ແມນເຊັດສເຕີ ຕິດຕໍ່ຂໍຊື້ ໂກເຣັດກ້າ ເສີມກອງກາງແລ້ວ
ແມນເຊັດສເຕີ ຢູໄນເຕັດ ຕົກເປັນຂ່າວຕິດຕໍ່ຄວ້າ ເລອອນ ໂກເຣັດກ້າ ມິດຟິລ ຊາລເກ້ 04 ແລ້ວ ຫລັງນັກເຕະອາຍຸ 22 ປີຄົນນີ້ກຳລັງເນື້ອຫອມ ຕົກເປັນເປົ້າໝາຍຂອງບັນດາສະໂມສອນໃຫຍ່ທົ່ວເອີຣົບ.
ໃນຫລາຍອາທິດຜ່ານມາ ມິດຟິລ ຊາວເຢຍລະມັນ ອາຍຸ 22 ປີ ທີ່ຍິງໄປ 18 ປະຕູ ຈາກ 126 ນັດ ລວມທຸກລາຍການໃຫ້ຕົ້ນສັງກັດ ຕົກເປັນຂ່າວພ້ອມຍ້າຍໄປຫລິ້ນໃນພຣີເມຍລີກ, ລາ ລີກາ ແລະ ເຊເຣຍອາ ໂດຍມີ 4 ທີມຍັກໃຫຍ່ເຊັ່ນ: ລີເວີພູລ, ອາເຊນອນ, ບາເຊໂລນາ ແລະ ຢູເວັນຕຸດ ສົນໃຈດຶງຕົວຮ່ວມທີມ.
ຫລ້າສຸດ ສະກາຍ ສະປອດ ນິວ ສື່ຊື່ດັງຂອງອັງກິດ ອ້າງວ່າ: ໂຊເຊ ມູຣິນໂຢ ຜູ້ຈັດການທີມ ແມນເຊັດສເຕີ ຢູໄນເຕັດ ກຳລັງເຝົ້າເບິ່ງສະຖານະການຂອງ ໂກເຣັດກ້າ ຢ່າງໃກ້ຊິດກ່ອນຈະມີການຍື່ນຂໍ້ສະເໜີຊື້ຕົວຕໍ່ໄປ.
ເຖິງຢ່າງໃດກໍຕາມ, ຊາລເກ້ 04 ຫາກໍຢືນຢັນວ່າ ພວກເຮົາໄດ້ຍື່ນຂໍ້ສະເໜີເປັນສັນຍາໃໝ່ໃຫ້ ໂກເຣັດກ້າ ໄປພິຈາລະນາ ເພື່ອຫວັງຮັກສານັກເຕະຊາວເຢຍລະມັນໃຫ້ຢູ່ຫລິ້ນໃນຖິ່ນເຟລຕິນ-ອາຣິນາຕໍ່ໄປ.
