ອັດຕາເງິນເຟີ້ຂອງ ສປປ ລາວ ຫລຸດລົງຢ່າງໜ້າເພິ່ງພໍໃຈ
ບົດລາຍງານດ້ານເສດຖະກິດຂອງ ສປປ ລາວ ສະບັບຫລ້າສຸດຂອງທະນາຄານໂລກ ໃຫ້ຮູ້ວ່າ: ການເຕີບໂຕຂອງເສດຖະກິດລາວຍັງຈະສືບຕໍ່ຂະຫຍາຍຕົວຢູ່ໃນລະດັບ 6,7% ໃນປີ 2017 ແລະ ຈະຊ່ວຍຫລຸດຜ່ອນຄວາມທຸກຍາກໃນ ສປປ ລາວ. ພ້ອມນີ້, ອັດຕາເງິນເຟີ້ຫລຸດລົງຢ່າງໜ້າເພິ່ງພໍໃຈ, ອັນໄດ້ຊ່ວຍດຸ່ນດ່ຽງລາຄານ້ຳມັນທີ່ຄ່ອຍໆເພີ່ມຂຶ້ນ, ການຄຸ້ມຄອງເສດຖະກິດໂດຍລວມມີການປັບປຸງດີຂຶ້ນ, ລັດຖະບານໄດ້ມີການດັດສົມລາຍຈ່າຍຍ້ອນລາຍຮັບບໍ່ໄດ້ຕາມຄາດໝາຍ ແລະ ການຄຸ້ມຄອງອັດຕາແລກປ່ຽນໄດ້ດີຂຶ້ນ.
ທ່ານ ຊອນຄຣິສຕົບ ກາເຣັດ ຫົວໜ້າຫ້ອງການທະນາຄານໂລກປະຈຳລາວ ກ່າວວ່າ: ສປປ ລາວ ສາມາດຮັກສາການເຕີບໂຕທາງດ້ານເສດຖະກິດໃນລະດັບສູງໃນຫລາຍທົດສະຫວັດທີ່ຜ່ານມາ, ເຊິ່ງເຮັດໃຫ້ຫລາຍພັນຄອບຄົວຫລຸດພົ້ນອອກຈາກຄວາມທຸກຍາກ, ການຄຸ້ມຄອງເສດຖະກິດມະຫາພາກເຂັ້ມແຂງກວ່າເກົ່າ, ການປະຕິຮູບສິ່ງແວດລ້ອມໃນການດຳເນີນທຸລະກິດ ແລະ ຊຸກຍູ້ພາກເອກະຊົນໃຫ້ມີການຂະຫຍາຍຕົວສາມາດເຮັດໃຫ້ ສປປ ລາວ ຮັກສາການເຕີບໂຕ ແລະ ສືບຕໍ່ຫລຸດພົ້ນຄວາມທຸກຍາກ, ໃນໄລຍະກາງໂດຍລວມມີທ່າອ່ຽງບວກ, ແຕ່ການເຕີບໂຕຂອງເສດຖະກິດຄາດວ່າຈະສືບຕໍ່ຊ້າລົງເລັກນ້ອຍໃນປີໜ້າ ກ່ອນຈະກັບມາຂະຫຍາຍຕົວໄວຂຶ້ນໃນສົກປີ 2019-2020, ເນື່ອງຈາກວ່າບັນດາໂຄງການໄຟຟ້າຂະໜາດໃຫຍ່ຈະເລີ່ມການຜະລິດ, ການຫລຸດຜ່ອນຄວາມບອບບາງທາງດ້ານເສດຖະກິດມະຫາພາກ, ການປັບປຸງສິ່ງແວດລ້ອມ ທາງດ້ານການດຳເນີນທຸລະກິດ ແລະ ການຄຸ້ມຄອງຂະແໜງພະລັງງານໄຟຟ້າ ທີ່ເຂັ້ມແຂງຂຶ້ນ.
ໃນສອງທົດສະວັດທີ່ຜ່ານມາ ຂະແໜງພະລັງງານ ໄດ້ມີບົດບາດສຳຄັນໃນການຊຸກຍູ້ການພັດທະ ນາແຫ່ງຊາດ ໂດຍສະເພາະປະກອບສ່ວນສ້າງເສດຖະກິດ ໃຫ້ມີການຂະຫຍາຍຕົວ, ໂດຍຜ່ານການລົງທຶນ, ການສະໜອງໄຟຟ້າໃຫ້ສັງຄົມ ແລະ ເພີ່ມລາຍຮັບ ຈາກການສົ່ງອອກໃຫ້ສູງຂຶ້ນກວ່າເກົ່າ, ແຕ່ເຖິງຢ່າງໃດກໍຕາມຂະແໜງດັ່ງກ່າວ, ຍັງມີຄວາມສ່ຽງໂດຍສະເພາະ ແມ່ນຕິດພັນກັບຄວາມຍືນຍົງທາງດ້ານຂະແໜງການເງິນ ເຊິ່ງອາດຈະຊ່ວຍຫລຸດຜ່ອນລົງໄດ້ ໂດຍການປັບປຸງການວາງແຜນພັດທະນາໂຄງການ ແລະ ຂັ້ນຕອນການຄັດເລືອກໂຄງການ, ຊອກຫາຕະຫລາດທີ່ສາມາດຮັບຮອງການສົ່ງອອກໄຟຟ້າ ທີ່ໃຫ້ລາຄາດີ ແລະ ປັບປຸງການດຳເນີນທຸລະກິດ, ພ້ອມທັງການຈັດຕັ້ງຂອງຫົວໜ່ວຍທຸລະກິດ ໃນຂະແໜງການສາທາລະນຸປະໂພກ ໃຫ້ດີຂຶ້ນກວ່າເກົ່າ.
