ທ່ານ ດູເຕີເຕ ຮຽກຮ້ອງລັດຖະສະພາ ຂໍຂະຫຍາຍກົດໄອຍະການເສິກ ຢູ່ເກາະມິນດາເນົາຮອດປີໜ້າ
December 11, 2017 - 6:34 PM
ປະທານາທິບໍດີ ໂຣດຣິໂກ ດູເຕີເຕ ຂອງຟີລິບປິນ ຮຽກຮ້ອງຕໍ່ລັດຖະສະພາຂໍຂະຫຍາຍເວລາການປະກາດກົດໄອຍະການເສິກຢູ່ເກາະມິນດາເນົາທາງພາກໃຕ້ ອອກໄປຮອດທ້າຍປີໜ້າ ເພື່ອປາບປາມກຸ່ມນັກຮົບມຸດສະລິມຫົວຮຸນແຮງ ແລະ ກອມມູນິດ.
ການປະກາດກົດໄອຍະການເສິກຈະມີເວລາຈຳກັດພຽງ 60 ວັນ ຕາມລັດຖະທຳມະນູນກຳນົດເອົາໄວ້, ແຕ່ໃນເດືອນກໍລະກົດຜ່ານມາ ລັດຖະສະພາໃຫ້ການຮັບຮອງຂະຫຍາຍເວລາໄປຮອດທ້າຍປີນີ້ ເພື່ອປາບປາມກຸ່ມມືປືນທີ່ບຸກຍຶດເມືອງມາລາວີໃນເດືອນພຶດສະພາຜ່ານມາ ເຊິ່ງລັດຖະບານຕ້ອງໃຊ້ເວລາກວ່າ 5 ເດືອນ ຈຶ່ງສາມາດປົດປ່ອຍເມືອງມາລາວີໄດ້, ແຕ່ກໍເຕືອນວ່າກຸ່ມຫົວຮຸນແຮງອາດລວມຕົວກັນ ແລະ ກັບມາປະຕິບັດການໄດ້ອີກ.
