ຜັກ ແລະ ໝາກໄມ້ສີເຫລືອງຊ່ວຍປ້ອງກັນພະຍາດມະເຮັງໃຫ້ແມ່ຍິງ

ນັກວິໄຈມະຫາວິທະຍາໄລ ຮາວາຍຂອງສະຫະລັດອາເມລິກາ ແນະນຳໃຫ້ແມ່ຍິງບໍລິໂພກຜັກ ແລະ ໝາກໄມ້ຫລາຍໆເພື່ອຈະ ປ້ອງກັນພະຍາດມະເຮັງພົກຍ່ຽວ.

ພວກເຂົາລາຍງານໃນວາລະສານໂພຊະນາການວ່າ : ຈາກການສຶກສາກັບແມ່ຍິງອາຍຸສູງຈຳນວນ 185.885 ຄົນ ເປັນເວລາ ດົນເຖິງ 12 ປີ 6 ເດືອນ ໄດ້ພົບວ່າ : ແມ່ຍິງທີ່ກິນຜັກ ແລະ ໝາກໄມ້ຫລາຍທີ່ສຸດຈະມີໂອກາດເປັນພະຍາດມະເຮັງພົກຍ່ຽວໄດ້ໜ້ອຍທີ່ສຸດ ໂດຍຄົນທີ່ກິນຜັກ ແລະ ໝາກໄມ້ສີເຫລືອງຈະປ້ອງກັນພະຍາດໄດ້ຫລາຍກ່ວາຜູ້ທີ່ກິນໜ້ອຍທີ່ສຸດເຖິງ 52% ແລະ ກໍຍັງພົບຕື່ມວ່າ : ແມ່ຍິງທີ່ກິນວິຕາມິນອາ, ວິຕາມິນເຊ ແລະ ວິຕາມິນເອີຫລາຍທີ່ສຸດກໍເປັນພະຍາດມະເຮັງຊະນິດນີ້ໄດ້ຍາກຄືກັນ, ແຕ່ແນວໃດກໍຕາມ, ຜົນຂອງການວິໄຈນີ້ບໍ່ໄດ້ກ່ຽວຂ້ອງກັບຜູ້ຊາຍເລີຍ.