ສິ່ງທີ່ທ່ານຄວນຮູ້ກ່ອນຈະໄປບໍລິຈາກເລືອດ

ຖືເປັນບຸນກຸສົນໜຶ່ງສຳລັບການບໍລິຈາກເລືອດ, ແຕ່ສຳລັບຜູ້ທີ່ບໍ່ເຄີຍໄປບໍລິຈາກເລືອດ ຢາກລອງໄປຈັກເທື່ອ ກໍມີເລື່ອງຕ້ອງ ກຽມຮ່າງກາຍໃຫ້ພ້ອມຄືກັນ ທັງກ່ອນ ແລະ ຫລັງການບໍລິຈາກ ໂດຍຄຸນສົມບັດຂອງຜູ້ບໍລິຈາກນັ້ນມີດັ່ງນີ້ :

– ນຳ້ໜັກໂຕນັບແຕ່ 45 ກິໂລ ກຣາມຂຶ້ນໄປ, ສຸຂະພາບແຂງແຮງ ພ້ອມທີ່ຈະບໍລິຈາກເລືອດ.

– ມີອາຍຸລະຫ່ວາງ 17 – 70 ປີ, ຜູ້ທີ່ມີອາຍຸ 17 ປີຕ້ອງມີໜັງສືຍິນຍອມຈາກຜູ້ປົກຄອງ ຫາກເປັນຜູ້ບໍລິຈາກເທື່ອທຳອິດ ແລະ  ອາຍຸຕ້ອງບໍ່ເກີນ 55 ປີ.

ສ່ວນການກຽມໂຕກ່ອນມາບໍລິຈາກເລືອດນັ້ນ ປະກອບມີ :

– ຄວນນອນຫລັບພັກຜ່ອນໃຫ້ພຽງພໍຢ່າງໜ້ອຍ 6 ຊົ່ວໂມງຂຶ້ນໄປໃນຄືນກ່ອນທີ່ຈະມາບໍລິຈາກ.

– ມີສຸຂະພາບແຂງແຮງ, ບໍ່ເປັນໄຂ້ຫວັດ ຫລື ຢູ່ໃນລະຫ່ວາງການກິນຢາແກ້ອັກເສບໃດໆ.

– ກິນເຂົ້າກ່ອນມາບໍລິຈາກເລືອດ, ແຕ່ໃຫ້ຫລີກເວັ້ນອາຫານມັນໆ ເຊັ່ນ : ເຂົ້າຂາໝູ, ເຂົ້າມັນໄກ່, ແກງກະທິ, ອາຫານຈືນ, ອາຫານຫວານໆຕ່າງໆ.

– ດື່ມນຳ້ 3 – 4 ຈອກ ແລະ ເຄື່ອງດື່ມອື່ນໆຕື່ມ ບໍ່ວ່າຈະແມ່ນນຳ້ຫວານ, ນຳ້ໝາກໄມ້, ນົມ ເພື່ອເພີ່ມປະລິມານເລືອດ ແລະ ປ້ອງກັນອາການເປັນວິນ, ອ່ອນເພຍ ຫລື ວິນຫົວຫລັງການບໍລິຈາກ.

– ງົດດື່ມເຄື່ອງດື່ມອານກໍຮໍຢ່າງໜ້ອຍ 24 ຊົ່ວໂມງກ່ອນບໍລິຈາກເລືອດ ແລະ ງົດສູບຢາກ່ອນ  ແລະ ຫລັງບໍລິຈາກເລືອດ 1 ຊົ່ວໂມງ ເພື່ອໃຫ້ປອດຟອກເລືອດໄດ້ດີ.

– ນຸ່ງເຄື່ອງທີ່ມີແຂນເສື້ອທີ່ສາມາດກໍ້ຂຶ້ນເໜືອຂໍ້ສອກໄດ້ ຢ່າງໜ້ອຍ 6 ຊັງຕີແມັດ.

– ຫາກແພ້ຢາຂ້າເຊື້ອ ເຊັ່ນ : ອານກໍຮໍ ຄວນແຈ້ງທ່ານໝໍໃຫ້ຮູ້ກ່ອນລ່ວງໜ້າ.

