ສຳເລັດການແຂ່ງຂັນກິລາບານເຕະຊີງຂັນ ທ່ານເຈົ້າແຂວງຫຼວງພະບາງ
ການແຂ່ງຂັນກິລາບານເຕະຊີງຂັນທ່ານເຈົ້າແຂວງຫຼວງພະບາງ ເພື່ອສະເຫຼີມສະຫຼອງວັນຊາດທີ 2 ທັນວາ ຄົບຮອບ 42 ປີ ແລະ ວັນເກີດປະທານໄກສອນ ພົມວິຫານ ວັນທີ 13 ທັນວາ ຄົບຮອບ 97 ປີ ໄດ້ສຳເລັດລົງຢ່າງສະຫງ່າງາມ ໃນຕອນແລງວັນທີ 14 ທັນວານີ້ ພາຍຫຼັງເລີ່ມແຂ່ງຂັນມາແຕ່ວັນທີ 18 ພະຈິກ ໂດຍມີທັງໝົດ 7 ທີມເຂົ້າຮ່ວມການແຂ່ງຂັນ ແບ່ງອອກເປັນ 2 ສາຍຄື: ສາຍ ກ ປະກອບມີ ທະນາຄານແຂວງ, ເມືອງໂພນໄຊ ແລະ ທິບພະຍະປະກັນໄພ. ສາຍ ຂ ປະກອບມີ: ບໍລິສັດຮຸ່ງວິໄລກໍ່ສ້າງເຄຫາສະຖານຈຳກັດ, ລັດວິສາຫະກິດໄຟຟ້າລາວສາຂາແຂວງຫຼວງພະບາງ, ໂດມີນິກ ແລະ ນອກກອບ. ຜ່ານການແຂ່ງຂັນດ້ວຍບັນຍາກາດອັນຟົດຟື້ນນັ້ນ ຊະນະເລີດໄດ້ແກ່ຄະນະທະນາຄານແຂວງໄດ້ຮັບຂັນລາງວັນ ພ້ອມເງິນສົດ 7 ລ້ານກີບ, ອັນດັບທີ 2 ເມືອງໂພນໄຊ ໄດ້ຮັບຂັນລາງວັນ ພ້ອມເງິນສົດ 5 ລ້ານກີບ, ອັນດັບທີ 3 ບໍລິສັດຮຸ່ງວິໄລກໍ່ສ້າງເຄຫາສະຖານ ໄດ້ຮັບຂັນລາງວັນ ພ້ອມເງິນສົດ 3 ລ້ານກີບ ແລະ ອັນດັບທີ 4 ໄດ້ແກ່ຄະນະໂດມີນິກ ໄດ້ຮັບລາງວັນເງິນສົດ 2 ລ້ານກີບ ໂດຍທ່ານ ຄຳຂັນ ຈັນທະວີສຸກ ເຈົ້າແຂວງຫຼວງພະບາງ ໄດ້ໃຫ້ກຽດຂຶ້ນມອບຂັນລາງວັນດັ່ງກ່າວ.
