ຮອງປະທານປະເທດເຄື່ອນໄຫວຢ້ຽມຢາມແຂວງເຊກອງ

ຕອນບ່າຍວັນທີ 22 ພະຈິກນີ້, ທ່ານ ພັນຄໍາ ວິພາວັນ ຜູ້ປະຈໍາການຄະນະເລຂາທິການສູນກາງພັກ, ຮອງປະທານປະເທດແຫ່ງ ສປປ ລາວ ພ້ອມດ້ວຍຄະນະ ໄດ້ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງເຊກອງ, ໂດຍການຕ້ອນຮັບຢ່າງອົບອຸ່ນຂອງທ່ານ ຄໍາເຜິຍ ບຸດດາວຽງ ກໍາມະການສູນກາງພັກ, ເລຂາພັກແຂວງ, ເຈົ້າແຂວງເຊກອງ ພ້ອມດ້ວຍຄະນະ ແລະ ພະນັກງານຫລັກແຫລ່ງຂອງແຂວງເຂົ້າຮ່ວມ.
ການມາຢ້ຽມຢາມແຂວງເຊກອງໃນຄັ້ງນີ້, ທ່ານຮອງປະທານປະເທດແຫ່ງ ສປປ ລາວ ໄດ້ຮັບຟັງລາຍງານການຈັດຕັ້ງປະຕິບັດແຜນພັດທະນາເສດຖະ

ກິດ-ສັງຄົມຂອງແຂວງໃນໄລຍະ 11 ເດືອນຜ່ານມາ ແລະ ທິດທາງແຜນພັດທະນາປະຈໍາປີ 2018 ໂດຍຫຍໍ້ຈາກທ່ານ ຄໍາເຜິຍ ບຸດດາວຽງ ກໍາມະການສູນກາງພັກ, ເລຂາພັກແຂວງ, ເຈົ້າແຂວງເຊກອງ. ພາຍຫລັງໄດ້ສໍາເລັດບັ້ນດໍາເນີນຊີວິດການເມືອງປັບປຸງປົວແປງພັກທົ່ວແຂວງ, ຊຶ່ງເຫັນວ່າ: ໂດຍລວມແລ້ວແຂວງມີສະຖຽນລະພາບທາງດ້ານການເມືອງ-ແນວຄິດໜັກແໜ້ນ, ສັງຄົມມີຄວາມສະຫງົບປອດໄພໂດຍພື້ນຖານ, ເສດຖະກິດສືບຕໍ່ຂະຫຍາຍຕົວດ້ວຍຈັງຫວະໝັ້ນທ່ຽງ, ລວມຍອດຜະລິດຕະພັນພາຍໃນ (GDP) ຂະຫຍາຍຕົວໃນລະດັບ 9,1%, ສະເລ່ຍຕໍ່ຫົວຄົນບັນລຸໄດ້ 12,7 ລ້ານກີບ ຫຼື ເທົ່າກັບ 1.590 ໂດລາສະຫະລັດ, ການຈັດເກັບລາຍຮັບເຂົ້າງົບປະມານຂອງແຂວງໃນ 11 ເດືອນປະຕິບັດໄດ້ທັງໝົດ 85% ແລະ ຄາດວ່າໝົດປີຈະປະຕິບັດໄດ້ 100% ເພື່ອບັນລຸຄາດໝາຍວາງໄວ້, ສາມາດຮັບປະກັນການເບີກຈ່າຍເງິນເດືອນໃຫ້ພະນັກງານ, ລັດຖະກອນ, ທະຫານ-ຕໍາຫລວດ ໄດ້ເປັນປົກກະຕິທຸກໆເດືອນ, ການປູກ-ການລ້ຽງຂອງປະຊາຊົນຍັງສືບຕໍ່ຂະຫຍາຍຕົວເພີ່ມຂຶ້ນ, ສະແດງອອກມາຮອດປັດຈຸບັນຂະບວນການເກັບກ່ຽວມ້ຽນມັດເຂົ້ານາປີຂອງຊາວກະສິກອນຫຼາຍທ້ອງຖິ່ນປະຕິບັດໄດ້ຫຼາຍກວ່າ 95% ຂອງເນື້ອທີ່ປັກດໍາທັງໝົດ 12.808 ເຮັກຕາ ແລະ ຄາດວ່າຜົນຜະລິດຈະໄດ້ຮັບຢ່າງໜ້ອຍ 52.988 ໂຕນ, ພືດສະບຽງອາຫານບັນລຸໄດ້ 56.912 ໂຕນ, ພືດເປັນສິນຄ້າປະຕິບັດໄດ້ 163.658 ໂຕນ, ອັນໄດ້ຊ່ວຍໃຫ້ແຂວງສາມາດລຶບລ້າງຄວາມທຸກຍາກຂອງປະຊາຊົນໄປຕາມທິດຍືນຍົງ ແລະ ສັງຄົມກໍມີໜໍ່ແໜງ ແລະ ຂະຫຍາຍຕົວເພີ່ມຂຶ້ນກວ່າປີຜ່ານມາ. ການສົ່ງອອກຜະລິດຕະພັນກະສິກໍາບັນລຸໄດ້ 93.756 ໂຕນ, ໃນນັ້ນມີໜໍ່ໄມ້ຝຣັ່ງ 87.799 ໂຕນ, ກາເຟ 1.004 ໂຕນ, ຢ່າງພາລາ 3.800 ໂຕນ ແລະ ອື່ນໆ ລວມມູນຄ່າທັງໝົດ 8,39 ລ້ານກວ່າໂດສະຫະລັດ.