– ເຮັດໂຕຕາມສະບາຍ ບໍ່ຕ້ອງເກັງ ຫລື ວິຕົກກັງວົນ, ບໍ່ຄວນຫຍຳ້ໝາກຝຣັ່ງ ຫລື ອົມເຂົ້າໜົມໃນເວລາບໍລິຈາກເລືອດ.

– ຂະນະບໍລິຈາກເລືອດຄວນບີບລູກຢາງໃຫ້ສະໝໍ່າສະເໝີເພື່ອໃຫ້ເລືອດໄຫລໄດ້ສະດວກ ຫາກມີອາການຜິດປົກກະຕິ ເຊັ່ນ : ໃຈສັ່ນຄ້າຍຄືຈະເປັນວິນ, ຈັງຊາ ຫລື ເຈັບຜິດປົກກະຕິ ຕ້ອງຟ້າວແຈ້ງທ່ານໝໍໃຫ້ຮູ້ທັນທີ.

– ຫລັງບໍລິຈາກເລືອດແລ້ວ ຄວນນອນພັກຜ່ອນເທິງຕຽງກ່ອນ ບໍ່ຄວນລຸກທັນທີ ເພາະອາດເຮັດໃຫ້ໜ້າມືດເປັນວິນໄດ້ ເມື່ອຮູ້ສຶກດີແລ້ວຈຶ່ງລຸກໄປດື່ມນຳ້ ແລະ ກິນອາຫານວ່າງທີ່ຈັດໄວ້ໃຫ້.

ສ່ວນຫລັງການບໍລິຈາກເລືອດແລ້ວ ຜູ້ບໍລິຈາກຄວນປະຕິບັດຄື :

– ຄວນດື່ມເຄື່ອງດື່ມທີ່ມີບໍລິການໃຫ້ ແລ້ວດື່ມນຳ້ຫລາຍກ່ວາປົກກະຕິໝົດມື້.

– ຫລີກເວັ້ນການອອກກຳລັງກາຍ, ຮົມຢາ ຫລື ກິດຈະກຳທີ່ຕ້ອງເສຍເຫື່ອຫລາຍ, ງົດໃຊ້ກຳລັງແຂນເບື້ອງທີ່ເຈາະເລືອດ ເປັນເວລາ 12 ຊົ່ວໂມງຫລັງການບໍລິຈາກ ເພື່ອປ້ອງກັນການບວມຊຳ້.

– ບໍ່ຄວນຟ້າວເມືອ ຄວນນັ່ງພັກຜ່ອນໃຫ້ໝັ້ນໃຈວ່າປົກກະຕິ ຫາກມີອາການວິນຫົວຄືຈະເປັນວິນ ຫລື ຮູ້ສຶກຜິດປົກກະຕິ ໃຫ້ ຟ້າວແຈ້ງທ່ານໝໍທັນທີ.

– ຫາກມີເລືອດຊຶມອອກມາຈາກບ່ອນເຈາະເລືອດ ບໍ່ຕ້ອງຕົກໃຈ ໃຫ້ໃຊ້ນິ້ວມືອີກເບື້ອງໜຶ່ງກົດລົງເທິງສຳລີໃຫ້ແໜ້ນ ແລ້ວຍົກ ແຂນສູງຂຶ້ນໄວ້ 3 – 5 ນາທີ ຫາກເລືອດຍັງບໍ່ຢຸດຊຶມອອກມາ ໃຫ້ກັບມາບ່ອນບໍລິຈາກເລືອດເພື່ອພົບທ່ານໝໍໂດຍໄວ.

– ຄວນຢຸດພັກການປີນ ຫລື ຂຶ້ນບ່ອນສູງ ແລະ ການເຮັດວຽກກ່ຽວກັບເຄື່ອງຈັກ 1 ມື້.

– ກິນອາຫານທີ່ມີແຮ່ທາດເຫລັກຫລາຍ ແລະ ຢາທາດເຫລັກທີ່ໄດ້ຮັບມື້ລະ 1 ເມັດຈົນໝົດ ເພື່ອປ້ອງກັນການຂາດແຮ່ທາດເຫລັກ.