ສະພາ ຖະແຫລງຜົນສຳເລັດການພິຈາລະນາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດວຽກງານ 3 ສ້າງ.
ທ່ານ ພົນໂທ ສຸວອນ ເລືອງບຸນມີ ຮອງປະທານສະພາແຫ່ງຊາດ ໄດ້ຖະແຫຼງຂ່າວກ່ຽວກັບຜົນສຳເລັດການພິຈາລະນາບົດລາຍງານຂອງລັດຖະບານກ່ຽວກັບການຈັດຕັ້ງປະຕິບັດວຽກງານ 3 ສ້າງ ຕາມມະຕິ ກອງປະຊຸມສະພາແຫ່ງຊາດ, ສະບັບເລກທີ 02/ສພຊ, ລົງວັນທີ 28 ມັງກອນ 2016 ວ່າດ້ວຍການຈັດຕັ້ງປະຕິບັດວຽກ ງານສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ ໃນກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX, ໃນວັນທີ 27 ພະຈິກນີ້ວ່າ: ກອງປະຊຸມ ໄດ້ສະແດງຄວາມຊົມເຊີຍຕໍ່ລັດຖະບານ ທີ່ໄດ້ມີຄວາມພະຍາຍາມ ໃນການຈັດຕັ້ງປະຕິບັດວຽກງານ 3 ສ້າງ ຕາມມະຕິ ກອງປະຊຸມສະພາແຫ່ງຊາດ ເລກທີ 02/ສພຊ, ລົງວັນທີ 28 ມັງກອນ 2016 ກ່ຽວກັບການຈັດຕັ້ງປະຕິບັດວຽກງານສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ ເຊຶ່ງວຽກງານສາມສ້າງ ແມ່ນແນວທາງ ແລະ ທິດນຳ ຂອງພັກເຮົາ ໃນການສ້າງຄວາມເຂັ້ມແຂງໃຫ້ແກ່ທ້ອງຖິ່ນ-ຮາກຖານ, ເປົ້າໝາຍແມ່ນການເສີມຂະຫຍາຍສິດເປັນເຈົ້າ ຂອງທ້ອງຖິ່ນ-ຮາກຖານ, ຕ້ອງມີການມອບສິດ, ມອບຄວາມຮັບຜິດຊອບດ້ານການບໍລິຫານລັດ ແລະ ດ້ານການຄຸ້ມຄອງເສດຖະກິດ-ສັງຄົມ ກໍຄືດ້ານຜົນປະໂຫຍດ ໃຫ້ທ້ອງຖິ່ນ ເພື່ອໃຫ້ມີຄວາມສາມາດ ແລະ ເປັນເຈົ້າການຫຼາຍຂຶ້ນ. ສະນັ້ນ, ກົມການເມືອງສູນກາງພັກ ຈຶ່ງອອກມະຕິ ເລກທີ 03/ກມສພ, ລົງວັນທີ 15 ກຸມພາ 2012 ເປັນທິດນຳ ເພື່ອເພີ່ມທະວີບົດບາດການນຳພາຂອງພັກ ເພື່ອເສີມຂະຫຍາຍຄວາມເປັນເຈົ້າການ ແລະ ຄວາມຮັບຜິດຊອບ ໃນການຄຸ້ມຄອງເສດຖະກິດ-ສັງຄົມ ຂອງອົງການປົກຄອງທ້ອງຖິ່ນ ແລະ ລັດຖະບານ ກໍໄດ້ສືບຕໍ່ອອກມະຕິ, ນິຕິກຳຕ່າງໆ ເພື່ອໃຫ້ບັນດາກະຊວງ, ອົງການ ແລະ ຂະແໜງການຕ່າງໆ ເປັນບ່ອນອີງໃນການຈັດຕັ້ງຜັນຂະຫຍາຍ ເປັນອັນລະອຽດ ແລະ ໄດ້ຈັດຕັ້ງເຮັດທົດລອງ ຢູ່ໃນ 109 ເປົ້າໝາຍ ຢູ່ 51 ເມືອງ ແລະ ໄດ້ສະຫຼຸບສັງລວມລາຍງານການເຮັດທົດລອງ ຕໍ່ກອງປະຊຸມສະໄໝສາມັນ ເທື່ອທີ 10 ຂອງສະພາແຫ່ງຊາດ ຊຸດທີ VII, ກອງປະຊຸມໄດ້ຄົ້ນຄວ້າພິຈາລະນາ ອອກມະຕິ ສະບັບເລກທີ 02/ສພຊ, ລົງວັນທີ 28 ມັງ ກອນ 2016 ວ່າດ້ວຍການຮັບຮອງເອົາບົດລາຍງານ ຂອງລັດຖະບານ ກ່ຽວກັບການຈັດຕັ້ງປະຕິບັດເຮັດທົດລອງວຽກງານສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ; ຮັບຮອງເອົາຄາດໝາຍສູ້ຊົນ ແລະ ທິດທາງ ເພື່ອສືບຕໍ່ຈັດຕັ້ງປະຕິບັດວຽກງານ 3 ສ້າງ ໃນຕໍ່ໜ້າຕາມການສະເໜີ ຂອງລັດຖະບານ.
