ໄນຈີເຣຍເລັ່ງສັກວັກແຊງໃຫ້ປະຊາຊົນຫລັງພົບ ພະຍາດເຍື່ອຫຸ້ມສະໝອງອັກເສບລະບາດໜັກ
ລາກອສ 5 ເມສາ: ເຈົ້າໜ້າທີ່ສາທາລະນະສຸກໄນຈີເຣຍເລີ່ມສັກວັກແຊງປ້ອງກັນພະຍາດເຍື່ອຫຸ້ມສະໝອງອັກເສບໃຫ້ແກ່ປະຊາຊົນໃນພື້ນທີ່ທີ່ພົບພະຍາດແຜ່ລະບາດໜັກ, ຫລັງສຸດມີຜູ້ເສຍຊີວິດຈາກພະຍາດດັ່ງກ່າວແລ້ວເກືອບ 340 ຄົນ ນັບແຕ່ທ້າຍປີຜ່ານມາ.
ສູນຄວບຄຸມພະຍາດຂອງໄນຈີເຣຽລາຍງານຈຳນວນຄົນເຈັບທີ່ສົງໄສວ່າເປັນພະຍາດເຍື່ອຫຸ້ມສະໝອງອັກເສບໃນ 16 ລັດ ໃນວັນທີ 3 ເມສານີ້ ມີ 2.997 ຄົນ ໂດຍມີຜູ້ເສຍຊີວິດແລ້ວ 336 ຄົນ ໃນຈຳນວນນີ້ສ່ວນຫລາຍເປັນເດັກນ້ອຍອາຍຸ 5-14 ປີ. ເຈົ້າໜ້າທີ່ຈາກສູນເປີດເຜີຍວ່າ: ປັດຈຸບັນນີ້ ເຈົ້າໜ້າທີ່ໄດ້ລົງໄປລັດແຊມຟາຣາ ທາງຕາເວັນຕົກສຽງເໜືອຂອງປະເທດ ເພື່ອເລັ່ງສັກວັກແຊງໃຫ້ແກ່ປະຊາຊົນ ຫວັງຄວບຄຸມພະຍາດທີ່ພວມແຜ່ລະບາດຢ່າງໜັກ ລວມທັງລັດຂ້າງຄຽງ ຄືໂຊໂຄໂຕ, ຄັດຊິນາ, ເຄບບິ ແລະ ໄນເຈີ ນັບແຕ່ເດືອນພະຈິກປີຜ່ານມາ.
ເຈົ້າໜ້າທີ່ກ່າວອີກວ່າ: ວັກແຊງປ້ອງກັນພະຍາດເຍື່ອຫຸ້ມສະໝອງອັກເສບຊະນິດເຊື້ອພະຍາດສາຍພັນຊີຈຳນວນ 500.000 ໂດສ ຈະຖືກສັກໃຫ້ປະຊາຊົນໃນພື້ນທີ່ທີ່ພົບການແຜ່ລະບາດໜັກ ແລະ ຈະມີການນຳເອົາວັກແຊງຈາກອັງກິດມາສັກໃຫ້ປະຊາຊົນໃນພື້ນທີ່ອື່ນໆເພີ່ມອີກ 823.970 ໂດສ. ທັງນີ້ ໃນຄວາມເປັນຈິງແລ້ວ ລັດແຊມຟາຣາພຽງລັດດຽວຕ້ອງການວັກແຊງປ້ອງກັນພະຍາດສູງເຖິງ 3 ລ້ານໂດສ, ແຕ່ເນື່ອງຈາກການແຜ່ລະບາດຂອງພະຍາດດັ່ງກ່າວບໍ່ໄດ້ເກີດຂຶ້ນເລື້ອຍໆຢູ່ໄນຈີເຣຍ ຈຶ່ງເຮັດໃຫ້ຈຳນວນວັກແຊງຢູ່ທົ່ວໂລກມີຢ່າງຈຳກັດ.
ເຖິງຢ່າງໃດກໍດີ, ເຈົ້າໜ້າທີ່ສາທາລະນະສຸກເຊື່ອໝັ້ນວ່າ: ການປຸກລະດົມສັກວັກແຊງປ້ອງກັນພະຍາດຈະຊ່ວຍຫລຸດຈຳນວນຜູ້ເປັນພະຍາດເຍື່ອຫຸ້ມສະໝອງອັກເສບໃນປະເທດໄດ້.
