຜົນງານຕາມຂໍ້ແຂ່ງຂັນ 4 ບຸກຂອງຊາວໜຸ່ມປະຊາຊົນປະຕິວັດລາວໃຫ້ປະກົດຜົນເປັນຈິງ.