ຜົນສຳເລັດໄດ້ສ້າງຕັ້ງສະພາປະຊາຊົນຂັ້ນແຂວງ ຊຶ່ງແມ່ນອົງການຕົວແທນແຫ່ງສິດ ແລະ ຜົນປະໂຫຍດ ຂອງປະຊາຊົນລາວບັນດາເຜົ່າ ແລະ ເປັນອົງການອຳນາດລັດຂັ້ນທ້ອງຖິ່ນ ມີສິດ ແລະ ໜ້າທີ່ລວມຄື: ສິດ ແລະ ໜ້າທີ່ ດ້ານນິຕິກຳ; ສິດ ແລະ ໜ້າທີ່ ດ້ານການຕົກລົງບັນຫາສຳຄັນພື້ນຖານ ຂອງທ້ອງຖິ່ນ; ສິດ ແລະ ໜ້າທີ່ ດ້ານການຕິດຕາມກວດກາ ແລະ ສຳເລັດການປະກາດສ້າງຕັ້ງ 3 ນະຄອນ ຄື: ນະຄອນ-ຫຼວງພະບາງ, ນະຄອນໄກສອນ ພົມວິຫານ ແລະ ນະຄອນປາກເຊ ແລະ ບັນ ດາກະຊວງ, ອົງການ ກໍໄດ້ຄົ້ນຄວ້າໃນການສ້າງ ແລະ ປັບປຸງບັນດານິຕິກຳ ເພື່ອສອດຄ່ອງ ແລະ ມີຄວາມເປັນເອກະພາບ ໃນການຈັດຕັ້ງປະຕິບັດວຽກງານ 3 ສ້າງ ໃນຂົງເຂດຄວາມຮັບຜິດຊອບ ຂອງຕົນ, ສ້າງແຂວງເປັນຫົວໜ່ວຍຍຸດທະສາດ ຕາມ 7 ດ້ານ ແລະ 66 ຕົວຊີ້ບອກ ບັນລຸໄດ້ 1 ນະຄອນຫຼວງ ແລະ 2 ແຂວງຄື: ນະຄອນຫຼວງວຽງຈັນ, ແຂວງສະຫວັນນະເຂດ ແລະ ແຂວງຈຳປາສັກ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ຕາມ 5 ດ້ານ ແລະ 47 ຕົວຊີ້ບອກ ບັນລຸໄດ້ 3 ນະຄອນ ແລະ 21 ເມືອງ, ສ້າງບ້ານເປັນຫົວໜ່ວຍພັດທະນາ ຕາມ 4 ດ້ານ ແລະ 30 ຕົວຊີ້ບອກ ບັນລຸໄດ້ 3,618 ບ້ານ.
