ກະຊວງ ປກສ ປະກາດເລື່ອນຊັ້ນນາຍຕຳຫລວດ ພົນຕີ ຂຶ້ນ ພົນໂທ 1ນາຍ ແລະ ພັນເອກ ຂຶ້ນ ພົນຈັດຕະວາ 6 ນາຍ

ໜັງສືພິມຄວາມສະຫງົບລາຍງານວ່າ: ວັນທີ 29 ພະຈິກ 2024 ນີ້ ກະຊວງປ້ອງກັນຄວາມສະຫງົບ ໄດ້ຈັດພິທີປະກາດເລື່ອນຊັ້ນໃຫ້ນາຍຕໍາຫລວດຂັ້ນສູງ ໂດຍການເຂົ້າຮ່ວມຂອງ ທ່ານ ບຸນທອງ ຈິດມະນີ ກຳມະການກົມການເມືອງສູນກາງພັກ ຜູ້ປະຈຳການຄະນະເລຂາທິການສູນກາງພັກ ຮອງປະທານປະເທດ, ພົອ ວິໄລ ຫລ້າຄໍາຟອງ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະມົນຕີ ກະຊວງ ປກສ, ມີບັນດາຄະນະພັກກະຊວງ, ກົມໃຫຍ່, ຫ້ອງວ່າການ, ກົມກອງອ້ອມຂ້າງກະຊວງ, ຕະຫລອດຮອດພະນັກງານຜູ້ທີ່ໄດ້ຮັບເລື່ອນຊັ້ນ ເຂົ້າຮ່ວມ.

ທ່ານ ທົງສັກ ກົມມະເມືອງ ຮອງຫົວໜ້າກົມຄຸ້ມຄອງພະນັກງານ ຄະນະຈັດຕັ້ງສູນກາງພັກ ໄດ້ຜ່ານລັດຖະດຳລັດຂອງປະທານປະເທດ ສະບັບເລກທີ 236/ປປທ, ລົງວັນທີ 19 ພະຈິກ 2024 ວ່າດ້ວຍການເລື່ອນຊັ້ນນາຍຕໍາຫລວດຊັ້ນ ພົນຕີ ຂຶ້ນຊັ້ນ ພົນໂທ 1 ນາຍ ຄື: ພົນໂທ ຄໍາກິ່ງ ຜຸຍຫລ້າມະນີວົງ ຮອງລັດຖະມົນຕີ ຫົວໜ້າກົມໃຫຍ່ຕໍາຫລວດ ກະຊວງ ປກສ.

ລັດຖະດຳລັດຂອງປະທານປະເທດ ສະບັບເລກທີ 237-242/ປປທ ລົງວັນທີ 19 ພະຈິກ 2024 ວ່າດ້ວຍການເລື່ອນຊັ້ນນາຍຕໍາຫລວດ ຊັ້ນ ພັນເອກ ຂຶ້ນຊັ້ນ ພົນຈັດຕະວາ 6 ນາຍປະກອບມີ:

1. ພົນຈັດຕະວາ ປອ ສີສົມໄຊ ແກ້ວບຸນພັນ ຫົວໜ້າກົມ 504,

2. ພົນຈັດຕະວາ ປອ ບຸນຊະນະ ສິມມາລາວົງ ຫົວໜ້າອໍານວຍການວິທະຍາຄານສັນຕິບານປະຊາຊົນ,

3. ພົນຈັດຕະວາ ປອ ໂອໄດ ທິລັນດາ ຫົວໜ້າອໍານວຍການວິທະຍາຄານຕຳຫລວດປະຊາຊົນ,

4. ພົນຈັດຕະວາ ຊາຍຄອງ ເພັດຊະວົງ ຫົວໜ້າອໍານວຍການວິທະຍາຄານການເມືອງ ປກສ,

5. ພົນຈັດຕະວາ ຄໍາບານ ພົມມະນີວົງ ຫົວໜ້າກອງບັນຊາການ ປກສ ແຂວງເຊກອງ,

6. ພົນຈັດຕະວາ ແສງທອງ ທຳມະເທວາ ຫົວໜ້າກົມປ້ອງກັນຄວາມສະຫງົບ ກຳມາທິການ ປກຊ-ປກສ ສະພາແຫ່ງຊາດ.

ນອກນີ້ ດໍາລັດຂອງນາຍົກລັດຖະມົນຕີ ສະບັບເລກທີ 574-610/ນຍ, ລົງວັນທີ 24 ຕຸລາ 2024 ວ່າດ້ວຍການເລື່ອນຊັ້ນໃຫ້ນາຍຕໍາຫລວດ ຈາກຊັ້ນພັນໂທ ຂຶ້ນເປັນຊັ້ນ ພັນເອກ 37 ທ່ານ, ຍິງ 3 ທ່ານ.

ທີ່ມາ: ຄວາມສະຫງົບ