ກະຊວງກ່ຽວຂ້ອງສັ່ງຜູ້ບໍລິການອິນເຕີເນັດທຸກເຄືອຂ່າຍເລັ່ງປັບປຸງຄຸນະພາບໃຫ້ດີ

ກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ປທສ), ໄດ້ສັ່ງຜູ້ໃຫ້ບໍລິການອິນເຕີເນັດທຸກເຄືອຂ່າຍໃນປະເທດເລັ່ງປັບປຸງຄຸນນະພາບໃຫ້ດີກວ່າເກົ່າ, ພາຍຫລັງເຫັນວ່າການໃຫ້ບໍລິການໃນຜ່ານມາມັກພົບບັນຫາສັນຍານມີລັກສະນະຊັກຊ້າ ແລະ ເກີດມີສຽງຈົ່ມວ່າຈາກສັງຄົມ. ການສັ່ງໃຫ້ປັບປຸງຄຸນະພາບນີ້, ໄດ້ລະບຸໃນແຈ້ງການເລກທີ 876/ຫກຊ ລົງວັນທີ 6 ເມສາທີ່ໄດ້ກໍານົດຂຶ້ນພາຍຫລັງມີກອງປະຊຸມປືກສາຫາລືກ່ຽວກັບການປັບປຸງຄຸນນະພາບ ແລະ ລາຄາການນຳໃຊ້ອິນເຕີເນັດລະຫວ່າງກະຊວງກ່ຽວຂ້ອງກັບບໍລິສັດໃຫ້ບໍລິການອິນເຕີເນັດທຸກເຄືອຂ່າຍໃນປະເທດເມື່ອວັນທີ 5 ເມສານີ້, ໂດຍການເປັນປະທານຂອງທ່ານ ບຸນສະເຫລີມໄຊ ເຄນນາວົງ ຮອງລັດຖະມົນຕີກະຊວງດັ່ງກ່າວ ແລະ ກອງ ປະຊຸມມີມະຕິຍົກເລີກຂໍ້ຕົກລົງເລກທີ 1075/ປທສ ວ່າດ້ວຍການກໍານົດອັດຕາຄ່າໂທລະສັບອີນເຕີເນັດ ແລະ ຫລັກການສົ່ງເສີມການຂາຍ ທີ່ຫາກໍໄດ້ກໍານົດອອກມາເມື່ອວັນທີ 13 ມີນາ 2017. ພ້ອມທັງໃຫ້ທຸກບໍລິສັດເອົາໃຈໃສ່ກວດກາ ແລະ ປັບປຸງຄຸນນະພາບການບໍລິການອີນເຕີເນັດໃຫ້ຮັບປະກັນທາງດ້ານເຕັກນິກຕາມມາດຕະຖານທີ່ກະຊວງ ປທສ ກໍານົດອອກ ແລະ ນອກຈາກນີ້ກໍຈະສົ່ງໜ່ວຍງານລົງກວດສອບຄຸນນະພາບການບໍລິການຂອງແຕ່ລະບໍລິສັດເພື່ອບໍ່ໃຫ້ມີການສວຍໂອກາດເອົາປຽບລູກຄ້າກໍຄືຜູ້ຊົມໃຊ້ໂທລະສັບ ແລະ ອີນເຕີເນັດ, ຖ້າເຫັນວ່າຍັງບໍ່ມີການປັບປຸງກໍຈະດໍາເນີນມາດຕະການຕາມລະບຽບການ, ພ້ອມໃຫ້ທຸກບໍລິສັດປະຕິບັດການຄິດໄລ່ອັດຕາຄ່າບໍລິການຄືເກົ່າໄປກ່ອນ. ສ່ວນການແກ້ໄຂບັນດາອຸປະສັກຕ່າງໆທີ່ຫລາຍບໍລິສັດພວມຜະເຊີນ ເປັນຕົ້ນ: ສະພາບອຸປະກອນສາຍສົ່ງທີ່ເກົ່າແກ່, ຄື້ນຄວາມຖີ່ບໍ່ພຽງພໍກັບຄວາມຕ້ອງການ ແລະ ການຊື້ສັນຍານອິນເຕີເນັດ ຈາກຕ່າງປະເທດມີລາຄາແພງ, ເຮັດໃຫ້ບໍ່ສາມາດຫລຸດລາຄາອິນເຕີເນັດໄດ້ ແລະ ອື່ນໆ, ພ້ອມນີ້ກະຊວງ ປທສ ໄດ້ຊີ້ນໍາໃຫ້ແຕ່ລະບໍລິສັດຄົ້ນຄວ້າຄືນຄື້ນຄວາມຖີ່ທີ່ຕ້ອງການແລ້ວສະເໜີພາກສ່ວນກ່ຽວຂ້ອງພິຈາລະນາຊອກຫາວິທີການແກ້ໄຂຢ່າງເໝາະສົມ ເພື່ອແນໃສ່ປັບປຸງເຄືອຂ່າຍອິນເຕີເນັດໃນທົ່ວປະເທດມີຄຸນນະພາບດີຂຶ້ນ.