ADB ຄາດເສດຖະກິດຂອງລາວຈະສືບຕໍ່ຂະຫຍາຍຕົວເປັນລຳດັບ
ວັນທີ 6 ເມສານີ້, ທະນາຄານພັດທະນາອາຊີ ( ADB ) ໄດ້ຈັດກອງປະຊຸມເຜີຍແຜ່ບົດລາຍງານການຄາດຄະເນການພັດທະນາຂອງອາຊີປະຈຳປີ 2017 ຂຶ້ນທີ່ນະຄອນຫຼວງວຽງຈັນ, ໂດຍການເຂົ້າຮ່ວມຂອງທ່ານ ຢາຊຸຊິ ເນກິຊິ ຜູ້ຕາງໜ້າທະນາຄານອາຊີປະຈຳລາວ, ມີຜູ້ຊ່ຽວຊານ, ຕາງໜ້າຈາກຂະແໜງການກ່ຽວຂ້ອງ, ພ້ອມດ້ວຍສື່ມວນຊົນເຂົ້າຮ່ວມນຳດ້ວຍ.
ຜູ້ຕາງໜ້າທະນາຄານພັດທະນາອາຊີປະຈຳລາວກ່າວວ່າ: ADB ຄາດວ່າການຂະຫຍາຍຕົວຂອງລວມຍອດຜະລິດຕະພັນພາຍໃນ ( GDP ) ໃນຂົງເຂດອາຊີປາຊີຟິກໃນປີ 2017 ຈະຢູ່ໃນລະດັບ 5,7%, ຫຼຸດລົງເລັກນ້ອຍທຽບໃສ່ປີ 2016, ໃນຂະນະດຽວກັນເສດຖະກິດຂອງປະເທດທີ່ອຸດສາຫະກຳຂະຫຍາຍຕົວມີບັນຍາກາດຂະຫຍາຍຕົວໄປພ້ອມກັນ, ດັ່ງປະເທດສະຫະລັດ, ເຂດເອີລົບ ແລະ ຍີ່ປຸ່ນຄາດວ່າຈະຂະຫຍາຍຕົວຢູ່ໃນລະດັບ 1,9% ໃນປີ 2017 ແລະ 2018, ສຳລັບ ສປປ ລາວ ຄາດວ່າການຂະຫຍາຍຕົວຂອງ GDP ຍັງຈະຂະຫຍາຍຢ່າງຕໍ່ເນື່ອງຢູໃນລະດັບ 6,9 % ໃນປີ 2017 ແລະ 7,0% ໃນປີ 2018, ໂດຍຂະແໜງໄຟຟ້າ, ກະສິກຳ , ອຸດສາຫະກຳ ແລະ ບໍລິການຍັງເປັນຕົວຍູ້ດັນການຂະຫຍາຍຕົວດັ່ງກ່າວ ແລະ ເພີ່ມຂື້ນເລັກນ້ອຍທຽບກັບປີ 2016, ເຖິງຢ່າງໃດກໍຕາມບົດລາຍງານຍັງຄາດວ່າກິດຈະກຳທາງເສດຖະກິດທີ່ເຂັ້ມແຂງໃນປະເທດ ແລະ ລາຄານ້ຳມັນທີ່ສູງຂຶ້ນ, ຈະສົ່ງຜົນໃຫ້ອັດຕາເງິນເຟີ້ເພີ່ມຂຶ້ນ ແລະ ຈະເຮັດໃຫ້ເກີດຄວາມກົດດັນໃນການດຸ່ນດ່ຽງທາງດ້ານການຄ້າ, ອັດຕາເງິນເຟີ້ມີແນວໂນ້ມວ່າຈະເພີ່ມຂຶ້ນເທື່ອລະກ້າວຈາກ 1,6% ໃນປີ 2016 ມາເປັນ 2,5% ໃນປີ 2017 ແລະ 3,0 % ໃນປີ 2018, ສະຖຽນລະພາບທາງດ້ານເສດຖະກິດມະຫາພາກຕ້ອງໄດ້ຮັກສາອັດຕາເງິນເຟີ້ທີ່ມີທ່າທີວ່າຈະອ່ອນລົງຕື່ມ, ເຖິງແມ່ນວ່າສະພາບການເງິນ,ງົບປະມານຍັງຈະໄດ້ຮັບການສືບຕໍ່ປັບປຸງໃນຕໍ່ໜ້າ.
ຜູ້ຕາງໜ້າທະນາຄານພັດທະນາອາຊີປະຈຳລາວກ່າວວ່າ: ໃນທຸກໆປີທະນາຄານພັດທະນາອາຊີໄດ້ສ້າງບົດລາຍງານການຄາດຄະເນການພັດທະນາຂອງອາຊີຂຶ້ນເພື່ອເຜີຍແຜ່ໃຫ້ບັນດາປະເທດສະມາຊິກຊາບ ແລະ ປີນີ້ກໍເຊັ່ນດຽວກັນພິທີເຜີຍແຜ່ບົດລາຍງານດັ່ງກ່າວແມ່ນຈັດຂຶ້ນພ້ອມກັນໃນທົ່ວໂລກໃນມື້ນີ້, ຊຶ່ງແມ່ນເອກະສານສຳຄັນຂອງ ADB ໃນການຕອບສະໜອງການວິເຄາະເສດຖະກິດ ແລະ ການຄ້າ, ພ້ອມທັງຄາດຄະເນການຂະຫຍາຍຕົວດ້ານເສດຖະກິດໃນ 45 ປະເທດ, ບົດລາຍງານດັ່ງກ່າວຍັງສືກສາໂອກາດ ແລະ ທ່າແຮງໃນການພັດທະນາໃນຂົງເຂດອາຊີອີກດ້ວຍ.