ຈາກນັ້ນ, ທ່ານຮອງປະທານປະເທດ ກໍໄດ້ກ່າວສະແດງຄວາມຍ້ອງຍໍຊົມ ເຊີຍຕໍ່ບັນດາຜົນງານທີ່ແຂວງເຊກອງຍາດມາໄດ້ໃນຜ່ານມາ ແລະ ພ້ອມທັງໃຫ້ທິດແລກປ່ຽນແນະນໍາບາງໜ້າວຽກສຳຄັນຄື: ການປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບ, ວຽກງານຫັນລົງກໍ່ສ້າງຮາກຖານຕາມ 4 ເນື້ອໃນ 4 ຄາດໝາຍ, ວຽກງານກໍ່ສ້າງພັກ-ພະນັກງານ, ເສີມຂະຫຍາຍວຽກງານສຶກສາອົບຮົມການເມືອງ-ແນວຄິດໃຫ້ແກ່ຖັນແຖວພະນັກງານ, ສະມາຊິກພັກເປັນກົກ, ວຽກງານກະສິກຳໃຫ້ສອດຫ້ອຍເຂົ້າກັບການແກ້ໄຂຊີວິດການເປັນຢູ່ຂອງປະຊາຊົນ, ສືບຕໍ່ໃກ້ຊິດບັນດາໂຄງການຕ່າງໆໃຫ້ສຳເລັດໂດຍໄວ, ເພີ່ມທະວີຄວາມສາມັກຄີປອງດອງບັນດາເຜົ່າຕ່າງໆພາຍໃນແຂວງໃຫ້ເປັນປຶກແຜ່ນແກ່ນສານເພື່ອຕ້ານກັບການໂຄສະນາບິດເບືອນຂອງກຸ່ນຄົນບໍ່ຫວັງດີທີ່ຂັດຕໍ່ແນວທາງນະໂຍບາຍຂອງພັກ-ລັດ. ພ້ອມນີ້ ທ່ານຍັງໄດ້ຮຽກຮ້ອງໃຫ້ການນໍາທຸກຂັ້ນຢູ່ແຂວງເຊກອງຈົ່ງເພີ່ມທະວີວຽກງານຮອບດ້ານເພື່ອສ້າງຄວາມເຂັ້ມແຂງໃນໜ້າທີ່ວຽກງານຂອງຕົນດ້ວຍຄວາມຮັບຜິດຊອບສູງ, ຖືເອົາວຽກງານກໍ່ສ້າງຮາກຖານການເມືອງປັບປຸງໂຄງສ້າງດ້ານບຸກຄະລາກອນເຮັດໃຫ້ວຽກງານມີການຫັນປ່ຽນ ແລະ ບັນລຸຕາມແຜນການ, ພາຍໃຕ້ການຊີ້ນໍາ-ນໍາພາຂອງພັກໃນໄລຍະໃໝ່ ເພື່ອແກ້ໄຂຄວາມທຸກຍາກຂອງປະຊາຊົນບັນດາເຜົ່າໃຫ້ມີທ່ວງທ່າດີຂື້ນ, ແກ້ໄຂບັນຫາປາກົດການຫຍໍ້ທໍ້ພາຍໃນສັງຄົມໃຫ້ຫລຸດໜ້ອຍຖອຍລົງເທື່ອລະກ້າວ, ສ້າງພື້ນຖານໂຄງລ່າງເສດຖະກິດ-ສັງຄົມໃຫ້ໜັກແໜ້ນເຂັ້ມແຂງຍາດໃຫ້ໄດ້ຜົນສໍາເລັດຕະຫລອດໄລຍະການຈັດຕັ້ງປະຕິບັດໜ້າທີ່ວຽກງານຂອງຕົນ ເຮັດໃຫ້ແຂວງເຊກອງມີການຂະຫຍາຍຕົວດີຂຶ້ນເປັນກ້າວໆ.
ທ່ານຮອງປະທານປະເທດຍັງໄດ້ຖືໂອກາດໄປຢ້ຽມຢາມເມືອງກະລຶມ, ເມືອງດາກຈຶງ ແຂວງເຊກອງນໍາອີກ, ໂດຍການຕ້ອນຮັບຢ່າງອົບອຸ່ນຈາກບັນດາຄະນະນໍາຂອງເມືອງ, ພະນັກງານ-ລັດຖະກອນ ແລະ ປະຊາຊົນທຸກຖ້ວນໜ້າ.