ຜູ້ປູກປາມນ້ຳມັນມາເລເຊຍຂາດເຂີນແຮງງານ

      ຜູ້ປູກປາມນ້ຳມັນຢູ່ມາເລເຊຍພວມຂາດເຂີນແຮງງານຢ່າງໜັກ ເນື່ອງຈາກແຮງງານສ່ວນຫລາຍເປັນຊາວ ອິນໂດເນເຊຍພາກັນກັບປະເທດເພາະເງິນຣິງກິດມາເລເຊຍອ່ອນຄ່າ ແລະ ບ້ານເກີດມີໂອກາດການເຮັດວຽກ ຫລາຍຂຶ້ນ.

ເວັບໄຊໜັງສືພິມເດິສະຕາອອນລາຍຂອງມາເລເຊຍລາຍງານວ່າ: ການຂາດເຂີນແຮງງານອາດເຮັດໃຫ້ມາເລ ເຊຍໃນຖານະຜູ້ຜະລິດນ້ຳມັນປາມອັນດັບສອງຂອງໂລກເກັບກ່ຽວຜົນຜະລິດໄດ້ຊັກຊ້າ ແລະ ໜ້ອຍລົງ, ແຕ່ອາດ ຊ່ວຍຮັກສາລາຄາປາມນ້ຳມັນໃຫ້ເພີ່ມຂຶ້ນ ພາຍຫລັງຫລຸດລົງໄປເກືອບ 5% ແລ້ວໃນປີນີ້. ຜູ້ປູກປາມນ້ຳມັນມາເລ ເຊຍຄາດວ່າ: ແຮງງານປະມານ 70% ມາຈາກອິນໂດເນເຊຍ, ແຕ່ກ່ອນມາເຮັດວຽກເພາະຄ່າຈ້າງສູງກວ່າບ້ານ ເກີດ ແລະ ມີວັດທະນະທຳຄ້າຍຄືກັນ, ແຕ່ເງິນຣິງກິດມາເລເຊຍທຽບໃສ່ເງິນຣູເປຍອິນໂດເນເຊຍອ່ອນຄ່າລົງ ແລ້ວ 15% ນັບແຕ່ຕົ້ນປີ 2014 ບວກກັບອິນໂດເນເຊຍເລີ່ມປູກປາມນ້ຳມັນຫລາຍຂຶ້ນ ຈຶ່ງມີຄວາມຕ້ອງການ ແຮງງານເພີ່ມຂຶ້ນ. ນອກຈາກນີ້ ຍັງເປັນຜົນຈາກການທີ່ມາເລເຊຍເຂັ້ມງວດຂະບວນການກວດກາແຮງງານ ຕ່າງຊາດເຂົ້າເມືອງຫລາຍຂຶ້ນ.

ແຮງງານປູກປາມນ້ຳມັນຈະໄດ້ຄ່າຈ້າງສູງກວ່າຄ່າຈ້າງຂັ້ນຕໍ່າພຽງເລັກໜ້ອຍ, ຄ່າຈ້າງຂັ້ນຕໍ່າຂອງມາເລເຊຍ ແມ່ນ 1.000 ຣິງກິດ, ສ່ວນຄ່າຈ້າງຂັ້ນຕໍ່າຂອງອິນໂດເນເຊຍແມ່ນ 3,35 ລ້ານຣູເປຍ. ຜູ້ປູກປາມນ້ຳມັນຢູ່ມາເລ ເຊຍຄົນໜຶ່ງຍອມຮັບວ່າ: ສະຖານະການປັດຈຸບັນນີ້ຊຸດໂຊມຫລາຍເມື່ອທຽບໃສ່ປີກ່ອນໆ, ຖ້າຈະຈ້າງແຮງງານ ຈາກປະເທດອື່ນເຊັ່ນ: ບັງກະລາເທດກໍຕ້ອງໃຊ້ເວລາຫລາຍເດືອນ, ແຕ່ຕ້ອງເລັ່ງແກ້ໄຂບັນຫາຂາດເຂີນແຮງ ງານໃຫ້ໄດ້ກ່ອນຜົນຜະລິດປາມນ້ຳມັນຈະອອກຫລາຍທີ່ສຸດໃນໄຕມາດສາມ ແລະ ສີ່ຂອງປີ. ປີຜ່ານມາ ມາເລເຊຍ ຜະລິດນ້ຳມັນປາມໄດ້ 17,3 ລ້ານໂຕນ, ສ່ວນອິນໂດເນເຊຍຜະລິດໄດ້ 31,8 ລ້ານໂຕນ.