ລາວໂຕໂຢຕ້າ ເສຍໃຫ້ ຊານນາ 0-2 ປະຕູ ໃນລາຍການແມ່ຂອງຄັບ
ສະໂມສອນລາວໂຕໂຢຕ້າ ເອັຟຊີ ແຊ້ມລາວພຣີເມຍລີກ ທີ່ໄດ້ສິດຢືນໃນຮອບຮອງຊະນະເລີດ ໃນການແຂ່ງຂັນເຕະບານໂຕໂຢຕ້າ ແມ່ຂອງ ຄລັບ ແຊ້ມປ້ຽນຊິບ 2017 ລົງສະໜາມເສຍໃຫ້ ຊານນາ ກັນ ຫົວ (Sanna Khanh Hoa ) ທີມຈາກ ສສ ຫວຽດນາມ 0-2 ປະຕູ ໃນວັນທີ 17 ທັນວາ 2017 ທີ່ສະໜາມກິລາແຫ່ງຊາດລາວ ຫລັກ 16.
ການແຂ່ງຂັນໄດ້ດໍາເນີນໄປດ້ວຍບັນຍາກາດຟົດຟື້ນຂອງກອງເຊຍສະໂມສອນລາວໂຕໂຢຕ້າເອັຟຊີ ເຊິ່ງໃນເຄິ່ງເວລາທໍາອິດທີມຊານນາ ກັນ ຫົວ ສາມາດຫລິ້ນໄດ້ດີກວ່າ ແລະ ສາມາດຍິງປະຕູຂຶ້ນນໍາໃນນາທີ 34 ຈາກລູກຍິງຂອງທ້າວ ຫວຽນຕັນໄຕ 1-0 ປະຕູ ຫລັງຈາກນັ້ນ ສະໂມສອນລາວໂຕໂຢຕ້າກໍພະຍາຍາມທີ່ຈະຍິງປະຕູໃຫ້ໄດ້ ແຕ່ກໍຖືກການສະກັດຈາກທີມດັ່ງກ່າວ ຈົບເກມໃນເຄິ່ງເວລາທໍາອິດທີມຊານນາກັນຫົວສາມາດຂຶ້ນນໍາລາວໂຕໂຢຕ້າ ເອັຟຊີ 1-0 ປະຕູ. ພາຍຫລັງເຂົ້າເຄິ່ງເວລາທີ 2 ສະໂມສອນລາວໂຕໂຢຕ້າ ເອັຟຊີ ໄດ້ປ່ຽນຜູ້ຫລິ້ນ 2 ຄົນ ເພື່ອເອົາຊະນະໃຫ້ໄດ້ ແຕ່ກໍບໍ່ສາມາດເຮັດຫຍັງໄດ້ ເພາະທີມຊານນາກັນຫົວ ກໍໄດ້ໃຊ້ເກມບຸກ ພ້ອມທັງປ້ອງກັນຢ່າງເຕັມທີ ຈົນມາຮອດນາທີ 73 ທີມຊານນາກັນຫົວສາມາດຍິງປະຕູຂຶ້ນນໍາເປັນປະຕູທີ 2 ຈາກລູກຍິງຂອງທ້າວ Toure youssouf ຈົບເກມທີມຊານນາກັນຫົວຊະນະສະໂມສອນລາວໂຕໂຢຕ້າ ເອັຟຊີ 2-0 ປະຕູ ສົ່ງຜົນໃຫ້ທີມຊານນາກັນຫົວຜ່ານເຂົ້າຮອບຊີງຊະນະເລີດກັບສະໂມສອນເມືອງທອງ ຢູໄນເຕັດ ໃນຕົ້ນເດືອນມັງກອນ 2018.
ສໍາລັບຜົນງານຂອງທີມຊານນາ ກັນ ຫົວ ທີມຈາກ ສສ ຫວຽດນາມ ລົງສະໜາມພົບກັບ ບຶງ ເກັດ ອັງກໍ ທີມຈາກກໍາປູເຈຍ 2 ນັດ ປາກົດວ່ານັດທໍາອິດແຂ່ງຂັນວັນທີ 9 ທັນວາຜ່ານມາ ສະເໝີກັນ 4-4 ປະຕູ ກ່ອນນັດທີ 2 ຈະເປັນ ຊານນາ ບຸກເອົາຊະນະ ທີມຈາກກໍາປູເຈຍ ຂາດລອຍ 5-1 ປະຕູເຮັດໃຫ້ຜົນລວມ 2 ນັດ ຊານນາກັນຫົວ ເອົາຊະນະໄປ 9-5 ປະຕູຜ່ານເຂົ້າຮອບຮອງຊະນະເລີດ ຊະນະ ສະໂມສອນລາວໂຕໂຢຕ້າ ເອັຟຊີ 2-0 ປະຕູ ສົ່ງຜົນຜ່ານເຂົ້າຮອບຊີງຊະນະເລີດພົບກັບສະໂມສອນເມືອງທອງຢູໄນເຕັດ.
