ທ່ານ ເອັມເມີສັນ ມານາກາກວາ ໄດ້ຮັບ ເລືອກຕັ້ງເປັນປະທານາທິບໍດີຊິມບຳເວ
ວັນທີ 22 ພະຈິກນີ້, ທ່ານ ຈາກອບ ມູເດນດາ ປະທານລັດຖະສະພາຊິມບໍາເວ ເປີດເຜີຍວ່າ: ພັກລັດຖະບານປະສົມສະຫະພາບແຫ່ງຊາດຊິມບຳເວເປັນເອກະພາບເລືອກທ່ານ ເອັມເມີສັນ ມານາກາກວາ ຫົວໜ້າພັກຄົນໃໝ່ໃຫ້ ດໍາລົງຕຳແໜ່ງປະທານາທິບໍດີຊິມບໍາເວຄົນໃໝ່ ແທນທ່ານ ໂຣເບີດ ມູກາເບ ອະດີດປະທານາທິບໍດີ ທີ່ລາອອກຈາກຕຳແໜ່ງໃນວັນທີ 21 ພະຈິກນີ້ ໂດຍພິທີສາບານຕົນຂຶ້ນຮັບຕຳແໜ່ງຈະຈັດຂຶ້ນຢູ່ນະຄອນຫຼວງຮາຣາເຣ ໃນວັນທີ 24 ພະຈິກນີ້.
ທ່ານ ມູເດນດາ ກ່າວວ່າ: ຕາມລັດຖະທຳມະນູນ, ທ່ານ ມານາກາກວາ ຈະດຳລົງຕຳແໜ່ງຈົນຮອດປີ 2018 ໂດຍປີນີ້ທ່ານມີອາຍຸ 75 ປີ. ການໄດ້ຮັບການເຫັນດີໃຫ້ເປັນປະທານາທິບໍດີຂອງທ່ານເປັນຜົນມາຈາກໄດ້ຮັບການສະໜັບສະໜູນຈາກກອງທັບ. ກ່ອນໜ້ານີ້ ຄືວັນທີ 6 ພະຈິກນີ້, ທ່ານ ມູກາເບ ໄດ້ປົດຕຳແໜ່ງຂອງທ່ານ ມານາກາກວາ ແລະ ຈາກນັ້ນທ່ານກໍໄດ້ເດີນທາງອອກນອກປະເທດ.
