ສານນະຄອນຫລວງຕັດສີນຄາດຕະກອນດຈໍາຄຸກ 16 ປີ
ຄາດຕະກອນໂຫດຄື: ນາງ ອານິສາ ອາຍຸ 23 ປີຢູ່ບ້ານໜອງບົວທອງ, ເມືອງສີໂຄດຕະບອງ, ນະຄອນຫລວງວຽງຈັນ, ຖືກສານປະຊາຊົນນະຄອນຫລວງວຽງຈັນຕັດສີນລົງໂທດຈໍາຄຸກ 16 ປີ ແລະ ທ້າວ ສົມພົງ ອາຍຸ 27 ປີຢູ່ບ້ານໂພນສະຫວາດເໜືອ, ເມືອງສີໂຄດຕະບອງໃຫ້ຈໍາຄຸກເປັນເວລາ 10 ປີໃນຂໍ້ຫາຄາດຕະກຳທ້າວ ແກ້ວອຸດອນ ອາຍຸ 31 ປີຢູ່ບ້ານສີບຸນເຮືອງ, ເມືອງຈັນທະບູລີ, ນະຄອນຫລວງວຽງຈັນຢູ່ເສັ້ນທາງຕັດໃໝ່ໜອງບົວທອງ-ໜອງບຶກເມື່ອກາງເດືອນກັນຍາ 2014 ຜ່ານມາ.
ຄະດີມີຢູ່ວ່າ: ນາງ ອານິສາ ແລະ ທ້າວ ແກ້ວອຸດອນ ເປັນພີ່ນ້ອງກັນໂດຍມີສາຍຍາດເປັນລູກເອື້ອຍ-ລູກນ້ອງ. ໃນປີ 2014 ນາງ ອານິສາ ມີພຶດຕິກໍາຕິດການພະນັນ ແລະ ຫລິ້ນກິນຟູມເຟືອຍ, ທ້າວ ແກ້ວອຸດອນ ໃນນາມເປັນອ້າຍຈຶ່ງໄດ້ບອກສອນກ່າວເຕືອນໃຫ້ຢຸດເຊົາພົວພັນກັບສິ່ງທີ່ບໍ່ດີດັ່ງກ່າວ, ຈຶ່ງເຮັດໃຫ້ເກີດຄວາມຄຽດແຄ້ນ ແລະ ວາງແຜນຄາດຕະກໍາຜູ້ເປັນອ້າຍ, ໂດຍໄດ້ຕິດຕໍ່ທ້າວ ສົມພົງ ທີ່ຮູ້ຈັກກັນທາງເຟສບຸກເພື່ອໃຫ້ຊອກຄົນໄປຄາດຕະກຳທ້າວ ແກ້ວອຸດອນ, ໂດຍໃຫ້ຄ່າຈ້າງ 10 ພັນໂດລາສະຫະລັດ. ຫລັງຈາກນັ້ນທ້າວ ສົມພົງ ໄດ້ຕິດຕໍ່ທ້າວ ແອັດ ແລະ ທ້າວແຮັກ ຄົນໄທ ເພື່ອເປັນມືປືນ, ໂດຍໃຫ້ຄ່າຈ້າງ 5 ແສນບາດ (ສະກຸນເງິນໄທ), ພ້ອມສົ່ງຮູບ, ຍີຫໍ້ ແລະ ໝາຍເລກທະບຽນລົດຂອງເປົ້າໝາຍໃຫ້ພວກກ່ຽວ.
ມາຮອດວັນທີ 8 ກັນຍາ 2014 ຄົນໄທທັງສອງໄດ້ເຂົ້າມາລາວຜ່ານທາງເມືອງຊະນະຄາມແຂວງວຽງຈັນ ແລະ ຂີ່ລົດໂດຍສານມາລົງຢູ່ຄິວລົດຕະຫລາດສີໄຄ, ຈາກນັ້ນນາງ ອານິສາ ແລະ ທ້າວ ສົມພົງ ໄດ້ໄປຮັບມືປືນທັງສອງໄປພັກຢູ່ເຮືອນພັກແຫ່ງໜຶ່ງທີ່ບ້ານໂພນສະຫວາດເໜືອເມືອງສີໂຄດຕະບອງ ເພື່ອກຽມລໍຖ້າລົງມື.
