ອິນເດຍຈັບເຮືອປະມົງຈາກມຽນມາລັກລອບຂົນເມດແອມເຟຕາມີນ 5,500 ກິໂລ
ໜ່ວຍຍາມຝັ່ງຂອງອິນເດຍ ຢຶດເຮືອປະມົງທີ່ກໍາລັງລັກລອບຂົນເມດແອມຟາຕາມີນ ຫລື ຢາບ້າ 5,5 ໂຕນ ຈາກມຽນມາ ຖືເປັນການຢຶດຢາເສບຕິດຄັ້ງໃຫຍ່ທີ່ສຸດຄັ້ງໜຶ່ງຂອງປະເທດ.
ໜ່ວຍລາດຕະເວນທາງອາກາດພາຍໃຕ້ກອງກໍາລັງຍາມຝັ່ງອິນເດຍ (ICG) ກວດພົບເຮືອປະມົງຂະໜາດນ້ອຍລໍາໜຶ່ງ ລອຍຢູ່ໃນທະເລອັນດາມັນ ລະຫວ່າງປະເທດອິນເດຍ ແລະ ມຽນມາ ກໍາລັງປະຕິບັດການໃນລັກສະນະທີ່ໜ້າສົງໄສ ໃນວັນທີ 24 ພະຈິກຜ່ານມາ.
ເມື່ອເຈົ້າໜ້າທີ່ຂອງອິນເດຍເຂົ້າກວດຄົ້ນເຮືອ ພົບລູກເຮືອຊາວມຽນມາ 6 ຄົນ ແລະ ເມດແອມເຟຕາມີນ ເຊິ່ງເປັນຢາເສບຕິດຕ້ອງຫ້າມ ບັນຈຸຢູ່ໃນຫີບຫໍ່ຈໍານວນຫລາຍ ແລະ ມີນໍ້າໜັກລວມປະມານ 5,500 ກິໂລ.
“ການຢຶດຢາເສບຕິດຄັ້ງນີ້ ຖືເປັນການຢຶດຢາເສບຕິດຄັ້ງໃຫຍ່ທີ່ສຸດຂອງ ICG ເຊິ່ງສະແດງໃຫ້ເຫັນເຖິງຄວາມຕັ້ງໃຈຂອງອິນເດຍ ໃນການປົກປ້ອງນ່ານນໍ້າອະທິປະໄຕຂອງປະເທດ” ຖະແຫລງການລະບຸ. ພ້ອມເປີດເຜີຍວ່າ: ມີການລາກຈູງເຮືອລໍາດັ່ງກ່າວເຂົ້າມາໃນເຂດຂອງອິນເດຍແລ້ວ ເພື່ອກວດສອບຢ່າງລະອຽດຕໍ່ໄປ.
ປັດຈຸບັນ, ຜູ້ຜະລິດຢາເສບຕິດຢູ່ມຽນມາລັກລອບຂົນຢາເສບຕິດທາງເຮືອເພີ່ມຂຶ້ນ ເພື່ອຫລີກລ່ຽງການລາດຕະເວນທີ່ເຂັ້ມງວດຂອງເຈົ້າໜ້າທີ່ຕາມເສັ້ນທາງບົກ ເຊິ່ງຕ້ອງຜ່ານຈີນ ແລະ ໄທ.
ສໍານັກງານວ່າດ້ວຍຢາເສບຕິດ ແລະ ອາດຊະຍາກໍາແຫ່ງສະຫະປະຊາຊາດ (UNODC) ລາຍງານວ່າ: ສະເພາະປີ 2023 ເຈົ້າໜ້າທີ່ຢູ່ອາຊີຕາເວັນອອກ ແລະ ອາຊີຕາເວັນອອກສຽງໃຕ້ ສາມາດຢຶດເມດແອມເຟຕາມີນ ໄດ້ສູງເຖິງ 190 ໂຕນ ເຊິ່ງການຜະລິດຈໍານວນຫລາຍອາດບົ່ງຊີ້ໄດ້ເຖິງລາຄາຂາຍສົ່ງຂອງຢາເສບຕິດຊະນິດນີ້ ເຊິ່ງລາຄາຂາຍສົ່ງປະມານ 400 ໂດລາສະຫະລັດຕໍ່ກິໂລ.
