ເອດີບີ ມີແຜນສະໜັບສະໜູນໂຄງການຕາມແລວທາງ R3

ແຫລ່ງຂ່າວ ຂປລ ໃຫ້ຮູ້ວ່າ: ຜູ້ຕາງໜ້າທະນາຄານພັດທະນາອາຊີປະຈໍາລາວ ໄດ້ເປີດເຜີຍໃຫ້ຮູ້ວ່າ: ທະນາຄານຂອງຕົນມີແຜນຈະສືບຕໍ່ສ້າງແຜນຍຸດທະສາດການຮ່ວມມືທີ່ຈະສະໜັບສະໜູນໂຄງການຕາມແລວທາງເສດຖະກິດ R3, ພ້ອມຈະມີການສົມທົບກັບອໍານາດການປົກຄອງແຂວງ ເພື່ອໃຫ້ການສະໜັບສະໜູນການພັດທະນາພື້ນຖານໂຄງລ່າງຕ່າງໆ, ໂດຍສະເພາະແມ່ນການສ້າງເສັ້ນທາງໃຫ້ເຊື່ອມຈອດລະຫວ່າງເມືອງ, ແຂວງທີ່ທຸກຍາກເຂົ້າມາຫາທາງ R3.

ທ່ານ ຢະຊຸຊິ ເນກິຊິ ຜູ້ຕາງໜ້າທະນາຄານ ADB ໄດ້ເປີດເຜີຍໃຫ້ຮູ້ໃນໂອກາດເດີນທາງໄປຢ້ຽມຢາມບັນດາໂຄງການພັດທະນາຕາມແລວເສັ້ນທາງເສດຖະກິດພາກເໜືອ ກໍຄືຢູ່ແຂວງຫລວງນໍ້າທາວ່າ: ເສັ້ນທາງ R3 ຖືວ່າເປັນເສັ້ນທາງຍຸດທະສາດຂອງ ສປປ ລາວ, ເຊິ່ງນອນຢູ່ໃນແຜນການພັດທະນາພື້ນຖານໂຄງລ່າງຂອງແຂວງພາກເໜືອ, ໂດຍສະເພາະແມ່ນແຂວງຫລວງນໍ້າທາ ແລະ ແຂວງບໍ່ແກ້ວ, ເຊິ່ງເປັນເສັ້ນທາງເຊື່ອມຈອດກັບ ສປຈີນ ແລະ ບັນດາປະເທດໃນອາຊຽນ. ເຫັນວ່າພາຍຫລັງໄດ້ກໍ່ສ້າງສໍາເລັດໄດ້ເຮັດໃຫ້ການພັດທະນາຢູ່ຕາມແລວເສັ້ນທາງດັ່ງກ່າວດີຂຶ້ນ ແລະ ໃນແຕ່ລະປີຜ່ານມານີ້, ເອດີບີ ກໍໄດ້ປະກອບສ່ວນສະໜັບສະໜູນການພັດທະນາຢູ່ລາວປະມານ 3% ຂອງ GDPເທົ່າກັບ 100 ກວ່າລ້ານໂດລາສະຫະລັດ.

ທ່ານ ຢະຊຸຊິ ເນກິຊິ ໃຫ້ຮູ້ຕື່ມວ່າ: ເພື່ອເຮັດໃຫ້ການລົງທຶນຕາມແລວທາງເສດຖະກິດ ທີ່ສາ ມາດໄດ້ຮັບຜົນປະໂຫຍດຈາກການຂະຫຍາຍຕົວນີ້ ABD ຈະໄດ້ສ້າງແຜນຍຸດທະສາດການຮ່ວມມືໃໝ່ທີ່ພວກເຮົາວາງແຜນໄວ້ ເພື່ອສະໜັບສະໜູນໂຄງການຕາມແລວທາງເສດຖະກິດ, ໂດຍສະເພາະຈະສືບຕໍ່ສະໜັບສະໜູນປະຊາຊົນ ເພື່ອໃຫ້ພວກເຂົາມີເງື່ອນໄຂຕໍ່ສົ່ງອອກຜະລິດຕະພັນສິນຄ້າອັນຫລາກຫລາຍໃຫ້ບັນດາປະເທດໃກ້ຄຽງ ແລະ ສິ່ງນີ້ຈະຊ່ວຍຍົກລະດັບຊີວິດການເປັນຢູ່ຂອງປະຊາຊົນດີຂຶ້ນ.