ສຳລັບທິດທາງໃນຕໍ່ໜ້າ ກອງປະຊຸມເຫັນດີຕາມການສະເໜີ ຂອງລັດຖະບານ ກ່ຽວກັບທິດທາງ, ແຜນການ ແລະ ຄາດມາຍສູ້ຊົນ ໃນປີ 2025 ແລະ ແຜນການ 5 ປີ (2026-2030); ກອງປະຊຸມສະເໜີລັດຖະບານ ຄົ້ນຄວ້າຕື່ມ ແລະ ເອົາໃຈໃສ່ຈັດຕັ້ງປະຕິບັດບາງບັນຫາ ດັ່ງນີ້: ທິດທາງ, ແຜນການ ແລະ ຄາດໝາຍສູ້ຊົນ ໃນປີ 2025: ສະຫຼຸບ ຕີລາຄາ, ຖອດຖອນບົດຮຽນວຽກງານ 3 ສ້າງ, ວຽກງານກໍ່ສ້າງຮາກຖານການເມືອງ, ວຽກງານພັດທະນາຊົນນະບົດຮອບດ້ານ ແລະ ແກ້ໄຂຄວາມທຸກຍາກ ຕິດພັນກັບການປັບປຸງລະບົບການປົກຄອງທ້ອງຖິ່ນ ຕາມມະຕິ 05/ຄບສພ, ລົງວັນທີ 5 ກັນຍາ 2023, ຄົ້ນຄວ້າປັບປຸງ ຄໍາແນະນໍາ ກ່ຽວກັບການປະເມີນຜົນ ສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ ຕາມມາດຕະຖານ ແລະ ຕົວຊີ້ບອກ ທີ່ໄດ້ກໍານົດໄວ້, ຊຸກຍູ້ສ້າງແຂວງໃຫ້ເປັນຫົວໜ່ວຍຍຸດທະສາດ ໃຫ້ໄດ້ 2 ແຂວງ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານໃຫ້ໄດ້ 4 ເມືອງ ແລະ ສ້າງບ້ານເປັນຫົວໜ່ວຍພັດທະນາ ໃຫ້ໄດ້ 1,086 ບ້ານ;
ສ່ວນທິດທາງແຜນການ 5 ປີ (2026-2030): ສູ້ຊົນ ສ້າງແຂວງໃຫ້ເປັນຫົວ ໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາຕາມທິດທາງແຜນການທີ່ວາງໄວ້, ສ້າງໃໝ່ ຫຼື ປັບປຸງ ນິຕິກໍາ ກ່ຽວຂ້ອງກັບວຽກງານ 3 ສ້າງ ຕາມທິດຜັນຂະຫຍາຍມະຕິ ເລກທີ 05/ຄບສພ, ລົງວັນທີ 5 ກັນຍາ 2023 ວ່າດ້ວຍການສືບຕໍ່ຍູ້ແຮງການຜັນຂະຫຍາຍແນວທາງປ່ຽນແປງໃໝ່ເຂົ້າສູ່ລວງເລິກ ສ້າງການຫັນປ່ຽນທີ່ແຂງແຮງ, ເລິກເຊິ່ງ ແລະ ຮອບດ້ານ ໃນການນໍາພາຂອງພັກ, ບັນດາກະຊວງ, ຂະແໜງຂັ້ນສູນກາງ ເພີ່ມທະວີການ ລົງຕິດຕາມ, ຊຸກຍູ້-ຊີ້ນໍາ ຂັ້ນທ້ອງຖິ່ນໃນການຈັດຕັ້ງປະຕິບັດບາງມາດຕະຖານທີ່ມີຄວາມຫຍຸ້ງຍາກ ແລະ ມີຄວາມສ່ຽງຈະບໍ່ບັນລຸ,ບັນດາກະຊວງ, ຂະແໜງການຂັ້ນສູນກາງ ຍົກສູງຄວາມຮັບຜິດຊອບ ໃນການສ້າງ ແລະ ປັບປຸງນິຕິກຳກ່ຽວກັບການແບ່ງຂັ້ນຄຸ້ມຄອງດ້ານຕ່າງໆ ໃຫ້ເປັນລະບົບຄົບຊຸດ, ຕິດພັນກັບການປັບປຸງກົນໄກການປະສານງານ ລະຫວ່າງຂັ້ນສູນກາງດ້ວຍກັນ ແລະ ສູນກາງກັບທ້ອງຖິ່ນ ແລະ ອື່ນໆ.
