ຜູ້ນຳອິດສະລາແອນຊີ້ເຢລູຊາເລມ ເປັນຂອງອິດສະລາແອນເທົ່ານັ້ນ
ທ່ານ ເບນຈາມິນ ເນຕັນຢາຮູ ນາຍົກລັດຖະມົນຕີອິດສະລາແອນ ກ່າວຮຽກຮ້ອງໃຫ້ຊາວປາແລັສຕິນ “ຍອມຮັບຄວາມຈິງ” ທີ່ວ່ານະຄອນເຢລູຊາເລມຄືເມືອງຫລວງຂອງຊາວອິດສະລາແອນ ເພື່ອໃຫ້ທັງສອງຝ່າຍສາມາດເດີນໜ້າໄປສູ່ສັນຕິພາບໄດ້.
ທ່ານ ເນຕັນຢາຮູ ກ່າວພາຍຫລັງພົບປະຫາລືກັບປະທານາທິບໍດີ ເອັມມານູເອລ ມາຄຣົງ ຂອງຝຣັ່ງ ຢູ່ນະຄອນຫລວງປາຣີ. ທັງຍັງເນັ້ນວ່າ: “ເຢລູຊາເລມເປັນນະຄອນຫລວງຂອງອິດສະລາແອນມາເຖິງ 3.000 ປີ ແລະ ບໍ່ເຄີຍເປັນເມືອງຫລວງຂອງຊົນຊາດອື່ນໃດ, ຄວາມພະຍາຍາມປະຕິເສດສາຍສຳພັນເກົ່າແກ່ຫລາຍສະຫັດສະວັດລະຫວ່າງຊາວຢິວກັບເຢລູຊາເລມເປັນເລື່ອງທີ່ໄຮ້ເຫດຜົນ”.
“ຍິ່ງຊາວປາແລັສຕິນຍອມຮັບຄວາມຈິງນີ້ໄດ້ໄວເທົ່າໃດ ກໍຍິ່ງເຮັດໃຫ້ເດີນໜ້າໄປສູ່ສັນຕິພາບໄດ້ໄວເທົ່ານັ້ນ” ທ່ານ ເນຕັນຢາຮູ ກ່າວ.
ດ້ານໂຄສົກຂອງຮອງປະທານາທິບໍດີ ໄມ ເພນ ຂອງອາເມລິກາ ອອກມາຖະແຫລງສະແດງຄວາມຜິດຫວັງທີ່ປະທານາທິບໍດີ ມາມຸດ ອັບບາດ ຂອງປາແລັສຕິນ ຈະບໍ່ພົບປະຫາລືກັບທ່ານ ເພນ ລະຫວ່າງການຢ້ຽມຢາມຕາເວັນອອກກາງຂອງທ່ານໃນເດືອນນີ້ ເພື່ອປະທ້ວງການຕັດສິນໃຈຂອງຜູ້ນຳອາເມລິກາ ທີ່ຮັບຮອງເຢລູຊາເລມເປັນເມືອງຫລວງຂອງອິດສະລາແອນ. ນອກຈາກນີ້ ບັນດາຜູ້ນຳທາງສາສະໜາຂອງຊາວຄຣິສ ແລະ ມຸດສະລິມຢູ່ເອຢິບ ໄດ້ຍົກເລີກການພົບປະຫາລືກັບທ່ານ ເພນ ເຊັ່ນກັນ.
ເຫດຊຸມນຸມປະທ້ວງຕໍ່ຕ້ານການຮັບຮອງນະຄອນເຢລູຊາເລມຂອງອາເມລິກາ ຂະຫຍາຍວົງກວ້າງອອກໄປຢ່າງວ່ອງໄວໃນໂລກມຸດສະລິມ ໂດຍຍັງມີຄົນຈຳນວນຫລາຍອອກມາຮ່ວມຊຸມນຸມໜ້າສະຖານທູດອາເມລິກາ ໃນເຂດເມືອງຫລວງຂອງເອຢິບ, ໂມຣອກໂກ, ລີບັງ, ຕວກກີ ແລະ ອິນໂດເນເຊຍ.
ສ່ວນຢູ່ນະຄອນເຢລູຊາເລມນັ້ນ ມີຊາວປາແລັສຕິນຜູ້ໜຶ່ງຖືກຈັບກຸມ ຫລັງໃຊ້ມີດແທງເຈົ້າໜ້າທີ່ຮັກສາຄວາມປອດໄພຊາວອິດສະລາແອນທີ່ສະຖານີລົດໂດຍສານກາງ ໃນເຂດເວສແບງ ແລະ ສະນວນກາຊາຍັງມີການປະທະກັນລະຫວ່າງກອງກຳລັງອິດສະລາແອນ ແລະ ຜູ້ປະທ້ວງຊາວປາແລັສຕິນ ໂດຍກອງກຳລັງອິດສະລາແອນແຈ້ງວ່າໄດ້ລະເບີດທຳລາຍອຸໂມງໃຕ້ດິນແຫ່ງໜຶ່ງທີ່ເຊື່ອມຕໍ່ກັບສະນວນກາຊາ ເພື່ອປ້ອງກັນກຸ່ມຕິດອາວຸດລັກລອບເຂົ້າມາໂຈມຕີ.