ມາຮອດເຊົ້າວັນທີ 10 ກັນຍາ 2014 ນາງ ອານິສາ ໄດ້ໂທລະສັບຫາທ້າວ ສົມພົງ ໃຫ້ພາມືປືນໄປລໍຖ້າຢູ່ທາງຕັດໃໝ່ເຂດໜອງບົວທອງ-ໜອງບຶກ, ເພາະຕົນຈະບອກໃຫ້ທ້າວ ແກ້ວອຸດອນ ຜ່ານໄປເສັ້ນທາງດັ່ງກ່າວ, ໂດຍມືປືນແມ່ນຂີ່ລົດຈັກສະກຸບປີ້ສີແດງບໍ່ມີປ້າຍທະບຽນ, ສ່ວນທ້າວສົມພົງ ຂີ່ລົດຮຸນໄດສີປອນໝາຍເລກທະບຽນ 1333 ກຳແພງນະຄອນນຳທາງໄປຈຸດທີ່ເປົ້າໝາຍຈະຜ່ານມາ ແລະ ບໍ່ດົນກໍເຫັນລົດທ້າວ ແກ້ວອຸດອນ ຂີ່ມາຕາມເສັ້ນທາງນັດໝາຍ, ຈາກນັ້ນມືປືນທັງສອງໄດ້ຂີ່ລົດຈັກໄປຮຽງຂ້າງແລ້ວໃຊ້ປືນຍິງໃສ່ທ້າວ ແກ້ວອຸດອນ ຫລາຍນັດເຮັດໃຫ້ລົດເສຍຫລັກລົງທົ່ງນາແຄມທາງແລ້ວມືປືນກໍເອົາຕົວຫລົບໜີໄປບ້ານພັກ, ພ້ອມໂທລະສັບບອກທ້າວ ສົມພົງ ແລະ ນາງ ອານິສາ ວ່າລົງມືສຳເລັດແລ້ວ, ຈາກນັ້ນທ້າວ ສົມພົງ ໄດ້ບອກໃຫ້ມືປືນໜີກັບໄປປະເທດກ່ອນແລ້ວຈະໂອນເງິນໃຫ້ຕາມພາຍຫລັງ. ຈາກນັ້ນນາງ ອານິສາ ກໍໄດ້ໄປຈຸດເກີດເຫດເພື່ອເບິ່ງວ່າທ້າວ ແກ້ວອຸດອນເສຍຊີວິດແທ້ ຫລື ບໍ່ ແລະ ເມື່ອໄປຮອດກໍບອກໃຫ້ປະຊາຊົນທີ່ຢູ່ໃນຈຸດເກີດເຫດທຸບແວ່ນລົດ ເພື່ອປົດລັອກປະຕູແລ້ວໃຫ້ອຸ້ມເອົາທ້າວ ແກ້ວອຸດອນ ອອກມາປະໄວ້ແຄມທາງ, ເມື່ອສັງເກດເຫັນວ່າເສຍຊີວິດແລ້ວນາງ ອານິສາ ໄດ້ໂທລະສັບຫາພໍ່ແມ່ ແລະ ເອື້ອຍຂອງທ້າວແກ້ວອຸດອນ. ຈາກນັ້ນນາງ ອານິສາ ກໍກັບເມືອເຮືອນເພື່ອປ່ຽນເຄື່ອງນຸ່ງແລ້ວກັບໄປສະຖານທີ່ເກີດເຫດອີກແຕ່ບໍ່ເຫັນພໍ່ແມ່ຂອງທ້າວແກ້ວອຸດອນມາຮອດຈຸດເກີດເຫດເທື່ອຈຶ່ງໄດ້ກັບຄືນເມືອເຮືອນອີກຄັ້ງ ແລະ ພໍຮອດເຮືອນໄດ້ປະມານເຄິ່ງຊົ່ວໂມງພໍ່ຂອງທ້າວແກ້ວອຸດອນໄດ້ໂທລະສັບບອກໃຫ້ໄປຫາຢູ່ຈຸດເກີດເຫດ ແລະ ເມື່ອໄປເຖິງກໍຖືກເຈົ້າໜ້າທີ່ກັກຕົວໄປສອບສວນຂະຫຍາຍຜົນ ແລະ ສາມາດຕິດຕາມຈັບຕົວທ້າວ ສົມພົງ ທີ່ຮ່ວມຂະບວນການມາດຳເນີນຄະດີໄດ້.
